Read Pochuri Naga JOHAN 8 Bible Online

JOHAN 8 - Pochuri Naga bible

JOHAN 8

¹Thitü Jisu thuoüji Olive Küzhiho vü tewa.

²Rüne kümüto ma tü shele Kükhurüzhe vü ru, thinü nyiri aveh ma vü ru, thi ma nüh tsuo shupe taji mari sosie.

³Jütiküsavü Khonyo küsosieri thi Farisiri nüh nyimzari küüphroküphrie küüro küsala küsü sieru mari azhievü sa.

⁴Mari nüh ma vü, “Küsosiewa, nyimza hamatü küüphroküphrie küüro sala nü reralie.

⁵Tinü Mosa Khonyo nüh hiri vü azhü kütsü thuoüji hakümjie küsari tü aloh nüh vethemü üta. Jükenüh noh nü nyimza hama kenüh mowa phrate mühie veh lo?” ti küna.

⁶Mari nüh ma müküle phana küsa kenüh mari tü ma mütenü hama küphrate wie. Thinü Jisu nüh kükietsuo matü jü nüh azhih vü rhü.

⁷Mari nüh mükütuowiethuoh nüh ma vü küna küpehuokenüh ma nüh süra tsie taji mari vü, “Nohri azhievü thawa nüh kükhiemuo müsatsah nüh jüma nüh aloh vi nü maveh khu luo,” ti küza.

⁸Jütisanü kükietsuo le taji ma tüjü nüh azhih vü rhülehü.

⁹Jütiküsavü mari jü künara nü kükhruowa vünüh tse taji nyi küsüsü nüh tewa. Jütisataji Jisu thi matüvü tsieküveh nyimzawa mpa jamü nü tewa.

¹⁰Jisu nüh süra toke nü nyimzawa vü, “Nyimzawa, mari tü khievü tewa khethuoh lo? Nyi küsü nga noh müshemümüsü ülo?” ti küna.

¹¹Nyimzawa nüh ma vü, “VÜWA nyi küsü nga hi müshemümüsü,” ti rületsü. Thinü Jisu nüh mavü, “Hi nga noh müshekümüsüwa nyu, waluo, thi kükhiemuo müsale tümü luo,” ti küza.

¹²Jisu nüh Farisiri vü küza lehü taji mari vü, “Hi thuoüji zhih küwiewa wiethuoh, thari nüh eh se nyi naveh nüh aküzo vü kütsewanyu nü akürho küwiewa pe naveh,” ti küza.

¹³ Farisiri nüh ma vü, “Noh tü noh mpa no povü sakütse wie, thi no povü nü zhütsa nyu,” ti küza.

¹⁴Jisu nüh mari vü, “Hi nü hi mpa eh povü satsewie ketünga eh povü thuoüji zhütsa, küpakenühnyunü hi tü khie vünüh ru thi khievü wa naveh nüh thsüküveh kenüh. Thitü nohri thuoüji hi khie vünüh ru thi khievü wa naveh nüh müthsü.

¹⁵Nohri thuoüji asazüh lewuo vünüh müzhe taji nyuri küjojoti, thitü hi nü nyi küsü nga müküjo.

¹⁶Thi hi nü nyuri küjowie ketünga hi nüh küüjo thuoüji zhütsa, küpakenühnyunü hi mpa nüh küjomüveh nü hi thi hi küüzewa hisü nüh küjo küveh kenüh.

¹⁷Nohri Khonyo vü thuoüji nyi künyi nüh povü pemüthuoüji zhütsathuoh ta küsa rhüsaveh.

¹⁸Hi tü hi mpa eh povü satse veh, thi eh Pa hi küüzewa nüh ehpovü satsü veh,” ti rületsü.

¹⁹Jükenüh mari nüh ma vü, “Noh Pa khiela peveh lo?” ti küna. Thinü Jisu nüh mari vü, “Nohri tü hi nga thi eh Pa nga müthsü; nohri nüh hi thsü thuoüji eh Pa nga thsü naveh,” ti rüle küza.

²⁰Azhü hamari tü ma nüh Kükhurüzhe vü künyirhieküsape vünüh phrate; thitü nyi küsü nga ma müre, küpakenühnyunü ma tsothowa tü müjie küru kenüh.

²¹Jümasevü nga ma nüh mari vü, “Hi nü tewanathuoh; thi nohri tü hi phah taji nohri kükhiemuo vünüh sü nathuoh; hi khievü wa naveh nüh nohri tü mürura,” ti küza.

²²Thinü Judahri sierhüri nüh, ma tü ma mpa ma fethemünaveh ülo? Küpakenühnyunü ma nüh, “Hi khievü wa naveh nüh nohri nü mürura ta küüza kenüh,” ti küza.

²³Ma nüh mari vü, “Nohri thuoüji azhih hala nüh, thitü hi thuoüji rügi vünüh, nohri nü azhih hama nyiri thitü hinü azhih hama nyi nyu.

²⁴Nohri thuoüji nohri kükhiemuo vünüh sü nati hi nüh nohrivü küzamüthuoh, küpakenühnyunü hi tü ma ta küsamütsotü thuoüji nohri kükhiemuori kenüh süwie naveh,” ti küza.

²⁵Thinü mari nüh ma vü, “Noh tü thawa lo?” ti küna. Jisu nüh mari vü, “Hi nüh atükhu vünüh nohri vü küüzawawie thuoh.

²⁶Hi nüh nohri, khuke hozake küzarana küsa peveh, thi künanahküsa hozake peveh; thitü hi küüzewa thuoüji zhütsa, thi hi nüh ma vünuh mowa künara nüh jümari phrazhutsü veh,” ti rüle küza.

²⁷Mari tü ma nüh Pawa zhüku phraküveh müthsü nüh sa.

²⁸Jükenüh Jisu nüh mari vü, “Nohri nüh anyi Tsawa viküütoke vü hi tü ma ta küsa thsüra naveh, thi hitü hi mpa eh kükhra vünüh zanyo küsü nga müsa, tü Pawa nüh hi küsosie vi phrate ta küsa thsü naveh.

²⁹Thi thawa nüh hi küze nüh ma tü hi sietsewieveh, ma tü hi mpa müja, küpakenühnyunü hi tü tsotho aveh ma külosakütse kenüh,” ti küza.

³⁰Ma nüh jüüti küüza vü nyiri hozake ma tsotüra.

³¹Jüsevü Jisu nüh Judahri ma tsotü kümüri vü, “Nohri eh zhü müzhe tse pehuothuoüji nohri tü eh sekünyiri tsawiethuoh;

³²thi nohri tü küzhütsawa thsüra naveh, thi küzhütsawa nüh nohri sakürüzi tsü naveh,” ti küza.

³³Mari nüh ma vü, “Hiri tü Abraham küthsoküzhiri, thi nyi küsü siepe nga müjie sa wie, noh tü mokümjie nohri sakürüzitsü naveh ta phratera naveh lo?” ti küza.

³⁴Jisu nüh mari vü, “Hi nüh nohri vü küzatoke naveh, thari nüh kükhiemuo satse nüh jümari thuoüji kükhiemuo siepewiethuoh.

³⁵Siepewa tü zhe küsü vü küsuokürho müpeh; thitü Tsawa thuoüji küsuokürho peh veh.

³⁶Jükenüh Tsawa nüh nohri sakürüzi tsüveh üji nohri tü rüziwienathuoh.

³⁷Nohri tü Abraham küthsoküzhiri ta küsa thsüvehthuoh; thitü nohri tü hi fethe nta phawieveh, küpakenühnyunü ehzhüwa tü nohri vü peh naküsa ape münyie nüh samü.

³⁸Hi nüh eh Pa sie mowa ngu nüh jümari phrate veh, thi nohri tü nohri pa vünüh mowa künara nüh jüma sa veh,” ti rüle küza.

³⁹Mari nüh ma vü, “Abraham tü hiri apa,” ti rüle tsü. Thinü Jisu nüh mari vü, “Nohri tü Abraham tsari thuoüji nohri tü Abraham nüh mowa sanüh jümari küsale.

⁴⁰Thitü nohri tü hi nüh Saküüwuowa vünüh küünara küzhütsawa vi nohri vü küüzawa ha hi wie nga fethe nta phaveh, Abraham thuoüji hakümjie müsa.

⁴¹Nohri thuoüji nohri pa nüh küsari satse veh,” ti küza. Thinü mari nüh ma vü, “Hiri thuoüji küüphroküphrie vühri vünüh müwuo; hiri Pa küsü peh veh, thi jüma thuoüji Saküüwuowa,” ti küza.

⁴²Jisu nüh mari vü shele, “Mükütüküzü Saküüwuowa tü nohri Pa thuoüji nohri tü hi küümze leh, küpakenühnyunü hi tü Saküüwuowa vünüh shuru thi ruti küsa kenüh, hi tü hi mpa eh kümüshe vünüh müruthitü ma nüh hi küüze wie.

⁴³Nohri tü hi nüh küüzari zo ta müküünangü kenüh wie.

⁴⁴Nohri thuoüji nohri apa Tsuore kümüsüwa, thi nohri kümüshethuoüji nohri apa kümüsheri sana küsawawiethuoh. Ma thuoüji atükhu vünüh anyi küfetheri, thi ma tü küzhütsa mükünyie kenüh. Ma nüh azhü kürie thuoüji ma khuke mokümjie nüh jü vünüh phrate tseveh, küpakenühnyunü ma tü kürieri thi kürieri apawa wiethuoh.

⁴⁵Thitü hi nüh küzatsanaveh, nohri tü hi mütsotü nüh samü.

⁴⁶Nohri thawa nüh kükhiemuo phra hi mütehrana lo? Hi nüh küzhütsawa phrateveh üji nohri tü mokenüh hi mütsotü lo?

⁴⁷Saküüwuowa nyiri thuoüji Saküüwuowa zhü künaveh; nohri tü mokenüh müküna lo ta thuoüji nohri tü Saküüwuowa nyiri mükünyu kenüh,” ti küza le.

⁴⁸Judahri nüh ma vü, “Noh tü Samariari thi noh tü sietsekümüsüwa pehveh ta küüza hiri tü müküle ülo?” ti küna.

⁴⁹Thinü Jisu nüh, “Hi tü sietsekümüsüwa pehmüveh, thitü hi nü küsiake vi eh Pa tsüveh, thi nohri nü hi küsiake münyie,” ti rületsü.

⁵⁰Jütawie ketünga hi nü hi mpa hi kümühie mpha; thitü nyi küsü jüüta küsa pehveh, thi ma nüh küüna sanaveh.

⁵¹Hi nüh nohri vü küzatsanaveh, “Anyi thawa nüh eh zhü künanah nüh ma thuoüji piketü küsü künguwanyu,” ti küza.

⁵²Judahri nüh ma vü, noh tü sietse kümüsüwa peveh ta küsa hiri nüh thsürathuoh. Abraham nga thi setsaküthsüri nga sütewakhethuoh, thinü noh nüh, “Anyi thawa nüh eh zhü künanaveh nüh piketü aküsü kümüpowanyu ta küzaveh.

⁵³Noh tü hiri pa Abraham sükümüwa thi setsaküthsü sükümüri nyia vünüh jiveh lo? Noh tü noh mpa thawa ti saveh lo?” ti küna.

⁵⁴Thinü Jisu nüh, “Hi tü hi mpa hi kümühie phraveh üji hi kümühie tü momasathuoh; eh kümühie povü sakütsüwa thuoüji eh Pa nüh wie, nohri nüh nohri Saküüwuowa ta küsawa.

⁵⁵Hi nü ma thsü veh, thitü nohri tü ma müthsü, hi nüh hi tü ma müthsü ta thuoüji nohri kümüjie kürierithuoh; thitü hi tü ma thsüveh thi ma zhü müzhe veh.

⁵⁶Nohri pa Abraham tü e tsotho ngu naküsa kenüh lozhe, thi matü ngu nü lozhethuoh,” ti küza.

⁵⁷Thinü Judahri nüh ma vü, “Noh tü no mavi tünyieke nga müjieju, thi noh tü Abraham ngu thuoh la?” ti sa.

⁵⁸Jisu nüh mari vü, “Künyito vünüh hi nüh nohri vü küza naveh, Abraham müjie küwuo vünüh hi tü tetsewiethuoh,” ti küza.

⁵⁹Thinü mari tü aloh vi nü ma veh, thitü Jisu tü küthi taji Kükhurüzhe vünüh alievü tsezhutewa.