Read Pochuri Naga JOHAN 2 Bible Online

JOHAN 2 - Pochuri Naga bible

JOHAN 2

¹Rülo kücheawa Galilee, Kana nyu vü kümünyute peh, thi Jisu aza tü jüla peh veh,

²thinü Jisu thi ma sehnyiri nga kümünyute jüla ji.

³Thinü akha zhukhehmüthuoh ünü Jisu aza nüh ma vü, “Mari tü akha münyiethuoh,” ti küza.

⁴Jisu nüh ma vü, “Halie nyimzawa, ehtsotho tü müjieju, tinü noh tü hi vü mowa sa nti lo?” ti küna.

⁵Thinü Jisu aza nüh sieperi vü, “Ma nüh momowa küzanaveh nüh künaluo,” ti küza.

⁶Jütiküsavü Judahri Khonyoh vünüh saküümütse kenüh ajuh mürüküfü küji lehuo müke chera kütura azhih füji türo jüla toke saveh.

⁷Jisu nüh mari vü, “Ajuh tieru afüji jüri küpro luo,” ti küza. Thinü mari tü tie müzhi nü aku küju khe.

⁸Jütiküsavü ma nüh mari vü, “Nohri tiewa avo saküvehritsüluo,” ti küza. Thinü mari tü tiewa mari tsü.

⁹Thi tsazhu peküveh vü avo küsari nüh ajuhwa mpo nono ünü akha jeteru, thitü jümatü sieperi wa ajuh kütieri nüh küthsüwie küchie nüh küpari nü müthsü nüh sa, jütiküsavü kütsazhu vü avo küsari nüh kümünyutepawa ji nü

¹⁰ma vü, “Nyuri nü akha kümühie nüh apo sa tsü taji nyiri müshekheh kümü sevü nüh kümüsütsütsüti, thitü noh nü khinyi nga akha kümühietsüwie veh,” ti küza.

¹¹Jisu nüh Galilee vü Kana anyu vünüh ma thsoshi apokhuwa sanü ma kütholawa küthsüküngu, thi ma sehnyiri tü ma tsotüra.

¹² Hamasevü ma tü ma za thi ma nüri thi ma sehnyiri sie taji Kapernaum vü wa nü jüla rülo pike petewa.

¹³Judahri Tsekükari akhuwa shenyiru ünü Jisu tü Jerusalem vü tewa.

¹⁴Thinü Kükhurüzhe vünüh nyuri nüh mieshürüli thi anyihzhü, thi mükhrietü zhu thi pesa müzhi nü asüküsala ma nüh ngu.

¹⁵Thinü ma nüh ali müla nü küfevüh sataji Kükhurüzhe vünüh anyihzhü thi mieshürüli aveh zhejamütü, thi raka müzhi küvehri raka müzhihjamütü thi mari raka küsape aveh khajamütü.

¹⁶Thi ma nüh mükhrietü zhuküvehri vü, “Nohri hamari vinü tewaluo, nohri eh Pa zhe vi nü asü müsara,” ti küza.

¹⁷Thinü ma sehnyiri tü, “Hi nüh noh zhe vü ehkürhoküthse kenüh hi tü kümiemü naveh,” ta zhütsazhü vü rhüküsawa müshekera.

¹⁸Jütiküsavü Judahri nüh ma vü, “Hakümjie küsakenüh noh tü mowa thsoshi sa hiri kütsanaveh lo?” ti küna.

¹⁹Jisu nüh mari vü, “Kükhurüzhe hama zoriemü luo, hi nüh rülo küche vünüh sakütokele naveh,” ti rületsü.

²⁰Judahri nüh ma vü, “Kükhurüzhe hama küsa mavi zürake nü türo vi, thi noh nüh jüma rülo küche vünüh sakütokele naveh ülo?” ti sa.

²¹Thitü ma nüh hama küüzatü ma mpa ma satsakükhurüzhewa phrate.

²²Jükenüh ma tü aküsü vünüh rholeküsüra vü masehnyiri tü hama küzalo ta küsawa müshekera, thi mari tü zhütsazhüwa thi Jisu nüh küüza zhüwa tsotü.

²³Tsekükari akhu tsotho vü ma tü Jerusalem vü peh, thi ma nüh thsoshi küsa küngu vünüh nyiri hozake ma nyo tsotü.

²⁴Thitü Jisu tü mari mütsotüra nüh samü. Küpakenühnyunü ma nüh nyiri aveh küthsü kenüh.

²⁵Thi nyi küsü nga nyiri povü müsaketünga zhümünyie taküsa thsü, thi jü mpa mükünyu ma tü nyiri lovü mowatü veh nüh küthsü kenüh.