Read Pochuri Naga JOHAN 17 Bible Online

JOHAN 17 - Pochuri Naga bible

JOHAN 17

¹Jisu nüh azhü hamari küzakümü sevü ma nüh toke taji thajüwu vü no nü, “Eh Pa, tsotho jumthuoh, tinü Tsawa nüh noh saküüthola na küsa kenüh noh Tsa saküütholaluo.

²Noh nüh ma vü tsükümüri aveh vü küsuokürho tsüna küsa kenüh nyiri aveh nyia vü kükhra vi üta ma vü tsümüthuoh.

³Thi küsuokürho thuoüji no küzhütsa Saküüwuowa ta mari nüh thsüveh thi noh nüh küüzewa Jisu Khrista küthsüwa wiethuoh.

⁴Noh nüh küüro hi sa üta kütsüri saju taji azhih vü no sakütholathuoh.

⁵Thi eh Pa, azhih müjie küsa vü hi nüh noh sie kütholaküsawa vi khinyi noh tü vünüh hi saküthola luo.

⁶“Noh nüh nyiri azhih vünüh vi hi kütsüri vü hi nüh noh nyowa küzaküthola tsüthuoh mari tü noh zhi thi noh nüh mari vi hi tsüthuoh, thi mari tü noh zhü künaru wiethuoh.

⁷Thi noh nüh zanyo aveh vi hi kütsüri tü noh vünüh taküsa mari tü thsüveh.

⁸Küpakenühnyunü noh nüh azhü kütsüri aveh hi nüh marivü tsümüthuoh, thi mari nüh jümari vi mari azhisamütaji küzhütsa vünüh hi tü noh vünüh ru taküsa thsüvehthuoh; thi noh nüh hi küze ta küsa tsotü vehthuoh.

⁹“Hi tü makeri’a nüh khuoveh, hi tü azhihwa kenüh khuomüveh thitü noh nüh hi kütsüri kenüh khuoveh, küpakenühnyunü mari tü noh zhi.

¹⁰Eh zhi aveh noh zhi, thi noh zhi aveh eh zhi, thi hi tü marivünüh tholarathuoh.

¹¹Thi khinyi thuoüji hi tü azhih hala küpehwa nyuthuoh, thitü mari; thuoüji azhih vü pewie naveh, thi hi thuoüji noh vü terunathuoh. Kümtse Pawa, noh hisü nüh küsü küsakümüjie mari nga küsü küüsana küsa kenüh noh nüh hi kütsüri tü noh nyo vünüh rükieriewu peh luo.

¹²Hi nüh azhih vü mari sieküpe vü noh nüh hi kütsüri noh nyo vünüh rükie pehthuoh; zhütsazhüwa saju na küsakenüh kümiena küsawa küchie nüh mari nyi küsü nga mükümie nüh hi nüh mari huoruju wiethuoh.

¹³Thitü khinyi thuoüji hi tü noh vü tetsethuoh; mari lozhe nü mari vünüh saju na küsa kenüh hi nüh azhihwa vü hamari küzaveh.

¹⁴Hi nüh noh zhüri vi mari vü tsümüthuoh, thi azhihwa nüh mari mürhümüthuoh, küpakenühnyunü hi nüh azhihwa zhih mükünyu kümüjie mari nga azhihwa zhi nyu.

¹⁵Noh azhih vünüh mari vitemüwaji mümühie ti khuomüveh, thitü kümüsüwa vünüh mari rükie peh luo ti khuoveh.

¹⁶Hi nüh azhihwa zhi mükünyu kümüjie mari nga azhihwa zhinyu.

¹⁷Noh zhüwa tü zhütsa wiethuoh, tinü küzhütsawa vünüh mari sakümtse luo.

¹⁸Noh nüh hi azhih vü küüze kümüjie hi nga mari azhihvü küzeveh.

¹⁹Mari küzhütsa vünüh sakümtse na küsa kenüh mari kenüh hi tü sakümtsemüthuoh.

²⁰“Hi tü hamari kenüh mpa khuomüveh, thitü mari azhükenüh hi kütsotüri kenüh nga khuoveh.

²¹Küpakenühnyunü mari aveh küsü sa, thi eh Pa, noh nüh hivü peh, thi hi nüh noh vü peh, thi mari nüh hisü vüpeh, ti sa thuoüji noh nüh hi küze ta küsa azhihwa nüh thsü naveh.

²²Hisü nüh küsü küsa kümüjie mari nga küsü sana küsa kenüh noh nüh hi kütsü kütholawa hi nüh vimari tsümüthuoh.

²³Mari küsü sato na küsa kenüh hi nüh mari vü peh thi noh nüh hi vü peh luo, jütathuoüji noh nüh hi küze ta küsathi noh nüh hi küümze kümüjie mari nga kümüzevehta küsa thsü naveh.

²⁴“Eh Pa, noh nüh hi tsükümüri nga e kütholaküümze vünüh azhih hama müjie küsa vünüh hi kütsüwa mari tsü thi hi khiela peh naveh nüh mari nga jüla küüpe üti küsa eh kümüshe.

²⁵Halie, eh Pa künyitsawa, azhihwa thuoüji noh müthsü thitü hi thuoüji noh thsümüthuoh, thi noh nüh hi küzeta küsa hari vünüh thsüraveh.

²⁶Hi nüh mari noh nyowa küthsümüthuoh, thi noh nüh küümze vi küümzewa mari vü peh thi hi nüh marivü peh ti sana küsa kenüh hi nüh noh nyowa küthsüwienaveh,” ti küza.