Read Pochuri Naga JOHAN 19 Bible Online

JOHAN 19 - Pochuri Naga bible

JOHAN 19

¹Jütisanü Pilate tü Jisu siewa nü fe tsü.

²Thinü arienyiri nüh rüzhü vi taji kaji lüwe kümüjie küsa küsü sanü ma lü rügivü thsetsü taji athsü kürüwuo küsü vi ma kümüphie;

³jütisanü ma vü ru taji, “Judahri Kajiwa kümühiewa saluo,” ti küza nü mari ake vi ma je tsü.

⁴Pilate alievü wa le nü mari vü, “Halie, hi tü ma vü müküle küsü nga mphara ta küsa nohri küüthsüna küsa kenüh hi nüh ma sie nohri vü tsethuoh,” ti küza.

⁵Jütisanü Jisu tü rüzhü nüh kaji lüwe kümüjieküsawa vü thi athsü küsümo müphie ti sanü shuhru. Thi Pilate nüh mari vü, “Halie, Nyiwa tü,” ti küza.

⁶Jütiküsavü levü küjiri thi rieh huori nüh ma ngu ünü, mari tü zie taji, “Ma zekemü luo, ma zekemü luo,” ti sa. Thinü Pilate nüh mari vü, “Nohri mpa ma siewa taji mazekemü luo, küpakenühnyunü hi nü ma vü müküleküsü nga mphara,” ti küza.

⁷Judahri nüh ma vü, “Hiri tü khonyo küsü peveh, thi matü khonyo jüma vünüh müsüji mümühie, küpakenühnyunü ma tü ma mpa nüh Saküüwuowa Tsa tasaküveh kenüh,” ti rületsü.

⁸Pilate nüh azhü hamari küthsüravü ma tü kümüsütsa krütewa.

⁹Ma tü shele kajiwa zheh shihküsape vü tule nü Jisu vü, “Noh tü khievü nüh ru lo?” ti küna le. Thitü Jisu nüh zanyoküsü nga rüle mütsü.

¹⁰Jükenüh Pilate nüh ma vü, “Noh tü hi vü azhümüküza thuoh lo? Noh tü hi nüh no küzelera na küsa thi no zekemü na küsa kükhra peveh ta küsa müthsü ülo?” ti küza.

¹¹Jisu nüh ma vü, “Rügi vünüh kükhra noh vü mükütsütüla noh tü eh nyia vü kükhra müpehra; jükenüh thawa nüh hi re nü noh vü tsü nüh jüma kükhiemuo küüji khe,” ti rüle küza.

¹²Hama kenüh Pilate tü ma küzemü nti küsa lekhuji phah, thitü Judahri nüh zie taji, mükütüküzü noh nüh anyi hama küzemü thuoüji noh tü Romri Kajiwa fü nyu thuoh, thawa nüh ma müpa kajiwa ta satse nüh jüma thuoüji Romri Kajiwa mükünongüwa wiethuoh! ti küza.

¹³Pilate nüh azhü hamari küünara vü, ma tü Jisu sie alievü wa nü ashihküsape anyo aloh nüh Küloju, Ebririvü thuoüji Gabatha ti küsavü küüshupe.

¹⁴Jüti küsavütü Tsekükari akhu kenüh küüche rülo münühu türo kümüjie küsavü. Ma nüh Judahri vü, “Halie, nohri Kajiwa,” ti küza.

¹⁵Thinü mari tü zie taji, “Ma sietewaluo, ma sietewaluo, mazekemü luo,” ti sa. Pilate nüh mari vü, “Hi nüh nohri kajiwa zekemü üti lo?” ti küna. Levü küjiri nüh, “Hiri nü Romri Kajiwa küchie nüh kaji küpa münyie,” ti rüle küza.

¹⁶Jütiküsavü ma zekemüluo üti ma nüh ma vi mari vü tsümü. Jüti sataji mari tü Jisu sie nü tewa.

¹⁷Thi ma tü ma khieluothso kha nü alürü ti küji azhie Ebriri zhü vünüh Golgotha ti küji vü tsezhu tewa.

¹⁸Jüti satajinü mari tü jüla nüh ma zekemü, thi nyiküpa künyi nga ma natonato vü zeke taji Jisu nüh azhila sanü zeke.

¹⁹Pilate nga lasikhu küsü rhü nü khieluothso rügivüthse; mazhünyo hakümjie: “Jisu Nazareth, Judahri Kajiwa,” ti rhükesa.

²⁰Judahri hozake wienga lasikhuh hama chie, küpakenühnyunü Jisu tü nyuküjiwa kütuovü küzeke kenüh; thi lasikhuh wa tü Ebriri zhü vünüh, thi Latin vünüh thi Greek vünüh rhü.

²¹Judahri levü küjiri nüh Pilate vü, Judahri Kajiwa ti mürhütümü nü Nyi hama nü küüza, “Hi thuoüji Judahri Kajiwa, ti küsa rhü luo,” ti küza.

²²Thitü Pilate nüh, “Hi nüh mowa rhümüthuoh nüh rhümüthuoh,” ti küza.

²³Arienyiri nüh Jisu zekekümü sevü mari tü ma thsü vinü küüsuo müzü sataji arienyiri küsü nüh küsüsü vi, thi ma satsaküüzhuvüh nga. Thitü ma satsaküüzhuvüh thuoüji ma küürüshu münyie luo, malü vünüh to ajih vü ju.

²⁴Jükenüh mari tü küsü nüh küsü vü, “Hiri hama nü müzokhri tü aküze sanü thawa vü wa naveh nüh saluo,” ti küza. Hamatü zhütsazhü: “Mari tü mari azhie vünüh eh thsümünyiri küsuomüthuoh, thi eh thsümünyi kenüh mari aküze sa,” ta rhüküsawa juna küsa kenüh wie.

²⁵Jükenüh arienyiri tü hama sa. Thi Jisu khieluothso kütuovü küperi thuoüji ma zah, thi ma zathsü, Clopa vüvüh Maria, thi Maria Magdalene ti tsieveh.

²⁶Jisu tü ma zah thi ma sehnyiri ma nüh küümzeri makütuo vü tsie küveh ngu ünü ma nüh ma za vü, “Nyimzawa, halie noh tsa,” ti küza.

²⁷Thinü ma nüh asehnyiwa vü nga, “Halie, noh za,” ti küza. Jütisanü jüma rülo vünüh asehnyiwa tü nyimzawasie wa nü ma mpa ma zhe vü peh tewa.

²⁸ Hamasevü Jisu zanyo aveh saju kümü thsü tajinü, (zhütsazhüwa ju na küsa kenüh) hi ajuküriemüthuoh, ti küza.

²⁹Jüla rheliviju küfü küji küsü küpro peveh; thinü mari nüh rheliviju müsüso lovü achieshu thse teke nü arheküüngu thso apruo küsü rügivü toke nü vikuo mapo lovü thse.

³⁰Thinü Jisu nüh rheliviju jüma müjezhu taji, “Jumthuoh” ti sanü ma lü zha ti tetsuo nü ma sietsewa jaküzemü.

³¹Jüma rülo tü küüche rülo sakümü kenüh, Sabbath ti küji Judahri kümünyierülo vü akümori khieluothso rügivü müsanüh sana küsa kenüh (küpakenühnyunü kümünyierülo jümatü rülo küji küsü küsakenüh), Judahri tü Pilate vü jümara jih reshi nü vitewanti khuo.

³²Jüti sataji arienyiri nüh ru nü apokhuwa jih kürhieshi thi ma sie nü wuochuwuovü zeke küsawa jih nga kürhieshimü.

³³Thitü mari tü Jisu vü ru ünü ma sükümü ngu nü ma jih thuoüji mükürhieshi.

³⁴Thitü arienyiri küsü nüh avi vi nü ma münyuo shüünü azü thi ajuh chu ti shuru.

³⁵Hama künguwa nüh povü satsü, ma povüwa tü azhütsa, ma tü zhütsa phrate ta küsa ma nüh thsü, küpakenühnyunü nohri nga küütsotü na küsa kenüh.

³⁶ Zhütsazhü, “Ma rü küsü nga küzokhuowanyu,” taküsawa ju na küsa kenüh hamari tü küsawie.

³⁷Jümasevü nga zhütsazhü küpa küsü nüh, “Thawa nüh avi vi ma münyuo shü nüh mari mpa nüh jüma noh naveh,” ta rhü sa veh.

³⁸Hamasevü Arimatheari Josef ti küjiwa Jisu ase künyiri küsü tü Judahri kükrü kenüh küthi nü Jisu kümowara küvi üti Pilate vü khuo, thinü Pilate nüh vi üti küza. Jüti sataji ma tü ru nü ma kümowa vitewa.

³⁹ Nikodema, rüza küsü ma vü küruwa nga, athsoju küüngu thi apraju kükha nahzi zhi mürüku küsü vi nü ru.

⁴⁰Jütisanü masü tü Jisu kümo vi Judahri nüh chowuwu ti küsa kümüjie zanyorhe küüngu thse nü alo külozünüh kütothsü vi ma küzhu.

⁴¹Azhie ma küzekepe vü aphari küsü peh, thi aphari lovü rüku kürüthe küsü nyi küsü nga müjie küchowu saküsü peh.

⁴²Thi Judahri akhu kenüh küüche rülo samü, thi arüku nga mületsuo ti küsa kenüh masü tü Jisu jüla chowumü.