Read Pochuri Naga JOHAN 20 Bible Online

JOHAN 20 - Pochuri Naga bible

JOHAN 20

¹Jüsevü Jüasekhe rüne thomütho vü Maria Magdalene tü müjiekütho vünüh rüku vü ru, thinü rüku vünüh alohwa tü küprija kümü ngura.

²Jükenüh ma tü zhü taji Simon Pitor, Jisu nüh külowavü thi sehnyi küpari vü wa taji, “Mari nüh rüku lovü nüh VÜWA vitewathuoh, thi viwa khiela samüthuoh nüh müthsüthuoh,” ti küza.

³Thinü Pitor tü sehnyi küpari sie nü rüku vü wa.

⁴Masükhürü zhüwa, thitü sehnyi küpawa nüh Pitor atüvü zhüwa rüku ju khu.

⁵Thi ma tü kükiewa alovü noküze ünü alo külohzü nüh kütothsüwa küpela ngu, thitü ma tü alo vünü mütu.

⁶Thinü Simon Pitor nga ma se nyi zhüru taji rüku vü tu ünü alo külohzü nüh kütothsüwa küpela ngu.

⁷Thi ma lü kütiethsüwa nga alo külohzü nüh kütothsüwa masü küpeküsüvü tuotsa tewa peh veh.

⁸Thi sehnyi küpawa ru rüku küju khuwa nga rüku lovü tunü ngu taji tsotü.

⁹Küpakenühnyunü masü tü ma rhomü süra lejimümühie ta küsa zhütsazhüwa müküthsü kenüh.

¹⁰Jüti sataji sehnyi künyi tü masü azhe vü tewa.

¹¹Thitü Maria tü alievü tsie nü krie peh, thi ma tü krie müngunü kükiatsuo rüku lovü no;

¹²thinü rügizhüleri künyi kümüji Jisu kümoküüzepe vü, küsü nüh alü vü thi küsü nüh ajih vü ti pela nü ngu.

¹³Masü nüh ma vü, “Nyimzawa, noh tü mokenüh krie veh lo?” ti küna. Thinü ma nüh masü vü, “Küpakenühnyunü mari nüh eh VÜWA vitewathuoh, thi mari nüh ma viwa khielasavehthuoh nüh hi tü müthsüthuoh,” ti rüle küza.

¹⁴Hama küza taji ma tü süle wa ünü Jisu ngu, thitü matü Jisu ti küsa müthsü nüh sa.

¹⁵Thinü Jisu nüh ma vü, “Nyimzawa, noh tü mokenüh krie vehlo? Thi noh tü thawa phaveh lo?” ti küna. Thinü ma nüh Jisu tü aphari kühuowa tü nti müshe taji ma vü, “Küjiwa, mükütüküzü noh nüh ma vitewasaveh üji viwa khiela savehthuoh nüh hi vü küzajie, jütathuoüji hi nüh ma vitewa naveh nüh,” ti küna.

¹⁶Jisu nüh ma vü, “Maria,” ti ji. Thinü ma tü süle ru taji Ebriri zhü vünüh, “Raboni,” mazhünyo, “Küsosiewa,” ti küza.

¹⁷Jisu nüh ma vü, “Hi müpatümüchi, küpakenühnyunü hi tü Pawa vü müjie kuo, thitü eh sehnyiri vü, hi thuoüji eh Pa thi nohri Pa, hi Saküüwuowa thi nohri Saküüwuowa vü tewanathuoh ti küza luo,” ti küza.

¹⁸Thinü Maria Magdalene nüh wa taji sehnyiri vü, “Hi nü VÜWAnguthuoh” ti küza, thi Jisu nüh ma vü momowa küza nüh jümari vi mari vü küza.

¹⁹Jütiküsavü Jüasekhe münüle vü Judahri sierhüri kükrü kenüh sehnyiri nüh peküvehwa azhe mükhietü khesaveh ünü Jisu tü turu nü mari azhie vü tsie tajinü mari vü, “Kümühiewa nohri vü peh luo,” ti küza.

²⁰Ma nüh hama küzamü nü ma müzari thi ma münyuokütsa. Thinü sehnyiri tü VÜWA ngu taji lozhe she.

²¹Jisu nüh mari vü shele, “Kümühiewa nohri vü peh luo. Pawa nüh hi küüze kümüjie hi nga nohri küzeveh,” ti küza.

²²Ma nüh hama küzakümü sevü ma nüh mari vü sahke taji mari vü, “Kümtse Sietsewa vi luo.

²³ Nohri nyura müküle noja thuoüji jümaritü noja müwiethuoh, thi nohri nüh nyura müküle nomüja nüh samüthuoüji jümari tü nomüja nüh samüwienathuoh,” ti küza.

²⁴Jütiküsavü Thomas, türakünyiri azhie vü küsü, Küwushie ti küjiwa tü Jisu küru vü mari vü nyipemüveh.

²⁵Jükenüh mari nüh ma vü, “Hiri thuoüji VÜWAngumüthuoh,” ti küza. Thitü ma nüh mari vü, “Hi nüh hi mpa ma ke amührüküzeke thsopo ngu thi e tüjü nüh mathsopo lo thse, thi eh ke nüh ma münyuo müküpa nü kütsotü wanyu,” ti küza.

²⁶Jüma se rülo tüze vü ma sehnyiri tü azhe jüla mükhie khe nü peh veh thi Thomas nga mari sie peh veh ünü Jisu tü turu mari azhie vü peh taji, “Kümühiewa nohri vü peh luo,” ti küza.

²⁷Jütiküsavü ma nüh Thomas vü, “Noh tüjü viru ehmüza pa noluo thi noh ke thsuoru eh münyuo pa no taji mükütsotü müsatümü taji tsotüluo,” ti küza.

²⁸Thomas nüh ma vü, “Eh VÜWA thi eh Saküüwuowa,” ti sa.

²⁹Jisu nüh ma vü “Thomas, noh tü hi küngu kenüh tsotümüthuoh ülo? Thari nüh münguwie ketünga tsotü veh nüh kümüngatsari,” ti küza.

³⁰Lasi halovü rhümüküsa ma sehnyiri atü vünüh Jisu nüh küükrükükra küüro küpa hozake nga sa.

³¹Thitü hamari rhü küsa thuoüji, Jisu tü Messiah ta küsa thi Saküüwuowa tsa ta küsa nohri nüh tsotü, thi nohri kütsotü ma vü küpeh vünüh nohri akürhowa ngura, ti sa nti küsa kenüh rhüküsawie.