Read Pochuri Naga JOHAN 9 Bible Online

JOHAN 9 - Pochuri Naga bible

JOHAN 9

¹Jüti sataji ma tü tsetse ünü nothaküju nü küwuori küsü siemütu.

²Thinü ma sehnyiri nüh ma vü, “Küsosiewa, anyi hama nothaküju taji küwuo hatü ma kükhiemuo kenüh ünü mapa zari kükhiemuo kenüh lo?” ti küna.

³Jisu nüh mari vü, “Ma khiemuokümü kenüh nga nyu, nyutü ma zahpari nüh khiemuo kümü kenüh nga nyu, thitü ma vünüh Saküüwuowa küürowa saküthsüna küsakenüh wie.

⁴Tho küveh vü hi küüzewa küüro müsaji mümühie, tsozo teru thuoüji nyi küsü nga küüro müsara.

⁵Azhih hala küthake peh naveh nüh hi tü azhih küwiewathuoh,” ti rüle tsü.

⁶Ma nüh hama küzamü taji, azhih vü mütsemüshüke taji nyisa künya nü vi nothaküüjuwa notha küne taji

⁷ma vü, “Wa nü Siloam (mazhünyo küüze) suozü vünüh phrüjamü luo,” ti küza. Thinü ma tü wa taji phrümü ünü zanyo ngu teru.

⁸Ma zhephruri thi khanavü ma khrütsa taji kütse künguri nüh, “Nyi hama tü khanavü shupe taji khrükütsawa nyu ülo?” ti sa.

⁹Wuori nüh, “Ma wiethuoh,” ti sa; küpari nüh, “Nyu, thitü ma kümüjie,” ti küza. Thinü ma nüh, “Hi tü anyi jüma wiethuoh,” ti küza.

¹⁰Mari nüh ma vü, “Thinü mokümjie sataji no notha tü ngura lo?” ti küna.

¹¹Thinü ma nüh, anyi Jisu ta küjiwa nüh anyisa künyanü vi eh notha künetünü hi vü, “Wa taji Siloam vünüh phrümü luo ti hi vü küza, thi hi tü wa nü phrümüünü eh notha ngu teru lie,” ti küza.

¹²Mari nüh ma vü, “Ma khiela peveh lo?” ti küna. Thinü ma nüh, “Hi nü müthsü” ti rüle küza.

¹³Mari nüh khana nothaküüjuwa sie Farisiri vü ru.

¹⁴Jisu nüh nyisa künya taji ma notha sakümühiekütsütü Sabbath ti küji Judahri kümünyierülo vü satsü.

¹⁵Mokümüjie ma notha ngura nüh Farisiri nüh küna lehü. Thinü ma nüh mari vü, “Ma nüh nyisa vi eh nothakünetü, thi hi nüh phrümü ünü ngura lie,” ti rületsü.

¹⁶Farisiri wuori nüh, “Nyi hama nü Saküüwuowa vünüh nyuwie, küpakenühnyunü ma tü kümünyie rülo mükümüzhe kenüh,” ti sa. Thitü küpari nüh, mokümüjie kükhiemuori küsü nüh thsoshi hakümjie sara naveh lo? Jütiküsavü mari azhievü riekhuo küpapa satewa.

¹⁷Jükenüh mari nüh nothaküüjuwa vü, “Noh tü ma kenüh mowa phrate mühieveh lo? küpakenühnyunü ma nüh no notha sakümühie kütsü kenüh,” ti küna lehü. Thinü ma nüh, “Ma thuoüji setsaküthsüri wiethuoh,” ti rüle küza.

¹⁸Nothaküngurawa zahpari müjie ji küru küju nü ma tü nothaküju taji ngulera ta küsa Judahri sierhüri tü mütsotü nüh samü,

¹⁹thitü mari nüh ma pa thi ma za vü, “Hamatü nosü tsa nosü nüh nothaküju nü wuo ta küsawathuoh ülo? Thinü ma tü mokümjie khinyi nü zanyo nguravehthuoh lo?” ti küna.

²⁰Masü nüh, “Hisü nüh ma tü hisü tsathuoh thi ma tü nothaküju nü wuo ta küsa thsüveh,

²¹thitü ma tü mokümjie khinyi nü zanyo nguvehthuoh thi thawa nüh sakümühietsü nüh hisü nü müthsü. Nohri mpa ma künaluo, ma nga khinyi nü khruomüthuoh, ma mpa ma kenüh phrateranathuoh,” ti rületsü.

²²Masü tü Judahri sierhüri kükrü kenüh hakümjie küüzawie, küpakenühnyunü thawa nüh ma tü Khrista ta phrazhu maveh nüh künazizhe vünüh zheja naveh taküraküsa kenüh.

²³Jükenüh masü nüh, “Ma tü khruomüthuoh, tinü nohri mpama künaluo,” ti küüzawie.

²⁴Jütiküsavü akünyiawa mari nüh nothaküüjuwa ji lehü nü ma vü, “Noh küzhütsawa küza naveh ti küsa Saküüwuowa tüvü küshie nyi nü, noh sakümühiekütsüwa tü kükhiemuori ta küsa hiri nüh thsü veh,” ti küza.

²⁵Ma nüh, “Ma tü kükhiemuori ünü mota nüh hi nüh müthsü, thitü hi nüh zanyoküsü thsüküveh thuoüji, hi tü eh nothaküju thitü khinyi nü ngurathuoh,” ti rüle küza.

²⁶Mari nüh ma vü, “Ma nüh noh vü mowa sa lo? Mokümüjie ma nüh noh notha sakümühietsü lo?” ti küna lehü.

²⁷Thinü ma nüh mari vü, “Hi nüh nohri vü küzamüthuoh, thitü nohri tü eh zhü müküna, nohri tü mokenüh jüma künangüle veh lo? Nohri nga ma sehnyiri sa nthe ülo?” ti küza.

²⁸Thinü mari tü ma phra taji, Noh nü ma sehnyiri lo; hiri thuoüji Mosa sehnyiri.

²⁹Saküüwuowa nüh Mosa vü küza taji küsa hiri nüh thsüveh, thitü anyi hama thuoüji khievü nüh ru nüh hiri nü müthsü, ti küza.

³⁰Ma nüh mari vü, “Mokenüh hama kenüh ngo na lo? Ma tü khie vünüh ru nüh nohri tü müthsü thitü ma tü ehnotha sakümühietsü.

³¹Saküüwuowa thuoüji kükhiemuora zhü müküna ta küsa hiri nüh thsüveh, thitü thawa nüh Saküüwuowa khurü tse nüh thi ma külo satse nüh Saküüwuowa thuoüji jümara zhü künaveh.

³²Azhih küsate vünüh nosü küju nyi küsü nga nothaküju taji küwuo sakümühie kütsü müjiekünarawie.

³³Anyi hama tü Saküüwuowa vünüh nyu thuoüji ma tü zanyoküsü nga küsara münyie,” ti küza.

³⁴Mari nüh ma vü, “Noh tü kükhiemuotsatsa vünüh wuo taji khruosüra ünü hiri sosie nti la?” Jütisanü mari tü ma zhejamü.

³⁵Ma zhejamüthuoh ta küsa Jisu nüh thsüra, thinü ma nüh ma ngura taji, “Noh tü anyi Tsawa tsotüveh nü nyu lo?” ti küna.

³⁶Ma nüh ma vü, “Küjiwa, ma tü thawa lo? Hi vü küzajie, jütathuoüji hi nga ma tsotü naveh nüh,” ti küna.

³⁷Jisu nüh ma vü, “Noh nüh ma ngumüthuoh, thi noh siejülepeküvehwa tü ma thuoh,” ti rületsü.

³⁸Ma nüh ma vü, “VÜWA, hi nüh tsotü vehthuoh,” jüti sataji ma tü khotsü taji ma khurü.

³⁹Jisu nüh ma vü, “Müngu nüh peküvehri küüngura, thi ngu küvehri tü küüjumüle ti sa nti küsa kenüh küjotsü nti azhih hala küruwie,” ti küza.

⁴⁰Farisiri wuori ma kütuovü peküvehri nüh hama künara taji mari nüh ma vü, hiri nga küjuveh ülo? ti küna.

⁴¹Jisu nüh mari vü, “Nohri tü küüju tüla müküle küpewanyuthuoh, thitü nohri nüh hiri nü nguveh ta küsakenüh nohri müküle pewie naveh,” ti küza.