Read Pochuri Naga JOHAN 3 Bible Online

JOHAN 3 - Pochuri Naga bible

JOHAN 3

¹Jütiküsa tsotho vü Nikodema ti küsa Judahri sierhüri küsü Farisiri azhie vü peh.

²Anyi hama tü rüza vünüh Jisu vü ru taji, “Rabbi, notü Saküüwuowa vünüh küru küsosieri küsü ta küsa hiri tü thsü veh, küpakenühnyunü Saküüwuowa nüh ma siemükütse nü nyi küsüwienga thsoshi hamari müsara,” ti küza.

³Thitü Jisu nüh ma vü, “Hi nüh noh vü küzatoke naveh, nyi küsü nüh wuomükürüthe le wie nü Saküüwuowa kajipe müngura,” ti rületsü.

⁴Nikodema nüh ma vü, “Nyi küsü nüh khruokümüsevü nüh moti wuolera naveh lo? Ma tü ma za volovü tule taji akünyiawa wuole naveh lo?” ti küna.

⁵Jisu nüh ma vü, “Hi nüh noh vü küzatoke naveh, nyiküsü nüh ajuh vünüh thi Sietse vünüh müküwuo asevü ma tü Saküüwuowa kükaji lovü mütura,” ti rületsü.

⁶Satsa vünüh küwuowa thuoüji satsa wiethuoh, thi Sietse vünüh küwuowa thuoüji Sietse vünüh wiethuoh.

⁷Hi nüh noh vü noh wuomükürütheji mümühie ti küüzake nüh noh müngotümü luo.

⁸Amürhü tü ma mpa ma müshe vü mürhü wawati, thi nohri nüh ma khi künararati, thitü khievü nüh ru veh nyutü khievü tewaveh nüh nohri tü müthsü, jükenüh anyiküsüküsü nga Sietse vünüh küwuori thuoüji jükümjie wiethuoh, ti küza.

⁹Nikodema nüh ma vü, “Khiela nüh hakümjie sara navehlo?” ti küna.

¹⁰Thinü Jisu nüh ma vü, “Noh tü Israelri küsosie küsü sataji hama müthsü ülo?

¹¹Hi nüh noh vü küzatoke naveh, hiri thuoüji hiri nüh küthsü künguwa povü sa veh, thitü nohri thuoüji hiri povü müvi ngü.

¹²Hi nüh nohri vü azhih zhü vi küüza wienga mütsotüji, hi nüh thajüwu zhü vi küzawie ketünga khiela nüh nohri tü tsotü naveh lo?

¹³Nyi Tsawa rügi vünüh küturuwa wieküchie nüh nyiküsü nga thajüwu rügivü müjie kuo,” ti küza.

¹⁴Mosa nüh reza vünüh müre amürü sawuowa nüh küsakükhroke kümüjie nyi Tsawa nga mükhrokeji mümühie,

¹⁵thi thari nüh ma tsotü naveh nüh jümari thuoüji küsuokürho kürhowa ngu naveh.

¹⁶Küpakenühnyunü Saküüwuowa[2] nüh azhihwa küümze kenüh ma Tsa küümzetsahwa küze, thi thari nüh matsotü naveh nüh mükümiera thitü küsuokürhowa ngunaveh.

¹⁷Saküüwuowa nüh Tsawa azhih hala küüze tü azhihwa müshemüsü nta küsa kenüh nyunü azhihwa tü mavünüh külole naküsa kenüh.

¹⁸Thari nüh ma tsotü naveh nüh müshekümüsüwanyu, thitü thari nüh mütsotü nüh jümari thuoüji müshemüsümüthuoh, küpakenühnyunü ma tü Saküüwuowa Tsa nyo mütsotü nüh sakümü kenüh.

¹⁹Thi müshekümüsü thuoüji hama: Küwiewa tü azhih vü ruthuoh, thitü nyiri nüh küwiewa nyia vünüh küzowaküülo samü, küpakenühnyunü mari küüro tü mükümühie kenüh.

²⁰Thari nüh mükümühie satse nüh mari thuoüji küwiewa mülo, thi mari küüro mümühie ta thama küüsa kenüh mari tü küwiewa vü müru.

²¹Thitü thari nüh küzhütsa küüro satse nüh mari thuoüji Saküüwuowa vünüh küüro mowa sara nüh küünguto na küsa kenüh küwiewa vü ru veh.

²²Hamasevü Jisu thi ma sehnyiri tü Judea azhih vü tewa; matü mari sie jüla petaji baptis tsü.

²³Thi Johan nga Salim küütuo Aenon vü ajuh hozake peküvehkenüh baptis tsü, thi nyiri ru khe taji baptis sa khe.

²⁴Jütsotho vü thuoüji Johan tü küsizhe lovü müjie rethse.

²⁵Jütiküsavü Johan sehnyi wuori nüh Judahri küsü sienü saküümütse zhünyo vi küproluo.

²⁶Thinü mari tü Johan vü ru taji, “Rabbi, Jordan rügutuwuovü khana no se nyitse nü noh nüh ma povü küsawatü havü ru nü nyuri baptis saveh thi nyiri aveh ma vü kuotewa khehthuoh,” ti küza.

²⁷Johan nüh, “Nyi küsü nga rügi vünüh mükütsü ase vünü zanyo küsü nga müngura.

²⁸ Hi tü Khrista nyu, thitü hi thuoüji ma tüvü küze ta küsa hi nüh küzathuoh, thi nohri mpa wienga eh povü sathuoh.

²⁹Thawa nüh kümünyutevühwa peveh nüh jüma thuoüji kümünyutepawa zhi wiethuoh, thi kümünyutepawa afüwa tü akütuovü tsie taji küna peküveh vü kümünyutepa wa jikhi kenüh lozhe shesheti; jükenüh eh loküzhewa tüjurathuoh.

³⁰Noh nü kümüsiemüsie müwawieji mümühie, thitü hi thuoüji kürünyierünyie müwaji mümühie,” ti küza.

³¹Thawa nüh rügi vünüh ru nüh jüma thuoüji aveh nyiawa wiethuoh; thi azhih vünüh küruwa thuoüji azhih zhi wiethuoh, thi ma tü azhih zhiri phrateteti; jükenüh thawa nüh rügivünüh ru nüh jüma thuoüji aveh nyiawa wiethuoh.

³²Ma nüh küngu thi küünarawa povü sasati, thitü nyiküsü nga ma povü müvi.

³³Thari nüh ma povü vi veh nüh jümari thuoüji Saküüwuowa nü zhütsa ta küsa thsoshi fekevüvüti.

³⁴Küpakenühnyunü Saküüwuowa nüh küüzewa thuoüji Saküüwuowa zhüri phrateteti, küpakenühnyunü ma tü müküte wiethuoh nüh Sietse tsüküveh kenüh.

³⁵Pawa nüh Tsawa kümüze veh, jükenüh zanyo aveh vi ma kevü thsemüthuoh.

³⁶Thari nüh Tsawa tsotü veh nüh ma thuoüji küsuokürho pevehthuoh thitü thari nüh Tsawa zhü müküna nüh ma thuoüji akürho müngura, thitü Saküüwuowa zhükha mavü petewaveh.