Read Pochuri Naga JOHAN 14 Bible Online

JOHAN 14 - Pochuri Naga bible

JOHAN 14

¹Nohri müshe müünomüna tümü nü Saküüwuowa tsotüluo, thi hi nga tsotüluo.

²Eh Pa zhe vü ape hozake peveh, jüüta mükünyu tüla hi nüh wa taji nohri ape küche naveh ta küüzawanyu.

³Hi nüh wa taji nohri pe küchera thuoüji shele ru nohri siewanathuoh, thi nohri nga eh küpehpe vü petewa nathuoh.

⁴Thi nohri nüh hi küwa lekhuji thsüveh, ti küza.

⁵Thomas nüh ma vü, “VÜWA, hiri tü no khievü wa na saveh nüh müthsü, hiri nüh khiela nüh lekhujiwa thsü na lo?” ti küza.

⁶Jisu nüh ma vü, “Hi thuoüji lekhujiwa, küzhütsawa, thi kürhowa, hi vünüh küchie nüh nyi küsü nga Pawa vü müwara.

⁷Nohri nüh hi thsü thuoüji, eh Pa nga thsü naveh, nosü vünüh tuvü nohri ma thsümüthuoh thi ma ngumüthuoh,” ti küza.

⁸Filip nüh ma vü, “VÜWA, Pawa vi hiri kütsaluo, jütathuoüji hiri tü lozhejura nathuoh,” ti khuo.

⁹Jisu nüh ma vü shele, “Hi nüh hathake nohri sietsethuoh, thi Filip noh tü hi müthsü la? Thari nüh hi ngumüthuoh nüh Pawa nga ngumüthuoh, jükenüh noh tü mokümjie Pawa vi hiri kütsamo ti khuoveh ülo?

¹⁰Hi tü Pawa vü peh thi Pawa nüh hi vü peh ti küsa mütsotü ülo? Azhü hi nüh küüzari tü hi mpa ehkükhra vünüh phratemüveh, thitü Pawa hi vü küpewa nüh ma küüro sa veh.

¹¹Hi tü Pawa vü peveh thi Pawa tü hi vü peveh ti küsa hi tsotüluo, nyutü küürori mpa kenüh wie nga tsotüluo.

¹²Hi nüh nohri vü küzatoke naveh, thawa nüh hi tsotüveh nüh hi nüh küüro küsa nyia vünüh küji ma nüh sanaveh, küpakenühnyunü hi tü Pawa vü tewa nathuoh.

¹³Tsawa vünüh Pawa tü küthola sana küsa kenüh nohri nüh momowa eh nyo vünüh khuo naveh nüh hi nüh satsü naveh.

¹⁴Nohri nüh eh nyo vünüh zanyo küsüküsü nga khuo thuoüji hi nüh jüma satsüwie naveh.

¹⁵“Nohri tü hi kümüze thuoüji hi nüh azhütsüküsari müzhe naveh.

¹⁶Thi hi nüh Pawa vü khuo taji küsuokürho nohri siepena küsa kenüh Luoveh saküürünyiwa küpa küze lenaveh.

¹⁷Jüma thuoüji Sietsewa, Saküüwuowa küzhütsa saküthsükütsüwa azhihwa nüh ma müküsierawa wiethuoh; küpakenühnyunü azhihwa tü ma müngu thi küthsü nga müküthsü kenüh, nohri thuoüji ma thsüveh, thi nohri vü nyipeveh, thi ma nüh nohri vü peh naveh.

¹⁸“Hi nüh nohri mpa ja nü küüzowanyu; hi nüh nohri vü runaveh.

¹⁹Thitü tsotho pike sevü azhihwa tü hi müngu nüh samünathuoh, thitü nohri hi ngu naveh; küpakenühnyunü hitü rho veh, thi nohri nga rho naveh.

²⁰Jüma rülo vü hi tü eh Pa vü peveh ta küsa nohri thsünaveh, thi nohri hi vü peh thi hi nüh nohri vü peh ti sanaveh.

²¹“Thawa nüh hi nüh azhükütsüri vi nü müzhe naveh nüh ma thuoüji hi kümüze veh; thawa nüh hi kümüze nüh eh Pa nüh ma kümüze naveh, thi hi nüh ma kümüze taji hi mpa hi ma vü kütsanaveh,” ti küza.

²²Judas (Iskariot mükünyuwa) nüh ma vü, “VÜWA, noh tü noh mpa nüh mokümjie hiri vü kütsa taji; azhihwa vünü mükütsanüh sana lo?” ti küna.

²³Jisu nüh ma vü, “Mükütüküzü nyi küsü nüh hi kümüze thuoüji ma tü eh zhü müzhe naveh, thi eh Pa nüh ma kümüze naveh, thi hisü tü ma vü ru taji ma sie nü hiri peh naveh.

²⁴Thawa nüh hi mükümüze nüh ma thuoüji eh zhüri müküna; thi nohri nüh künaküveh azhüwa tü eh zhü nyunü hi küüze Pawa zhüwie.

²⁵“Hi nüh nohri vü peküveh vünüh azhü hamari nohri vü küzaveh.

²⁶Thitü Luoveh sakürünyi Kümtse Sietse, Pawa nüh eh nyo vünüh küze na küsawa nüh zanyo aveh nohri sosie taji hi nüh nohri vü momowa küza nüh aveh saküümüshe naveh.

²⁷“Hi nüh nohri vü luoveh kürünyiwa sanaveh, eh luoveh kürünyiwa nohri vü tsü naveh, hi nüh nohri vü kütsüthuoüji azhihwa nüh kütsü kümüjie nyu. Nohri luoveh müzahtümü nyutü kükrü nga müsatümü.

²⁸Hi nüh, hi thuoüji tewanathuoh, thi hi nüh nohri vü ru naveh, ti hi nüh küüzawa nohri nüh thsürathuoh. Mükütüküzü nohri nüh hi kümüzeveh üji nohri lozhenaveh, küpakenühnyunü Pawa tü eh nyia vünüh jiveh thi hitü ma vü tewa nathuoh.

²⁹Thi zanyo jümari müjie küsa vünüh hi nüh nohri vü küzamüthuoh, jüta thuoüji jümari saküruvü nohri tü kütsotüra kümühie peküveh kenüh.

³⁰Nohri sie zanyo hozake jüle küzhike müpehrathuoh, küpakenühnyunü azhih hama takrüwa kütsethuoh kenüh. Mathuoüji eh nyia vü kükhra küsü nga münyie,

³¹thitü hi thuoüji eh Pa nüh azhü mowa tsü nüh jüma saküvehwie, jütathuoüji azhihwa nüh hi tü Pawa kümüzevehta thsüraveh. Süraluo, hiri hala nüh tewaluo nüh,” ti küza.