Read Pochuri Naga JOHAN 7 Bible Online

JOHAN 7 - Pochuri Naga bible

JOHAN 7

¹Hama sevü Jisu tü Judea zhih vü müwa nüh Galilee vü tewa, küpakenühnyunü Judahri sierhüri nüh ma fethe nta saküveh kenüh.

² Jütiküsavü Judahri Aphrü Khuwa tü shenyi teru.

³Jükenüh ma nüri nüh ma vü, “Azhie hama jamü taji Judea vü tewaluo, jütathuoüji noh nüh küüro saküvehwatü no sehnyiri nüh ngu naveh.

⁴Küpakenühnyunü nyuri nüh küüthsü nta thuoüji nyiküsü nga küthi nü müküro. Noh nüh hamari küro tsethuoüji noh mpa azhihwa vü kütsaluo,” ti küza.

⁵Küpakenühnyunü ma nüri wie nga ma mütsotü nüh samü.

⁶Jisu nüh mari vü, “Eh tsotho nü müjie, thitü nohri tsotho nü jupehuoveh,” ti rületsü.

⁷Azhihwa tü nohri kümürhü wanyu, thitü hi vü mürhüveh, küpakenühnyunü ma küüro thuoüji mümühieta küsa hi nüh povü saküveh kenüh.

⁸Akhu vü nohri mpa waluo, hi thuoüji küwa wanyu, küpakenühnyunü e tsotho thuoüji müjie küju she kenüh, ti küza.

⁹Jüti küza taji ma tü Galilee vü petewa.

¹⁰Thinü ma nüri akhu vü teküwa sevü nüh ma nga wa, thitü nyiri küüthsü vünüh nyunü küüzhevünüh wa.

¹¹Thinü Judahri sierhüri tü akhu vü ma phah taji, “Ma tü khiela peveh nüh,” ti sa.

¹²Jütiküsavü nyiri azhie vü küüzhe vünüh khieloti ma phrate. Wuori nüh, “Ma tü nyi kümühie,” ta, thi wuori nüh, “Ma thuoüji nyiri mürakütsewie,” ti sa.

¹³Thitü Judahri sierhüri kükrü kenüh ma khuke alievü müphrazhu.

¹⁴Jütiküsavü akhu küzhila kümüjie küsavü Jisu tü Kükhurüzhe vü wa nü nyuri sosie.

¹⁵Thinü Judahri tü ngo tajinü, “Anyi hamatü zanyoküsü nga müchie nüh mokümjie thsüra lo?” tisa.

¹⁶Jükenüh Jisu nüh mari vü, “Hi nüh vi sosieküvehri tü eh zhü nyu, thitü hi küüzewa zhü wie.

¹⁷Nyi küsüküsü nga ma müshewa tü ma külo sangüvehüji küsosiezhü hamatü Saküüwuowa vünüh ünü hi mpa eh kükhra vünüh ünüh thsüra naveh.

¹⁸Thawa nüh ma mpa ma kümühie vünüh phrateveh nüh mathuoüji ma mpa ma kümühie phatseveh; thitü thawa nüh maküüzewa kümühie phatse nüh zhütsawa wiethuoh, thi make vü thuoüji küzhüjah münyie.

¹⁹Mosa nüh nohri vü Khonyowa mütsü ülo? Thitü nohri nyiküsü wienga Khonyo jüri mümüzhe. Nohri tü mokenüh hi fethe nti phah veh lo?” ti rületsü.

²⁰Nyiri nüh ma vü, “Noh tü sietse kümüsüwa no vüpeveh! Thawa nüh no fethe nti phah veh lo?” ti rületsü.

²¹Jisu nüh mari vü, “Hi nüh küngo küüro küsü sa, thinü nohri aveh tü jüma kenüh ngo kheh,” ti rületsü.

²²Mosa nüh ahukürhe tsü, (Jümatü Mosa vünüh nyu thitü lahnyiri vünüh tsü); thi nohri nüh Kümünyierülo vü atsavizari ahu rhe.

²³Mosa Khonyowa müzokhuo nta küsa kenüh kümünyierülo vü nyimpari tü ahukürhe sa thuoh üji, kümünyierülo vü hi nüh nyiri küsü sakümühieju kütsü kenüh hi vü arüshuthe lo?

²⁴Atso alievü no taji kümüsü mühie müretümü thitü zhütsa vünüh münoji mümühie.

²⁵Jükenüh Jerusalem anyi wuori nüh, “Nyi hamatü Judahri sierhüri nüh fethe nta phakütsewa nyu ülo?

²⁶Thi ma tü hala nüh münyishithuoh nüh azhü phra peveh, thi nyi küsü nga ma vü azhü zanyoküsü nga küzamüveh. Ma tü Messiah ta küsa kükhraküviri nga thsüvehthuoh ta küsa vü pevehthuoh ülo?

²⁷Thitü hiri thuoüji nyi hamatü khievü nüh ru nüh thsüveh, thi Messiah küruvü thuoüji ma tü khievü nüh ru nüh nyi küsü nga müthsüra,” ti sa.

²⁸Jükenüh Jisu nüh Kükhurüzhe vü sosie küvehvü nüh zie taji, “Nohri hi thsü veh, thi hi khiela nüh ru nüh nohri nüh thsü veh, thitü hi tü hi mpa eh müshe vünüh müru, hi küüzewa thuoüji zhütsa, thi nohri tü mamüthsü.

²⁹Thitü hi nü ma thsü veh, küpakenühnyunü hi tü ma vünüh ru, thi ma nüh hi küze,” ti küza.

³⁰Jükenüh mari tü ma re nti phah, thitü nyi küsü nga mavü ake müthse, küpakenühnyunü ma tsothowa müjie kürukenüh.

³¹Thitü jütawie ketünga nyiri hozake ma tsotü teru, ma nüh, “Messiah küru vü nyi hama nüh küsa nyia vünüh ma tü sanaveh lo?” ti küna.

³²Nyi riekhuowa nüh ma zhüku kuophratenyuo teküwa Farisiri nüh thsüra, thi levü küjiri nüh thi Farisiri nüh mare üti arienyiri küze.

³³Jisu nüh mari vü, “Hi nüh rülo pike nohri siepe taji nü hi küüzewa vü tewa nathuoh.

³⁴Nohri hi phah naveh tü müngura nüh sanaveh, hi khiela pe naveh nüh nohri tü mürura,” ti küza.

³⁵Judahri tü mari mpa küsü nüh küsü vü, “Nyi hamatü khievü tewa nta müshe nü hiri tü ma mphara ta saveh lo? Ma tü Judahri vorie tekütseri vü wa taji mari sosie nasa veh ünü?

³⁶Ma nüh nohri hi phah naveh tü müngura, thi e küpehpe vü nohri mürura ta küsa mazhünyo watü mowa thuoh lo?” ti sa.

³⁷ Akhu küji sehkhe rülo vü Jisu nüh süra tsie taji, “Nyi wuori ajuh kürieveh üji ma tü hi vü ru taji zhu luo,” tizie.

³⁸ Küzhütsazhü vünüh küüza kümüjie thari nüh hi tsotü veh nüh ma luoveh lo vünüh kürhojuh rüguri lizhuru naveh, ti zie.

³⁹Hamatü ma nüh thari nüh ma tsotü naveh nüh ngu naküsa Sietsewa phrate, küpakenühnyunü Sietsewa tü müjie tsü thi Jisu tü küthola müjie küsa kenüh.

⁴⁰Mari azhü hamari küthsüra vü mari wuori nüh, “Zhütsa hatü setsaküthsüwa tsah wiethuoh,” ti küza.

⁴¹Küpari nüh, “Hamatü Khrista wiethuoh,” ti küza. Thitü wuori nüh, “Khrista tü Galilee vünüh ru naveh lo?

⁴²Messiah tü David vünüh thi khanavü David nüh küpe anyu Bethlehem vünüh ru na ta zhütsa lasi nüh müküzaülo?” ti küza.

⁴³Jütisanü ma vünüh nyiri azhie vü küsuo nü riekhuo satewa.

⁴⁴Mari wuori nüh ma re nti sa, thitü nyi küsü nga ma vü ake müthse.

⁴⁵Thi ariah huori tü levü küjiri thi Farisiri vü shele ru, thinü jümari nüh mari vü, “Mokenüh nohri ma siemütselo?” ti küna.

⁴⁶Thinü rieh huori nüh, “Nyi küsü nga anyi hama kümüjie azhü müjie phra wie,” ti rületsü.

⁴⁷Thinü Farisiri nüh mari vü, “Nohri nga müramüthuoh ülo? ti küna.

⁴⁸Kükhraküviri nyutü Farisiri wuori ma tsotümüthuoh ülo?

⁴⁹Thitü Khonyoh müküthsü anyi riekhuo hamatü müzümüthuoh,” ti küza.

⁵⁰ Mari azhie vü nyi küsü, khana Jisu vü küruwa Nikodema nüh mari vü,

⁵¹“Hiri Khonyo vünüh thuoüji küütü vünüh azhüwa mükünakhu nüh thi küürowa müthsükhu nüh nyuri müshemümüsü ra,” ti küza.

⁵²Mari nüh ma vü, “Noh nga Galilee vünüh ülo? Phawaluo, Galilee vünüh setsaküthsüri küsü nga shu naveh taküsa zhütsalasi vü rhümüsa,” ti küza.

⁵³Jütiküsavü mari tü papa zhe vü tewakhe.