Read Pochuri Naga JOHAN 12 Bible Online

JOHAN 12 - Pochuri Naga bible

JOHAN 12

¹Tsekükari khu rülo türo atüvü Jisu nüh Lazar saküürho anyu Bethani ti küji vü ru.

²Jüti sataji mari nüh ma kenüh ashieshu taji Martha nüh avosa thi Lazar nga mari vü nyi pe nü tsa.

³Thinü Maria nüh avüjuh kümühie arhe küüngu amekükhotsatsawa aku küsü viru nü Jisu ajih künetü nü ma she vi ma jih netü.

⁴Thinü avüjuh arhe nüh azhe lo jüma protewa. Thitü Simon tsa Judas Iskariot, ma sehnyiri azhie vünüh nyi küsü (Ma retsüna küsawa) nüh,

⁵“Mokenüh avüjuh hamatü tuli müzaküche nüh zhu taji kümükhuori mütsü lo?” ti phrate.

⁶Ma nüh hama küüzatü kümükhuori küümzetsavünüh müphrate, thitü ma tü kürühuri, thi ma nüh rakakuwa vükütse kenüh jülovü momowa thse naveh nüh vivi ti küsa kenüh.

⁷Jisu nüh, “Jüüti ma küüsamü luo, hi küchowu rülovü kenüh jüti ma saküüpemü luo.

⁸ Kümükhuori thuoüji tsotho aveh vü nohri siepe veh, thitü nohri tü tsotho aveh vü hi sieküpewa nyu,” ti küza.

⁹Judahri ashiejiwa nüh ma Bethani vü peveh ta küsa thsüranü ru, mari nüh jüla küru thuoüji Jisu kenüh mpa nyu thitü Lazar ma nüh saküürhowa nga no nti ru.

¹⁰Jükenüh levü küjiwa nüh Lazar nga küüsü nti sa,

¹¹küpakenühnyunü ma kenüh Judahri hozake wa taji Jisu tsotüteküwa kenüh.

¹²Rülo künyiawa anyi shiejiwa akhu vü küruri tü Jisu Jerusalem vü tse taküsa thsüra.

¹³Thi mari nüh küzhiluohphinyawa vi nü ma mütu nti zienü, “Hosanna, VÜWA nyo vünüh kütsewa Israel Kajiwa Kümüngawa saluo,” ti sa.

¹⁴Thi Jisu tü rawu kümüjie küsa aküzawa küsü ngura taji jüma rügivü shupe; küpakenühnyunü zhütsazhü vünüh rhüküsa hakümjie:

¹⁵ “Mükrütümü luo, Zion atsavühri, Halie, nohri kajiwa arawuh kümüjie küsaküzawa küsürügivü shupe nü tsethuoh,” ti rhüsaveh.

¹⁶Ma sehnyiri tü atükhu vünüh hama müthsü, thitü Jisu küthola sakümü sevü nüh hama tü ma kenüh rhüküsa thi saküsa müshera.

¹⁷Thi anyi shiejiwa tü ma nüh Lazar arüku vünüh küjizhuvü thi aküsü vünüh saküüsüra vü küperi nüh povü sawa.

¹⁸Anyi shiejiwa nüh ma mütu nti küwa thuoüji ma nüh thsoshi hama sata küünara kenüh küwa wie.

¹⁹Thinü Farisiri tü mari mpa küsü nüh küsü vü küza taji, “Nohri tü zanyoküsü nga müsarathuoh, küpakenühnyunü azhihwatü ma se kuonyiteküwathuoh kenüh,” tisa.

²⁰Thi akhu vü wa khurü nta küwa wuori thuoüji Greekri.

²¹Jükenüh hamari tü Filip Galilee azhih vü Bethsaida vünüh küruwa vü ru taji ma vü, “Küjiwa, hiri tü Jisu nongü thelie,” ti khuo.

²²Filip nüh wa taji Andrew vü küza; thinü Andrew tü Filip sie taji wa Jisu vü küza.

²³Thinü Jisu nüh masü vü, Nyi Tsawa küthola sana küsatsothowa juvehthuoh.

²⁴Hi nüh nohri vü küzatoke naveh, amütha tha küsü nüh azhih vü tsuotsawa nü müsü thuoüji ma mpa wie, thitü jümatü sü thuoüji avi hozake pepeti.

²⁵ Thari nüh ma kürho kürüpa tse nüh kümiemümüti, thitü thari nüh azhih hala ma kürho mükürüpa nüh satse nüh jüma thuoüji küsuokürho kenüh pehra naveh.

²⁶Thawa nüh e kütsüküna tseveh nüh eh se münyiji mümühie, thi hi khiela peh naveh nüh e kütsüküünari nga jüla pe naveh, thawa nüh e kütsükünaveh nüh Pawa nga ma chieke naveh.

²⁷Khinyi thuoüji eh luoveh küraküpremüthuoh. Thi hi tü mowa küzanathuoh lo? Eh Pa, tsotho hala nüh hi külole luo. Thitü hi tü hama kenüh tsotho hala küruwie.

²⁸Eh Pa, noh nyowa küthola saluo. Thinü thajüwu vünüh jikhi ru taji, “Hi nüh kütholasathuoh; thi hi nüh küthola sa lewie naveh,” ti küza.

²⁹Anyi shieji jüla tsieküvehri nüh jü thsü taji, “Tso shivehthuoh,” ti küza.

³⁰Thitü wuori nüh, “Rügizhüleri küsü nüh ma vü azhü küza vehthuoh,” ti küza. Jisu nüh, “Jikhi hamathuoüji nohri kenüh küruwie, eh kenüh nyu,” ti rületsü.

³¹Khinyi thuoüji azhih hama ashihthuoh, thi khinyi thuoüji azhih hama takrüwa tü zhejamünathuoh.

³²Thi azhih vünüh hi vitekuothuoüji nyiri aveh hi küpehpe vü sietekuo naveh, ti küza.

³³Ma nüh hama küüza thuoüji ma tü mowa sühle sasü nasaveh nüh kütsana küsa kenüh küüzawie.

³⁴Anyi shiejiwa nüh ma vü, “Hiri nüh Khonyo vünüh küthsüra Khrista thuoüji küsuokürho peveh ta thsüra, thinü anyi Tsawa tü vitemükuothuoüji mümühie ta küsa noh tü khiela nüh phratera na lo? Nyi Tsawa hama tü thawalo?” ti küna.

³⁵Jisu nüh mari vü, “Küwiewa tü nohri vü pike küzhikepeh thuoh. Küzowa nüh nohri nyia vü müküze nüh sana küsa kenüh Küwiewa peküveh vü tse luo; küzo vü kütseri thuoüji ma tü khievü kuowa nüh müthsü.

³⁶Küwiewa peküvehvü nohri küwiewa tsotüluo, jütathuoüji nohri küwiewa tsari sara naveh,” ti küza. Jisu nüh hamari küza mü nü mari vünüh küthitewa.

³⁷Ma nüh mari tüvü thsoshi hozake sawie ketünga mari tü ma mütsotü nüh sa,

³⁸Isaya setsaküthsüwa nüh: “VÜWA, thawa nüh hiri zhüle tsotü lo? Thi thawa vü VÜWA kükhra küthsütsü lo?” ta küzaküsawa saju naküsa kenüh wiethuoh.

³⁹Jükenüh mari vü mütsotüra nüh samü. Küpakenühnyunü Isaya nüh küza le taji:

⁴⁰“Ma nüh mari notha saküüjumütüthuoh thi mari luoveh sakükhomütüthuoh, küpakenühnyunü mari notha nüh ngura mü thuoüji thi mari luoveh nüh thsüramü thuoüji mari saküümühienta hi vü küru kükrü kenüh,” ti küza.

⁴¹Isaya nüh ma kümühie küngu kenüh hama küüzawie.

⁴²Thitü jütawie ketünga Judahri kükhra küviri hozake wie nga ma tsotü, thitü Farisiri kükrü kenüh mari tü müphrahzhu, küpakenühnyunü künazizhe vünüh mari zheja üsü ta küsa kenüh.

⁴³Küpakenühnyunü mari tü Saküüwuowa müküsiake nyiavünüh nyiri nüh küsiake nüh küülo küsa kenüh.

⁴⁴Thi Jisu nüh zia taji, “Thawa nüh hi tsotü veh nüh hi nyunü hi küüzewa tsotüveh.

⁴⁵Thi thari nüh hi nguveh nüh hi nyu nü hi küüzewa nguveh.

⁴⁶Nyiri küsüküsü nga hi kütsotüwa thuoüji aküzo vü mpeh nüh sana küsa kenüh hi tü küwiewa sataji azhih hala ru.

⁴⁷Nyi küsüküsü nga hi nüh küüzari küna taji mümüzhe thuoüji hi nüh ma müshekümüsüwa nyu; küpakenühnyunü hi tü azhihwa müshemüsü nti kürunyu nü azhihwa külole nti küru kenüh.

⁴⁸Hi kükulewa thi hi nüh küüzari müküviri thuoüji müshekümüsü küsü peveh; azhü hi nüh küzaküsawa nüh rülo sehkhe vü ma küjo naveh.

⁴⁹Küpakenühnyunü hi mpa eh kükhra vünüh müphrate; thitü Pawa hi küüzewa nüh mowa phrate üta thi mowaküza üta nüh ma nüh azhü kütsü khehwie.

⁵⁰Thi ma nüh azhükütsüri tü küsuokürho ta küsa hi nüh thsüveh. Jükenüh hi nüh mowa küzaveh nüh Pawa nüh küza üta küsari wie,” ti küza.