Read Pochuri Naga JOHAN 6 Bible Online

JOHAN 6 - Pochuri Naga bible

JOHAN 6

¹Hamasevü Jisu tü Tiberias juküji ti küsa Galilee juhküji nato wuovü tewa.

²Jütiküsavü anyi riekhuo küji küsü ma se nyitewa, küpakenühnyunü mari tü ma nüh künari nyia vü thsoshiküsari küngu kenüh.

³Jisu tü ma sehnyiri sie taji wa küzhiho rügivü shupe.

⁴Jütiküsavü Tsekükari Judahri khuwa shenyi teru.

⁵Thinü Jisu nüh toke nü noküüzevü anyi shieji küsüma vü kütse ngu nü Filip vü, “Khiela nüh hiri tü lohse sü nü anyi hamari küütsanathuoh lo?” ti küna.

⁶Hamatü ma nüh Filip kümütewie, küpakenühnyunü ma nüh mowa sanaveh nüh ma mpa thsüküveh kenüh.

⁷Filip nüh ma vü, “Nyi küsüsü vü pipi küta mpa wienga tuli müza künyi mpa mütsera,” ti rületsü.

⁸Thinü ma sehnyiri küsü, Simon Pitor anü Andrew nüh mavü,

⁹“Halie vizari küsü nüh ahie nüh kürü lohse münga thi anga künyi vü tseveh, thitü nyiri hazake vü hampa nüh mowa sana lo?” ti küza.

¹⁰Jüla aphrato pekhe küveh kenüh Jisu nüh mari vü, “Mari shuküüpe khe luo,” ti küza. Thinü nyiri tü ajiejie vünüh shupe taji nyi anyie münga kümüjie shupe.

¹¹Jüti sataji Jisu nüh alohseri vi nü kütsia tsü kümüsevü, külieluo sehnyiri vü tsü nü sehnyiri nüh shupeküvehri vü suotsü khe, jükümjie anga nga küsuotsü nü kütsa, jütisanü mari Kütsangü zake kütsa.

¹²Thi mari tsamüwa kümüsevü, ma nüh ma sehnyiri vü, “Küsü nga mükümie nüh sana küsa kenüh tsatuküjari aveh khuzhu luo,” ti küza.

¹³Thinü mari nüh alohse münga tsa taji kütsatu amahse khuotürakünyi phaküprora.

¹⁴Jütiküsavü ma nüh athsoshi küsa nyiri nüh ngu taji mari nüh, “Anyi hamatü setsaküthsüwa azhih vü ru nata küsawa tsah wiethuoh,” ti sa.

¹⁵Jütiküsavü nyiri nüh ru wurie ma re taji kaji küsana küsa thsü nü ma mpa tse khaphrüle küzhiho vü tewa.

¹⁶Münüle teru ünü ma sehnyiri tü juhküji vü tetsuo.

¹⁷Jütisanü juhie lovü tu tajinü hie juhküji Kapernaum wuovü tewa. Jütiküsavü atsozo müthuohtü Jisu tü marivü müru wie nüh sa.

¹⁸Thi mürhü khieloti kümürhü kenüh juhküshütewa.

¹⁹Mari juhiewa hie taji mile küche müzü kümüjie tewanü Jisu tü juhküji nyia vünüh tse juhie shenyi ru, thinü mari tü krü sheke.

²⁰Thitü ma nüh mari vü, “Hi wie thuoh tinü mükrütümü luo,” ti küza.

²¹Jütiküsavü mari tü lozhe she taji juhie lovü masiethse, thinü küsuomüwa nüh mari juhiewa tü mari nüh wa nti kütse azhie vü jura.

²²Rülo jüma nyia juhküji wuochuwuovü peküvehri nüh juhieküsü mpa ngu, thi Jisu tü ma sehnyiri sie nü juhie lovümütu nüh sehnyiri mpa kuoküwa ngu.

²³Juhie küpari Tiberias vünüh küruri thuoüji VÜWA nüh lohse nyia vü tsiatsü taji nyi shiejiwa nüh kütsa azhiejuküji nato vü ru.

²⁴Jükenüh nyiri nüh Jisu thi ma sehnyiri jüla pemüküvehngu ünü mari tü juhie lovü tu taji Kapernaum vü Jisu phawa.

²⁵Jüti sataji mari nüh juhküji wuochuwuo vünüh maküngura vü mari nüh ma vü, “Küsosiewa, noh tü küsiehala teru thuoh lo?” ti küna.

²⁶Jisu nüh mari vü, “Hi nüh nohri vü küzatoke naveh, nohri nüh hi phakütsetü thsoshi küngu kenüh nyu, thitü lohse tsa taji nohri kümüwa küsara kenüh wie.

²⁷Ramüna küsa kütsaküzhu kenüh mükürotümü, thitü nyi Tsawa nüh tsüna küsa küsuokürho küwawa kenüh küro luo, küpakenühnyunü Saküüwuowa Pawa nüh ma vü thsoshikhu fekekümüthuoh kenüh,” ti küza.

²⁸Thinü mari nüh ma vü, “Saküüwuowa küürori sapehuona küsa kenüh hiri tü mowa müsaji mümühie lo?” ti küna.

²⁹Jisu nüh mari vü, “Saküüwuowa küüro thuoüji, ma nüh thawa küze nüh nohri jüma tsotüluo,” ti rületsü.

³⁰Jütiküsavü mari nüh ma vü, “Noh tü hiri nüh ngu taji no tsotü na küsa thsoshi mowa sana lo? Noh tü mowa sana lo?

³¹Ma nüh rügi vünüh lohse tsü mari küütsa ta Zhütsazhü vü rhüküsa kümüjie hiri lahnyiri tü reza vünüh manna tsa,” ti küza.

³²Thinü Jisu nüh mari vü, “Hi nüh zhütsa vünüh nohrivü küzatoke naveh, thajüwu vünüh lohse kütsüwa tü Mosa nüh nyu, thitü eh Pa nüh thajüwu vünüh zhütsa lohsewa tsü.

³³Küpakenühnyunü Saküüwuowa lohse tü thajüwu vünüh turu taji azhihwa vü akürho tsüveh,” ti küza.

³⁴Thinü mari nüh ma vü, “VÜWA tsotho aveh vü lohse hama hiri vü tsüluo,” ti khuo.

³⁵Jisu nüh mari vü, “Hi thuoüji kürho lohsewa, thari nüh hivü ru naveh nüh jümari thuoüji kürümawanyu, thi thari nüh hi tsotüveh nüh jümari thuoüji küüriewanyu,” ti küza.

³⁶Thitü hi nüh nohri vü küza naveh, “Nohri tü hi ngumüthuoh tü mütsotü.

³⁷Avehveh eh Pa nüh hi kütsüthuoüji hi vü rukheh naveh; thi thari nüh hi vü ru naveh nüh jümari thuoüji hi nüh küja wanyu.

³⁸Küpakenühnyunü hi tü thajüwu vünüh turu, thi hi mpa eh kümüshe sa nti nyunü thawa nüh hi küze nüh jüma kümüshe sa nti ru.

³⁹Thi hi küüzewa kümüshe thuoüji, ma nüh momowa hi tsüsaveh nüh küsü nga mükümie nüh sehkhe rülo vü saküüsüra ma kümüshe.

⁴⁰Küpakenühnyunü thari nüh Tsawa ngu taji ma tsotü naveh nüh küsuokürho peh thi sehkhe rülovü hi nüh maviküüsüra eh Pa kümüshe,” ti küza.

⁴¹Jütiküsavü Judahri tü ma vü jakhujazhi, küpakenühnyunü ma nüh, “Hi thuoüji thajüwu vünüh küru lohsewa wiethuoh,” ti küüza kenüh.

⁴²Thinü mari nüh, hama tü Josef tsa Jisu hiri nüh ma pa ma za thsüküvehwa nyu ülo? Thinü ma tü, “Hi nüh thajüwu vünüh küturuwa wiethuoh” ta küsa phrate veh lo? ti sa.

⁴³Jisu mari vü, nohri mpa nohri azhie vünüh müjakhujazhitümü.

⁴⁴Pawa hi küüzewa nüh ma müküshoh nü nyi küsü nga hivü mürura thi sehkhe rülovü hi nüh ma vimüküüsüra ra.

⁴⁵ Setsaküthsüri lasi vü, “Thi mari aveh Saküüwuowa nüh sosie naveh,” thawa nüh Pawa zhü künaveh nüh thi ma vünüh zanyo thsüra na nüh hi vü ru veh ta rhü saveh.

⁴⁶Saküüwuowa vünüh küruwa wieküchie nüh nyi küsünga Pawa müjie ngu, ma thuoüji Pawa ngumüthuoh.

⁴⁷Hi nüh nohri vü küzatoke naveh, thari nüh hi tsotüveh nüh mari thuoüji küsuokürho akürhowa pemüthuoh.

⁴⁸Hi thuoüji kürho lohsewa wiethuoh.

⁴⁹Nohri lahnyiri tü reza vünüh manna tsa taji sütewa khethuoh.

⁵⁰Hama thuoüji thajüwu vünüh küturu lohsewa wiethuoh, nyiküsüküsü nga jüma kütsari thuoüji küsüwanyu.

⁵¹Hi thuoüji thajüwu vünüh küturu kürho lohsewa wiethuoh, nyi thawa nüh lohse hama tsanaveh nüh ma thuoüji küsuokürho rho naveh; thi lohse akürho kenüh hi nüh azhihwa vü kütsüwa thuoüji eh satsa wiethuoh, ti küza.

⁵²Jütiküsavü Judahri tü mari mpa mari azhie vünüh küproluozhuteru taji, “Mokümüjie nyi hamatü ma satsa vihiri kütsara naveh lo?” ti sa.

⁵³Thinü Jisu nüh mari vü, “Hi nüh nohri vü küzatokenaveh, nohri tü nyi Tsawa satsa tsa thi ma züh müküzhu wienü nohri vü akürho müpehra.

⁵⁴Thari nüh eh satse tsa thi eh züh zhu naveh nüh küsuokürhopera naveh, thi sehkhe rülovü hi nüh ma vi küsüra naveh.

⁵⁵Küpakenühnyunü eh sa thuoüji ashie küsa kenüh, thi eh züh thuoüji küzhuvüh küsa kenüh.

⁵⁶Thari nüh eh satsa thi e züh zhuveh nüh hi vü pevehthuoh, thi hi nga ma vü pevehthuoh.

⁵⁷Rhopeküveh Pawa nüh hi küüze kümüjie, thi eh Pa kenüh hi tü rhopeküveh kümüjie thari nüh hi tsanaveh nüh ehkenüh ma tü rho naveh.

⁵⁸Lohse hamatü thajüwu vünüh küturuwa wiethuoh, khanavü lahnyiri nüh tsa taji süteküwa kümüjie nyu, thari nüh lohse hama tsanaveh nüh küsuokürho rho naveh,” ti küza.

⁵⁹Hamatü ma nüh Kapernaum vü küsosie vü nazizheh vünüh küza.

⁶⁰Ma se nyi taji kütse anyi hozake wienga jüma küthsüravü, “Hamatü azhü kükho küsü, tinü thawa nüh jüma künara naveh lo?” ti sa.

⁶¹Thitü Jisu ma mpa nüh ma sehnyiri tü jazhi küveh thsüra taji mari vü, azhü hama kenüh nohri lokhu nti ülo?

⁶²Thinü nyi Tsawa khanavü ma küpehpe vü kuotekükuo ngu thuoüji nohri tü moti sana lo?

⁶³Sietse nüh akürho tsüveh, satsa thuoüji zanyoküsü nga samütsüra, hi nüh nohri vü azhü phrakütseri; thuoüji sietse thi akürho.

⁶⁴Thitü nohri azhie vü wuori thuoüji mütsotü. Küpakenühnyunü thari nüh mütsotü nüh Jisu nüh atükhu vünüh thsükümüthuoh kenüh, thi thawa nüh mare tsü naveh nüh ma nüh thsü veh.

⁶⁵Thinü ma nüh, küzale taji, “Hama kenüh Pawa nüh müküthsü nü hi vü mürura ta küsa hi nüh nohri vü küzamüthuoh,” ti küza.

⁶⁶Jütiküsa sevü thuoüji ma senyikütseri tü asevü tseketewa nü ma se münyi nüh satewa.

⁶⁷Thinü Jisu nüh türakünyiri vü, “Nohri nga tewa nthe ülo?” ti küna.

⁶⁸ Simon Pitor nüh ma vü, “VÜWA, noh tü küsuokürhozhüri pevehthuoh, tinü hiri tü thawa vü wa na lo?

⁶⁹Noh tü Saküüwuowa Kümtsewa ta hiri tü tsotümüthuoh thi thsümüthuoh,” ti küza.

⁷⁰Jisu nüh mari vü, “Hi nüh nohri türakünyiri mürüka ülo? Thitü nohri nyi küsü thuoüji mümühie,” ti küza.

⁷¹Hamatü ma nüh Judas, Simon Iskariot tsa küphratewa, küpakenühnyunü türakünyiri azhie vü nyi küsü nüh ma retsü nasaküveh kenüh.