Read Pochuri Naga JOHAN 11 Bible Online

JOHAN 11 - Pochuri Naga bible

JOHAN 11

¹Lazar ti küji Bethani vü kürhowa tü na peveh. Bethani tü Maria thi Martha nüh rhoküveh nyu.

² Jümatü Maria khanavü vüjuh vi VÜWA küne tsü taji ma she nüh ma jih nekütsüwa aprah Lazar wiethuoh.

³Jükenüh masü vüleri nüh Jisu vü zhüle küze taji, “VÜWA, noh nüh küümzewa tü nazeveh lie,” ti küza.

⁴Thitü Jisu nüh jü küthsüravü ma nüh, “Lazar hamatü aküsü kenüh nyu, thitü Saküüwuowa nyo saküüthola na küsa kenüh wie, jüüta thuoüji nyi Tsawa tü jüma kenüh küthola sara naveh,” ti küza.

⁵Jisu tü Martha thi Maria thi ma prahwa Lazar kümüze.

⁶Ma tü ma naveh ta thsüra ünü, ma nüh peküveh azhie vü rülo künyi küzhike petewa.

⁷Jümase vünüh ma nüh ma sehnyiri vü, “Hiri shele Judea vü wa le ünüh raluo,” ti ji.

⁸Thinü ma sehnyiri nüh ma vü, “Küsosiewa, Judahri nüh aloh vi no veh nta phaveh, thi noh tü shele jüla wa nti ülo?” ti küza.

⁹Jisu nüh, “Rülo küsü vü münühu türakünyi pemüveh ülo? Nyi küsüküsü nga rülo vü küüzhu thuoüji aji mümüshü, küpakenühnyunü ma tü azhih hama küwie ngu küveh kenüh.

¹⁰Thitü nyi küsüküsü nga rüza vü küzhu thuoüji ajimüshüshüti, küpakenühnyunü küwiewatü ma vü mükünyie kenüh,” ti küza.

¹¹Hakümjie ma nüh phrate taji mari vü, “Hiri füwa Lazar tü zetewathuoh, thitü hi nüh wa taji ma küze vünüh müchüke naveh,” ti küza.

¹²Ma sehnyiri nüh ma vü, “VÜWA, ma tü zeveh üji ma mpa sürale naveh,” ti küza.

¹³Jisu nüh hama küphrate tü ma küsü phrate, thitü mari nüh kümüshe thuoüji ma tü ze nü münyieveh tünta müshe.

¹⁴Thinü Jisu nüh mari vü, “Lazar thuoüji sümüthuoh ti künyito küza.

¹⁵Nohri kenüh hi tü jula müküpewa nüh küümphakhe, jütathuoüji nohri tü tsotüra naveh. Thitü hiri ma vü wa ünüh raluo,” ti küza.

¹⁶Thomas, küwushie ti küjiwa nüh ma fü sehnyiri vü, “Hiri nga wa ünüh raluo, jütathuoüji hiri ma sie sü naveh,” ti küza.

¹⁷Jüti sataji Jisu ruju ünü Lazar tü rüku lovü thsekümü rülo müzü sakümü ngura.

¹⁸Bethani tü Jerusalem küshenyi vü mile künyi wie.

¹⁹Jütiküsavü Judahri hozake tü masü aprahwa sükümü kenüh Martha thi Maria luoveh sakürüzi tsü nti ru.

²⁰Thinü Martha tü Jisu tse ta küsa thsü ünü wa ma sie mütu, thitü Maria thuoüji azhe lovü peh.

²¹Martha nüh Jisu vü, “VÜWA, noh nüh hala küpetüla eh nü tü küsüwanyu nü.

²²Thitü khinyi wienga noh nüh mowa Saküüwuowa vü khuo naveh nüh, Saküüwuowa nüh sa noh tsüwie naveh ta küsa hi nüh thsüwieveh,” ti küza.

²³Jisu nüh ma vü, “Noh prahwa tü rhosüra lewie naveh,” ti küza.

²⁴Martha nüh ma vü, “Rülo sehkhevü rhoküsürale rülovü ma tü sürale nata küsa hi nüh thsüveh,” ti küza.

²⁵Jisu nüh ma vü, “Hi thuoüji kürholewa thi Kürhowa, thawa nüh hi tsotü naveh nüh ma tü sümüwie ketünga rhole naveh.

²⁶Thi thawa nüh rhoküpe vünüh hi tsotü naveh nüh piketü küsülewa nyuthuoh. Noh tü hama tsotü veh nü nyu lo?” ti küna.

²⁷Martha nüh ma vü, “Ah, VÜWA, noh tü Khrista, Saküüwuowa Tsa, azhih vü ru na küsawa ta küsa hi nüh tsotü veh,” ti küza.

²⁸Ma nüh hama phrate kümüsevü ma tü wa taji ma nü Maria ji nü müchieluo nüh ma vü, “Küsosiewa tü hala peveh, thi ma tü noh jiveh,” ti küza.

²⁹Thinü ma nüh jü thsüra taji süra nü shiti ma vü wa.

³⁰Jisu tü jüma tsotho vü nga anyu vü müjie ruju nüh Martha masü kümütu pevü tsiewie veh.

³¹Judahri ma sie zhe lovü peh nü ma luoveh saküwie küvehri nüh Maria shita süra nü kuoteküwa künguvü ma tü wa rüku vünüh krie nta kuotewathuoh ti küsa müshe nü ma se zhewa.

³²Jütiküsavü Maria tü Jisu peküveh vü ru taji ma ngu ünü ma tü kükiatsuo nü ma vü, “VÜWA noh hala küpetüla eh prahwa tü küsüwanyu nü,” ti küza.

³³Jütiküsavü ma thi ma sehnyiküru Judahri krie küveh Jisu nüh ngu taji ma luoveh na she thi lorü tewa.

³⁴Thi ma nüh, “Nohri ma khiela chowu saveh lo?” ti küna. Thinü mari nüh ma vü, “VÜWA, ra nü noluo,” ti küza.

³⁵Jisu krietewa.

³⁶Thinü Judahri nüh, “Ma tü küzakelenga ma kümüzeveh nüh noh jie,” ti sa.

³⁷Thitü mari wuori nüh, “Ma nyuri nothaküüju sakümühiekütsüwa tü anyi hama küsü samükümühie nüh sanaveh ülo?” ti sa.

³⁸Thinü Jisu tü lorü sheke lehü taji arüku vü ru, rüku jümatü aküpie thi aloh nüh jüma sote saveh.

³⁹Jisu nüh, “Sateküsa aloh jüma küprijamü luo,” ti küza. Thitü sükümüwa tsehvü Martha nüh ma vü, “VÜWA, ma sükümü nosü rülo müzüthuoh, thi münemülanathuohnü,” ti küza.

⁴⁰Jisu nüh ma vü, “Nohri nüh tsotü thuoüji Saküüwuowa kümühie küthola ngu naveh ti hi nüh nohri vü müküza ülo?” ti küza.

⁴¹Jütiküsavü mari nüh alohwa khajamü. Thinü Jisu tü ma notha rügivü no taji, “Eh Pa, noh nüh eh kükhuo küna kümütüthuoh kenüh no müna she.

⁴²Noh nüh tsotho aveh eh kükhuo künatü küveh hi nüh thsüveh, thitü anyi hamari eh kütuovü peküvehri kenüh hama küzaveh, küpakenühnyunü noh nüh hi küze ta küsa mari nüh tsotü na küsa kenüh,” ti küza.

⁴³Ma nüh hama küzakümüsevü ma zhü zie taji, “Lazar, shuru luo,” ti küza.

⁴⁴Thinü aküsüwa tü ma jih ma ke thi ma nyia athsü nüh tiehte nü shuhru. Jütiküsavü Jisu nüh mari vü, “Athsü lejamütü nü ma küzemü luo,” ti küza.

⁴⁵Jükenüh Judahri nüh Maria vü küruri hozake nüh ma nüh küsa ngu taji ma tsotü khe.

⁴⁶Thitü mari wuori nüh Jisu nüh mowa sanüh viwa Farisiri vü küza.

⁴⁷Thinü levü küjiri thi Farisiri tü sehzhu nü azhüjüle taji, “Hiri tü mowa sanathuoh lo? Küpakenühnyunü anyi hama tü thsoshi hozake satekütsethuoh kenüh.

⁴⁸Hiri tü hakümjie ma saküüpehuomü thuoüji nyiri aveh nüh ma tsotümü navehthuoh, thi Romri nüh ru taji hiri Kükhurüzhe thi hiri akuoh nga zoriemü nathuoh,” ti küza.

⁴⁹Thi mari azhie vü nyi küsü ma nyo Kaifa ti küjiwa jüma mavi vü levü saküvehwa nüh mari vü, “Nohri tü zanyo küsü nga müthsü!

⁵⁰Akuoh aveh müzorie nüh nyi küsü nüh sükümü nüh küükato naveh ta küsa nga nohri tü mümüshe ülo?” ti küza.

⁵¹Hama ma nüh küüza tü ma mpa ma kümüshe vünüh nyu, thitü ma tü jüma mavi vünüh levü kümüsiewa küsa kenüh Jisu tü akuoh aveh kenüh müsüji mümühie ta küsa küüzawie.

⁵²Thi akuohwa kenüh mpa nyu nü Saküüwuowa tsari vorie teküwari sazhuh na küsa kenüh wie.

⁵³Jüti sataji jürülo vünüh tuvü thuoüji mari tü mokümjie ma zothe naveh nüh ti küsa aro phatewa.

⁵⁴Jümasevü thuoüji Jisu tü Judahri azhievü nyiri küthsü sataji müküzhu nüh satewa, thitü jüla nüh tse taji reza vü anyu Efraim ti küji vü ma sehnyiri sie taji petewa.

⁵⁵Jütiküsavü Judahri Tsekükari khuwa tü shenyiteru, thi nyiri tü mari mpa mari sakümtse na küsa kenüh tsekükari akhu müküjie atüvü hozake mari mpa mari nyu vünüh Jerusalem vü wa.

⁵⁶Mari tü Jisu no taji Kükhurüzhe lovü pe nü mari mpa küsü nüh küsü vü, “Ma tü akhu vü müruthuoüji nohri nü mowa müshe veh lo?” ti sa.

⁵⁷Jütiküsavü levü küjiri thi Farisiri nüh ma khiela peveh nüh thsüküvehri nü mari vü küza üti küsa azhüwa tsümü, jütathuoüji mari nüh ma rera naküveh kenüh.