Read Pochuri Naga JOHAN 18 Bible Online

JOHAN 18 - Pochuri Naga bible

JOHAN 18

¹Jisu nüh azhü hamari küzakümüsevü ma tü ma sehnyiri sie taji Kidron anyuo phari küsü küpeh vü tewa.

²Judas ma zhukütsawa nga azhie jüma thsüveh, küpakenühnyunü Jisu nüh ma sehnyiri hozakeri jüla nüh siekümütu kenüh.

³Jükenüh Judas tü arienyiri riekhuo küsü thi küjiriwuori levü küjiri thi Farisiri vünüh sie taji anyihku thi anyih küwiewa thi senyusevi vi taji jüla wa.

⁴Jütiküsavü Jisu tü ma vü sana küsari aveh thsü nü tse mari vü ru nü, “Nohri thawa phaveh lo?” ti küna.

⁵Mari nüh ma vü, “Jisu Nazareth phatse,” ti rüle küza. Thinü Jisu nüh mari vü, “Hi tü ma thuoh,” ti küza. Jüta küsavütü Judas ma zhukütsawa nga mari sie nü tsieveh.

⁶Hi tü ma thuoh ta ma nüh küüzavü mari tü asevütseketewa nü azhih vü küluzetewakhe.

⁷Shele ma nüh mari vü, “Nohri tü thawa phaveh lo?” ti künalehü. Thinü mari nüh ma vü, “Jisu Nazareth phatse,” ti rületsülehü.

⁸Jisu nüh mari vü shele, “Hi tü ma thuoh ti nohri vü küzathuoh, jükenüh mükütüküzü nohri nüh hi phatsethuoüji anyi hamari küzekhumü luo,” ti küza le.

⁹Hamatü ma nüh küüza azhü, “Noh nüh hi vü kütsüri küsü nga hi tü mükümie,” ta küsawa juna küsa kenüh wie.

¹⁰Thinü Simon Pitor tü anyu vi küveh kenüh shozhuru nü levü kümüsiewa siepe khüna taja mütü. Siepewa nyo tü Malkhas.

¹¹ Jisu nüh Pitor vü, “Noh nyusuowa suochi lovü thsemü leluo; hi tü Pawa nüh ahuo tsü küsawa müzhu nüh sanaveh lo?” ti küza.

¹²Jüti sanü Rom arienyiri kürefü küsü thi mari sierhüri thi Judahri sierhüri nüh Jisu re nü ma phehte.

¹³Apokhu sa mari nüh ma sie Ana vü wa, küpakenühnyunü matü Kaifa aku küsa kenüh, ma tü jüma mavi vü levü kümüsiewa saveh.

¹⁴Thi Kaifa jüma tü küsükeri Judah sierhüri siekürüchie nü nyi küsü nüh nyiri kenüh müsüji mümühie ta küsawa wiethuoh.

¹⁵Simon Pitor nga thi küpari nga Jisu nyi müzhewa. Sehnyi küpari tü levü kümüsiewa thsüküveh kenüh ma tü Jisu sie nü levü kümüsiewa nyula vü wa.

¹⁶Pitor tü anyula vü tsie peveh ünü sehnyi küpa levü kümüsiewa sie küthsüluowa nüh wa nü lepie kühuovühwa vü küza taji Pitor azhe lovü sieru.

¹⁷Lepie kühuovühwa nüh Pitor vü, “Noh nga Nyi hama sehnyiri küsü nyu ülo?” ti küna. Thinü ma nüh, “Hinü nyu,” ti rületsü.

¹⁸Sieperi thi küjiri tü anyihie tso nü küho peveh, küpakenühnyunü sokümü kenüh, mari nüh tsie nü anyihküho peküvehvü Pitor nga wa nü mari vü nyi tsienü küho peh.

¹⁹Jütiküsavü Levü Kümüsiewa nüh Jisu sehnyiri thi ma küsosie zhüri küna.

²⁰Jisu nüh ma vü, “Hi nüh müküthi nüh nyi küsüsüvü küzamüthuoh; hi tü tsotho aveh künazizhe vü thi Kükhurüzhe vü sosie huoru, jüvü Judahri aveh ru sehzhuzhuti, thi hi tü zanyo küsü nga küüthi vünüh müphrate rhuo.

²¹Nohri mokenüh hi künaveh lo? Thari nüh hi nüh küsosie küna nüh mari vü künaluo, hi nüh mowa küza nüh mari nüh thsü veh,” ti küza.

²²Ma nüh jüüti küza ünü küjiri nyi küsükütuovü tsie peküvehwa nüh ma müza nüh Jisu jetsünü, “Noh tü jükümjie Levü Kümüsiewa vü rületsü naveh lo?” ti sa.

²³Jisu nüh ma vü, “Hi nüh müküle vünüh phratemü thuoüji hi müküle vünüh müshemüsü luo, thitü hi nüh kümüsho vünüh küza saveh üji noh mokenüh hi jeveh lo?” ti küza.

²⁴Thinü Ana tü ma pheh taji Levü Kümüsiewa Kaifa vü küzemü.

²⁵Jütiküsavü Simon Pitor tü anyih küho peveh. Thinü mari nüh ma vü, “Noh nga ma sehnyiri küsü nyu ülo?” ti küna. Thitü ma nüh kürü taji, “Hi nü nyu,” ti küza.

²⁶Levü Kümüsiewa siepe küsü, Pitor nüh akhüna taja kümütüwa küshuküturi küsü nüh. “Noh tü masietse taji aphari vünüh hi nüh noh müngu ülo?” ti küna.

²⁷Thitü Pitor tü kürü lehü, thinü müküzhikewiethuoh nüh awi khuteru.

²⁸Jüti sataji mari tü rüne kümüto Kaifa azhe vünüh Jisu sie Kümükhrüwa zhe ashihküsape vü wa. Jütiküsavü tü arüne. Mari samükümüneh nüh Tsekükari akhu shie tsana küsa kenüh mari tü Kümükhrüwa azhe shihküsape lovü mütu.

²⁹Pilate tü anyula vü wa nü mari vü, “Nohri tü anyi hamavü mowa mükülo peveh lo?” ti küna.

³⁰Thinü mari nüh ma vü, “Mükütüküzü anyi hama tü zanyo kümüsü müküsari tüla hiri tü ma sieru noh vü kütsüwanyu,” ti rületsü.

³¹Pilate nüh mari vü, “Nohri mpa ma siewa taji nohri khonyo vünüh ma künaluo,” ti küza le. Judahri nüh ma vü, “Hiri nü nyi küsü nga zothe na küsa azhütsümüsa,” ti rüle küza le.

³²Hamatü Jisu nüh mowa sühle samüsüji mümühie nüh ta küsa azhü ma mpa nüh küüzawa ju naküsa kenüh wiethuoh.

³³Pilate tü kajiwa azhe ashiküsapevü tu le taji Jisu ji nü ma vü, “Noh tü Judahri Kajiwa wiethuoh ülo?” ti küna.

³⁴Jisu nüh ma vü, “Noh tü hama noh mpa noh kümüshe vünüh phrate veh ünü eh kürhowa nyuri nüh noh vü küza lo?” ti küna.

³⁵Pilate nüh ma vü, “Hi tü Judahri ülo? Noh mpa noh kuori thi noh levü küjiri mpa nüh noh re nü hi vü tsüküveh wie; noh tü mowa samü lo?” ti küza.

³⁶Jisu nüh ma vü, “Eh kükaji thuoüji azhih hala nyu; eh kükaji tü azhih hala tüla Judahri sierhüri kevü müthsenüh sana küsa kenüh eh sehnyiri nüh saluo na nü, thitü eh kükaji thuoüji azhih hala nüh nyu,” ti küza.

³⁷Pilate nüh ma vü, “Thinü noh tü kajiwa ülo?” ti künale. Jisu nüh ma vü küüza le, “Noh nüh küüza hi tü kajiri küsü ta. Hama kenüh hi tü wuo, thi hama kenüh küzhütsawa povü sana küsa kenüh azhih hala küru wie. Küsüküsü nga küzhütsawa zhi sakütseri thuoüji ehzhü künaveh,” ti rületsü le.

³⁸Pilate nüh ma vü, “Küzhütsawa tü mowa lo?” ti küna. Ma nüh hama küzakümüsevü Judahri vü wa le nü marivü, “Hi nüh müküle küsü nga münguralie,” ti küzale.

³⁹Thitü Tsekükari akhu vü hi nüh nyi küsü vi nohri kütsü nohri nüh sasati küsa kenüh, hi nüh Judahri Kajiwa vi nohri kütsü nohri müshe ünü nyu lo? ti küna.

⁴⁰Thinü mari tü zie le taji, “Anyi hama nyu, thitü Barabas vi hiri tsüluo,” ti khuo. Barabas hamatü rühukütsariküsü.