Read Pochuri Naga KHONYOKÜÜTHELE 9 Bible Online

KHONYOKÜÜTHELE 9 - Pochuri Naga bible

KHONYOKÜÜTHELE 9

¹“Künaluo, O Israel; nohri tü nosü Jordan kariwa nü akuoküji nohri nyiehvü küji thi kükhra, anyuji aküji thi sakümsie nü atülü juküvehri vi nohri azhi sana küsa,

²nohri nüh küthsü Anak atsari, anyi ji thi suokruo ti küsa riehkhuo, nohri nüh mari zhüku küthsü üta mari tü, ‘Thari nüh Anak atsara tüvü tsiera na lo?’ ta küphrahteri.

³Jükenüh nohri tü nosü thsüluo, anyih zanyo tso küürara kümjie nohri tüvü kuoküwawa tü VÜWA nohri Saküüwuowa wiethuoh; ma nüh nohri tüvü nüh mari zorieja thi mari cha naveh; thi mari zhejam nü VÜWA nüh phrahteke küsa üta shita mari pokah küm sanaveh.

⁴“Thi VÜWA nohri Saküüwuowa nüh noh türivü nüh mari zhejaküm vü nohri mpa noh müsheri vünüh, hi künyitsa kenüh VÜWA nüh hi sieru azhih hama küvira wie ti mümshe tümluo, küpakenühnyunü mari kümsüküsa kenüh mari zhezhu küveh wie.

⁵Nohri nüh azhih hama vina küsa thuoüji nohri künyitsa nyutü nohri kümsho küpeh kenüh nyu; thitü akuoküji hamari tü kümsüküsa kenüh noh türivü nüh mari zhezhuja küveh wie, jüti sanü ma nüh nohri pari, Abraham vü Isaac vü, thi Jacob vü küshie küsa zhüwa sakümzho nti küsa kenüh wie.

⁶“Jükenüh thsüluo, VÜWA nohri Saküüwuowa nüh azhih kümhie hama nohri vü tsü küveh thuoüji nohri künyitsa kenüh nyu; küpakenühnyunü nohri tü anyi müküürüthuorari küsa kenüh.

⁷Nohri tü rezavü nüh VÜWA nohri Saküüwuowa mükülo sanü ma rüsaküshu küm mükümatümluo; nohri nüh Egypt zhih vünüh tsezhu küru rülo vünüh azhie hala küru küju nohri tü VÜWA siesaluoru ju.

⁸Horeb vü nga nohri tü VÜWA mükülo sataji ma rüsaküshu, jüti sanü VÜWA tü nohri vü arü khieloti shu nü nohri zoriemluo nta küche tewa.

⁹ Hi nüh lokhie lohwa VÜWA nüh nohri sie kütsathuozhü lokhiewa vi nti aküzhi vü küwa vü, hi tü jüla rülo zürake thi rüza zürake aküzhi vü peh nü lohse mütsa thi ajuh nga müzhu.

¹⁰Thi Saküüwuowa tüjü nüh kürhü aloh kürüpuo künyi VÜWA nüh vi hi tsü; jümasü rügivü VÜWA nüh müza kümhu rülo vü aküzhi rügi vü anyih azhila vünüh VÜWA nüh azhü küüza aveh tü khehveh.

¹¹Rülo zürake thi rüza zürake sehkhe vü thuoüji VÜWA nüh aloh kürüpuo kütsathuozhü loh künyi vi hi tsü.

¹²“Jüti küsa vü VÜWA nüh hi vü, ‘Sühra nü hala nüh shita tsetsuo luo; küpakenühnyunü noh nyiri noh nüh Egypt zhih vünüh siezhu küruri tü saküümne amüke savehthuoh; hi nüh azhükütsü vünüh mari tü shita kürele anato vü tewathuoh; mari tü atsorhe lü nü sasavehthuoh,’ ta küza.

¹³“Jüma nyiehvü nga VÜWA nüh hi vü, ‘Hi nüh anyi hamari ngumthuoh nü halie, mari tü anyi müküürüthuorari wiethuoh;

¹⁴hi mükhe tümluo, jüti sanü hi tü mari küüzoriem thi atülü kükhu vünüh mari anyo vijaküm saluo,’ ti küza.

¹⁵Jükenüh hi tü kürele nü aküzhi vünüh shele teturu, thinü aküzhiwa tü anyih nüh tsopehveh; jüti küsa vü kütsathuozhü loh künyi tü eh ke künyi vü pehveh.

¹⁶Jüti küsa vü hi nüh noküze ünü halie, nohri tü VÜWA nohri Saküüwuowa vü khiemuoküm sa; nohri tü nohri mpa nüh mieshüzah lü nü sa; VÜWA nüh nohri vü azhükütsü lehkhuji vünüh shita kürele küpavü tewa.

¹⁷Jükenüh hi nüh aloh kürüpuo künyi tü eh ke vünüh vehjaküze nü nohri atüvü nüh külokhuom.

¹⁸Jüti sanü hi tü atükhuwa kümjie VÜWA tüvü rülo zürake thi rüza zürake kümkheh fephohke nü zeh; hi tü lohse nga mütsa thi ajuh nga müzhu, küpakenühnyunü nohri nüh mowa nü kümsünüh jüma VÜWA notha vü sanü kükhiemuo aveh sataji ma mükülo sataji ma rü saküshuküm kenüh.

¹⁹ Hi tü VÜWA rüküshu thi lomküzhe luoveh küsa nohri vü sanü nohri zorie nta küüche kükrü kenüh. Thitü jüma tsotho vü nga VÜWA nüh eh zhü küna tsü.

²⁰Thi VÜWA tü Aron vü khieloti arüshu nü ma zorie nta sa; thitü jüma tsotho vü hi nüh Aron kenüh nga kükhuo sa.

²¹Jüti sanü hi nüh kükhiemuo tsatsa zanyo nohri nüh küsa mieshüzahwa vi taji anyih vünüh tso nü tohkümnya, kürekümnya nü azhitho kümjie müjie kümnya küju nü kürenya taji aküzhi vünüh liküturu rühgu lovü azhithowa tü hi nüh vehjake.

²² “Tabera vü nga, Masa vü nga thi Kibrothatava vü nga ti VÜWA mükülo sanü ma rüsaküshu.

²³VÜWA nüh Kadesh Barnea vünüh nohri küüze vü ma nüh, ‘Khru nü hi nüh azhih tsü küsawa vi luo,’ ti küüza vü nohri tü VÜWA nohri Saküüwuowa nüh azhükütsü sie saluo ru, jüti sanü ma mütsotü nüh sa thi ma jikhi müküna nüh sa.

²⁴Hi nüh nohri küthsüra rülo vünüh nohri tü VÜWA sie saluo teruthuoh.

²⁵“Jükenüh hi nüh rülo zürake thi rüza zürake hamari VÜWA tüvü kümkheh fephohke ru, küpakenühnyunü VÜWA nüh nohri zorie nta küüza kenüh.

²⁶Thi hi nüh VÜWA vü kükhuo sataji, ‘O VÜWA Saküüwuowa, noh nyiri thi akaküvi noh küji vünüh noh nüh kürhehsa noh ke kümzho vünüh Egypt vünüh küvizhuri müzorie tüm mo.

²⁷Noh sieperi, Abraham, Isaac thi Jacob müküma tüm mo, müküürüthuora anyi hamari, mari kümsüküsa, nyutü mari kükhiemuo kümsheke müsa tümluo,

²⁸Jüta mükünyu nü noh nüh hiri siezhuküru nyujiwa nüh, “Küpakenühnyunü VÜWA nüh mari sie nü ma nüh phrahteke küsawa vü mükürura kenüh, thi ma nüh mari kümrhü kenüh rezavü nüh mari fethe nta siezhu küru wie ta thama küüphrahte kenüh,” ti küza.

²⁹Küpakenühnyunü mari tü noh nyiri thi noh kaküviri küsa kenüh, mari tü noh kükhra thi noh pie thsuo küüze vünüh vizhuküru wie,’ ti küza.