Read Pochuri Naga JOHAN 13 Bible Online

JOHAN 13 - Pochuri Naga bible

JOHAN 13

¹Tsekükari akhu tüvü Jisu tü azhih hama sie porie taji Pawa vü tewanathuoh ta küsa ma tsothowa tekütse ma nüh thsü taji azhih hala ma küümzeri kümüze nü ma tü sehkhe wajutsü.

²Thi ashietsa peküvehvü Tsuore kümüsüwa nüh Judas, Iskariot, Simon atsa luoveh lovü ma zhutsana küsathsemütü.

³Jisu tü Pawa zanyo aveh ma ke vü thsemüthuoh ta küsa thi matü Saküüwuowa vünüh ru thi Saküüwuowa vüte wanathuoh ta küsa küthsüravü,

⁴ashietsaküveh vünüh süra nü ma thsümünyi küpavü phresamü taji künevühthsü küsü vi ma küshi tseke.

⁵Jütisanü ketsoku lovü ajuh thse nü ma sehnyira jih khrünü künevühthsü ma küshivü tseke küvehwa vi ma jihri netsü.

⁶Jüti sataji ma tü Simon Pitor vü ru, thinü Pitor nüh mavü, “VÜWA, noh tü eh jih khrü nti lo?” ti küza.

⁷Thinü Jisu nüh ma vü, “Hi nüh mowa saveh nüh nohri nü khinyi müthsüra, thitü thuohtü vünüh thsüra naveh,” ti rületsü.

⁸Pitor nüh ma vü, “Piketü noh eh jih küükhrü wanyu,” ti küza. Thinü Jisu nüh ma vü, “Mükütüküzü hi nüh noh rijih mükhrü thuoüji nohri tü eh sehnyiri nyuthuoh,” ti rüleküza.

⁹Simon Pitor nüh ma vü, “VÜWA, eh jih mpa nyu nü eh ke nga thi eh lü nga khrütü,” ti khuo.

¹⁰Thinü Jisu nüh ma vü, thari nüh ajuküzümüthuoh nüh mari thuoüji mükhrü ketünga azhümünyiethuoh, ma jihwie küchie nüh asatsa küpari thuoüji mütseveh, thi nohzhieri vü nyi küsü küchie nüh nohri küpari aveh nü mütse veh.

¹¹Küpakenühnyunü thawa nüh ma retsü na saveh nüh thsüküveh kenüh, jükenüh ma nüh, “Nohri azhie vü nyiküsü küchie nüh küpari aveh thuoüji mütseveh taküüza wie,” ti küza.

¹²Ma nüh mari ajih khrükhemü taji ma thsümünyi sahmü letaji sheleru ma pe vü peh le nü mari vü, “Hi nüh nohri vü mowa satsüthuoh nüh thsüveh ünü nyu lo?

¹³Nohri nüh hi tü Küsosiewa thi VÜWA ta jiveh, thi jümatü zhütsawiethuoh, küpakenühnyunü hi tü jüma wiethuoh küsa kenüh.

¹⁴Hi, nohri VÜWA, thi Küsosiewa nüh nohri jih khrü thuoüji nohri nga küsü nüh küsü jih kükhrü leh.

¹⁵Küpakenühnyunü hi nüh küsa kümüjie nohri nga sa üti hi nüh sakütsathuoh.

¹⁶Hi nüh nohri vü küzatoke naveh, siepewatü ma küsosiewa nyia vünüh müji, nyutü küruwa nüh küzaküüzewa nyia vü müji.

¹⁷Nohri nüh hamari thsü taji müzhe thuoüji kümüngatsah.

¹⁸“Hi nüh thari rüka saveh nüh thsüküveh kenüh nohri avehvü küza naveh, thawa nüh eh lohse tsanüh jüma nüh majih vi hi jü.

¹⁹Jüma müküjie vünüh hi nüh küütü nohri vü küzaveh, jüta thuoüji tsotho jüma ruju thuoüji hi tü jümata küsa thsüra naveh.

²⁰Hi nüh nohri vü küzatoke naveh, hi nüh küüzeri thari nüh sieke naveh nüh hi sieke wievehthuoh; thi thawa nüh hi siekeveh nüh hi küüzewa siekeveh,” ti küza.

²¹Jisu tü jüma küzakümü sevü ma müshe küraküpre tewa taji ma mpa ma povü sanü, “Hi nüh nohri vü küzatoke naveh, nohri nyi küsü nüh hi zhutsanaveh,” ti küza.

²²Thinü ma sehnyiri tü küsü nüh küsü no taji ma tü thawavü küzaveh nüh mari tü rüza.

²³Ma sehnyiri azhievü Jisu nüh külowa tü Jisu kütuotsatsavü peküveh kenüh ma vü küna üti küza.

²⁴Jükenüh Simon Pitor nüh ake nüh ma lahe taji müchieluo nüh ma ji nü jüma thawavü küzaveh nüh küna üti mavü küza.

²⁵Matü Jisu shenyi sheke nü peküveh kenüh ma vü, “VÜWAjümatü thawa lo?” ti küna.

²⁶Thinü Jisu nüh, “Hi nüh lohse zokhuo taji vi teh nü thawa tsü naveh nüh jümawiethuoh,” ti küza. Jüti sataji ma nüh lohse zokhuo nü vi teh taji Judas, Simon Iskariot atsa vü tsü.

²⁷Jütisanü lohse küzokhuo tsükümüsevü Tsuore malovü tetu. Jütisanü Jisu nüh ma vü, “Noh nüh mowa santi saveh nüh shiti saluo,” ti küza.

²⁸Thitü ashiekütsapevü peküvehri nyi küsü nga ma nüh ma vü mokenüh jüüta küzaveh nüh müthsü.

²⁹Thitü wuori nüh Judas tü rakaku viküveh kenüh Jisu nüh ma vü akhu vü kenüh hiri nüh müviji mükumühieri süluo, nyutü ma nüh zanyo vi kümükhuori tsü üta küzavehtü nti müshe.

³⁰Jüti sataji ma nüh lohse küzokhuowa vikümüsevü müküzhike wiethuoh nüh alievü tewa, jütiküsavü tü tsozomüthuoh.

³¹Judas alievü tewa ünü Jisu nüh, “Khinyi thuoüji nyi Tsawa tü küthola sanathuoh, thi ma vünüh Saküüwuowa nga küthola sanathuoh.

³²Saküüwuowa tü ma vünüh küthola sa thuoüji, Saküüwuowa nga ma vünüh ma küthola satsü naveh, thi shita satsü naveh.

³³ Kürünguori, hi tü tsotho pike mpa nohri sieküpewiethuoh. Nohri hi phah naveh, hi nüh Judahri vü küüza kümüjie nohri vü nga khinyi küzaveh, hi khiela wa naveh nüh nohri tü mürura.

³⁴Hi nüh azhükürüthe vi nohri vü tsüveh, tinü nohri kümüzeluo luo. Hi nüh nohri kümüze küru kümüjie nohri küsü nüh küsü kümüze luo.

³⁵Nohri küsü nüh küsü vü küümze peh luo, hakümjie küsa vünüh nohri tü eh sehnyiri ta küsa nyuri nüh thsü naveh,” ti küza.

³⁶Simon Pitor nüh ma vü, “VÜWA, noh tü khievü wa nti saveh lo?” ti küna. Thinü Jisu nüh ma vü, “Hi khievü wanaveh nüh khinyi thuoüji nohri eh se münyirathuoh, thitü thuohtü vünüh nyinaveh,” ti rüle küza.

³⁷Thitü Pitor nüh ma vü shele, “VÜWA, hi mokenüh khinyi noh se münyirana lo? Noh kenüh eh kürho nga tsü naveh,” ti rüle tsü.

³⁸Thitü Jisu nüh ma vü, “Noh tü eh kenüh no kürho tsüna la? Hi nüh no vü küzatoke naveh, noh nüh küchekeri hi müküürü sevünü awi kükhuwanyu,” ti rüle küza.