Read Pochuri Naga JOHAN 4 Bible Online

JOHAN 4 - Pochuri Naga bible

JOHAN 4

¹Jüsevü Jisu tü Johan nyia vünüh baptis küsa thi sehnyi phaküzhi tekütse Farisiri nüh thsüra ünü,

²(Jütawie ketünga Jisu nüh baptis müsanüh ma sehnyiri nüh küüsawie.)

³Ma tü Judea jamü taji Galilee vü tewa lehü.

⁴Jütiküsavü ma tü Samaria vehthuoh müwaji mümühie nüh samü

⁵Jükenüh ma tü tse Samariari azhih vü Sikhar ti küji Jacob nüh azhuh vi ma tsa Josef vü kütsüwa kütuo vüru.

⁶Thi jüla tü Jacob jukhre peveh, jütiküsavü Jisu tü aletse münokümüthuoh kenüh tsuo jukhre kütuovü shupe. Jütiküsa tsothovü münühu türo thuoh.

⁷Jütiküsavü Samariavühri küsü ajutie nti ru. Thinü Jisu nüh ma vü, “Hi nga ajuküzhujie,” ti khuo.

⁸Küpakenühnyunü jüma tsothovü tü ma sehnyiri tü kütsaküzhu sü nti nyuküji vü teküwa kenüh.

⁹Thinü Samariavühwa nüh ma vü, “Noh tü Judahri thi hi thuoüji Samariavühri tinü noh tü mokümjie aju raküzhu üti khuoveh lo? Küpakenühnyunü Judahri tü Samariari siezanyo küsü nga kütsarü münyie,” ti küza.

¹⁰Jisu nüh ma vü, “Noh tü Saküüwuowa nüh kütsü thi thawa nüh noh sie jüle nü aju vi hi küzhujie ta küsawa küthsü tüla noh tü ma vü zanyo khuo naveh thi ma nüh novü kürhojuhwa tsümühie veh,” ti rületsü.

¹¹Nyimzawa nüh ma vü, “Küjiwa, noh tü ahu nga münyie, thi ajuhkhre tü shemü, thinü noh tü khiela nüh kürhojuhjüma ngura naveh lo?

¹²Thi noh tü hiri vü juhkhre kütsüwa hiri pawa Jacob, ma mpa nga zhu thi ma tsari nga zhu thi ma samüwari nga zhu ti küsawa nyia vünüh jiveh ülo?” ti küna.

¹³Thinü Jisu nüh ma vü, “Thari nüh ajuh hama zhu naveh nüh kürie mülewie naveh,

¹⁴thitü hi nüh ajuh kütsüwa thari nüh zhu naveh nüh jümari thuoüji piketü mükürielera wiethuoh, thi hi nüh ajuh vi ma kütsüwa tü ma lo vünüh ajuwi shu taji ajukhre sa küsuokürho petewa nathuoh,” ti küza.

¹⁵Thinü nyimzawa nüh ma vü, “Küjiwa, hi tü ajuh mükürie nüh sana küsa kenüh thi ru hala nüh mütie nüh sana küsa kenüh ajuh jüma hi tsü jie,” ti khuo.

¹⁶Thitü Jisu nüh ma vü, “Wa taji no vüpa ji hala ru luo,” ti küza.

¹⁷Thinü nyimzawa nüh ma vü, “Hi tü eh vüpa münyie luo,” ti rületsü, Jisu nüh ma vü, “Noh nüh noh vüpa münyie ta küsa azhütsa.

¹⁸Küpakenühnyunü noh tü vüpa münga pemüthuoh, thi khinyi noh nüh nyirho küvehwa nga noh vüpa tsah nyu, noh nüh hi vü küüza tü zhütsa vünüh küzathuoh,” ti küza.

¹⁹Nyimzawa nüh ma vü, küjiwa, noh tü setsaküthsüri küsü ta küsa hi nüh thsürathuoh.

²⁰Hiri pari thuoüji küzhiho hama rügi vünüh khurü ru, thitü noh nüh küüza anyiri nüh mükhurüji mükümühie azhie thuoüji Jerusalem ti ta.

²¹Jisu nüh ma vü, “Nyimzawa noh hi tsotü luo, nohri küzhiho hala nüh nga thi Jerusalem vünüh nga Pawa mükükhurü tsotho tsethuoh.

²²Nohri thuoüji nohri nüh khurü küvehwa müthsü, thitü hiri thuoüji hiri nüh küthsüwa khurüveh, küpakenühnyunü küülole tü Judahri vünüh küru kenüh.

²³Thitü küzhütsa vünüh kükhrurüri thuoüji sietse vünüh thi zhütsa vünüh Pawa kükhurü tsotho tsethuoh, thi khinyi nga ru pevehthuoh; küpakenühnyunü jüütakükhurü Pawa tü phakütse kenüh.

²⁴Saküüwuowa tü sietse, thi ma kükhurüri thuoüji sietse thi küzhütsa vünüh mükhurüji mümühie,” ti küza.

²⁵Thinü nyimzawa nüh ma vü, “Hi nüh thsüvehthuoh, Messiah tü tetsethuoh; thi ma ru thuoüji ma nüh zanyo aveh vi hiri kütsanaveh,” ti küza.

²⁶Jisu nüh ma vü, “Hi noh sie kürüchie küpewa tü jümathuoh,” ti küza.

²⁷Jütisapeküvehvü kheti ma sehnyiri sheleru nü ma nüh nyimzawa siekürüchie küveh ngu taji mari ngo; thitü nyiküsü nga ma vü, “Noh tü mowa müngu veh lo? Nyutü notü mokenüh nyimzawa sie kürüchie veh lo?” ti nga müküna wie.

²⁸Jütiküsavü nyimzawa tü ma süzah jamü taji anyuküjivü tewa nü nyiri vü küza,

²⁹“Ra nü hi nüh momowa sanüh jüri aveh küzakütsü anyiwa noluo. Hamatü Khristawa wiethuoh ünü mota nüh,” ti küza.

³⁰Thinü mari tü nyuküji vünüh tse ma vü ru.

³¹Jütiküsavü ma sehnyiri tü ma vü, “Küsosiewa, ashietsaluo,” ti küza.

³²Thitü ma nüh mari vü, “Hi thuoüji nohri nüh müküthsüwa shie kütsa peveh,” ti rületsü.

³³Thinü ma sehnyiri tü küsü nüh küsü jüle nü, “Anyi wuori nüh ashie viru ma tsüthuoh ünü?” ti sa.

³⁴Jisu nüh mari vü, “Eh shie thuoüji hi küüzewa kümüshesa thi ma küürowa sajutsü nta küsawa wiethuoh,” ti küza.

³⁵Nohri tü, mahwie naküsa asah müzü pehüveh ta müsa ülo? Hi nüh nohri vü küza naveh, azhuhwa tü nemühie shetaji mahwie mühiepevehthuoh ta küsa nohri notha toke nü noluo.

³⁶Kümahwieri tü kümülie ngunguti thi küsuokürho kenüh avi phazhuzhuti, jütathuoüji aküzhuhwa thi kümahwiewa masü kürü lozhe naveh.

³⁷Thi nyi küsü nüh amahtsü zhuh thi nyi küsü nüh mahwie ti küsa azhüwa tü zhütsawiethuoh.

³⁸Nohri nüh küromüküsari vü mahwie üti hi nüh nohri küze veh, nyuri nüh küro küsape vü hi nüh nohri küüze wie, ti küza.

³⁹“Hi nüh küsari aveh ma nüh küzazhukheh,” ta nyimzawa nüh povü küsa vünüh Samariari hozake nyuküji jüla ma tsotüra.

⁴⁰Jütiküsavü Samariari nüh Jisu vü ru taji mari siepe üti kükhuovü ma tü rülo künyi mari siepetewa.

⁴¹Thi ma zhü kenüh nyiri hozake ma tsotüra lehü.

⁴²Jütiküsavü mari nüh nyimzawa vü, “Khinyi thuoüji hiri tü noh zhü vünüh kütsotü mpa nyuthuohnü hiri mpa hiri khüna vünüh künarathuoh, thi hama tü azhih Küülolewa wiethuoh ta küsa hiri nüh thsürathuoh,” ti küza.

⁴³Rülo künyi sevü Jisu tü Galilee vü tewa.

⁴⁴ Küpakenühnyunü “Setsaküthsüri tü ma mpa ma nyu vünü küsiake münyie,” ta Jisu ma mpa nüh küüzakenüh.

⁴⁵ Jütisanü ma tü Galilee vü ru ünü ma nüh Jerusalem vü akhu tsothovü zanyo küsari aveh küngu kenüh Galileeri tü lozhe nü ma sieke, küpakenühnyunü mari nga akhu jüla küwa kenüh.

⁴⁶Thinü ma nüh ajuh vünüh akha saküüje azhie Galilee vü anyu Kana ti küsa vü shele ru. Jütiküsavü Kapernaum vü sierhüri küsü atsa nyimpari küsü nanü zepeveh.

⁴⁷Thinü ma tü Jisu Judea vünüh Galilee vü tse ta küsathsü ünü ma tü wa taji Jisu vü tsuo ma tsa sakümühietsü üti khuo, küpakenühnyunü süna küsavü peküvehthuoh kenüh.

⁴⁸Jütiküsavü Jisu nüh ma vü, “Nohri tü athsoshiri thi küngori künguwie küchie nüh nohri tü nyi küsü nga mütsotü nta,” ti küza.

⁴⁹Thinü sierhüwa nüh ma vü, “Küjiwa, eh tsa müjieküsü vünüh tse turu jie,” ti khuo.

⁵⁰Thinü Jisu nüh ma vü, “Waluo, noh tsa tü mühierawienaveh,” ti küza. Thinü ma tü Jisu nüh zhüküüzawa tsotü taji tewa.

⁵¹Jütisanü kuotsewa ünü ma sieperi tü ru ma mütu taji, “Noh tsa mühievehthuoh,” ti küza.

⁵²Thinü ma nüh mari vü, “Khiema tsothovü nüh mühieteruthuoh lo?” ti küna. Thinü mari nüh ma vü, “Luonyi münühu türü vünüh mümühi nüh letewathuoh,” ti rületsü.

⁵³Thinü ma pa tü Jisu nüh jüma tsothovü, “Noh tsa tü mühierawie naveh,” ta küsa tsothowa thsüra nü ma nga thi ma zhelori aveh nga tsotüra kheh.

⁵⁴Hamatü Jisu nüh Judea azhih vünüh Galilee vü ru nü thsoshi küsa künyiawa.