Read Pochuri Naga KÜÜRORI 1 Bible Online

KÜÜRORI 1 - Pochuri Naga bible

KÜÜRORI 1

¹ Halie küümze Theofilas, eh lasi apowa vü Jisu nüh ma küüro thi nyuri küsosie küsate,

²vünüh Jisu ma mpa rükaküsa VÜWA povü sa üta küüzeri vü Kümtse Sietse vünüh azhütsümü nü rügivü müjie kükuo küju azhünyo wiethuoh.

³Ma münomüna kümü sevü ma mpa rhowie taji mari vü kütsa, rülo zürake azhievü mari vü küngu, thi Saküüwuowa[1] kajipe zhü vi küza.

⁴ Thi ma nüh mari siepeküvehvü nüh, “Jerusalem mükaritümü nü eh Pa nüh tsü nta zhühthuo küsa hi nüh küüzewa huo luo.

⁵ Küpakenühnyunü Johan thuoüji juh vünüh baptis tsü, thitü küsuomüwa nüh nohri Kümtse Sietse vünüh baptis sanaveh,” ti küza.

⁶Jütiküsavü mari ru sehzhu ünü mari nüh ma vü, “VÜWA, noh tü khinyi Israelri kükaji tsüle naveh lo?” ti küna.

⁷Thinü ma nüh mari vü, “Pawa nüh ma mpa ma kükhra vünüh saküsari tsotho nyutü azale nohri müküthsüra.

⁸ Thitü Kümtse Sietse nohri vü küru vü kükhra ngura naveh, thi nohri nüh Jerusalem vü nga thi Judea aveh vü nga thi Samaria vü nga, thi azhih küpote aveh vü nga eh povü sawa naveh,” ti küza.

⁹ Thi ma nüh hama küza kümüsevü mari nüh ma nopeveh ünü ma sie thajüwu rügivü tekuo nü mari nüh noküveh vünüh külu nüh külüwutewa.

¹⁰Ma jüta kuotekükuo mari nüh thajüwu vü nopeveh ünü, halie, anyi künyi thsümünyi kümüji sanü mari kütuo vü tsieküpela ngu,

¹¹thinü masü nüh mari vü, “Galilee nyiri, nohri tü mokenüh tsie nü thajüwu vü nopeveh lo? Jisu hama nohri vünüh thajüwu vü kuotekükuowa tü nohri nüh mokümjie thajüwu vü nokükuo nüh jükümjie vünüh shele ru wie naveh,” ti küza.

¹²Jüti sataji mari tü Olive ti küsa Küzhiho Jerusalem kütuo kilomiter küsü letse kükietuo Jerusalem vü teru.

¹³ Thi mari tü jüla wa nü azhe küshothuoh kürügi vü mari nüh pehpehti küsa pe vü tewa. Jümari thuoüji Pitor, thi Johan thi Jems; thi Andrew, Filip, thi Thomas, Bartholomi, thi Mat; Jems Alfius atsa thi Simon Luovehkütsazawa, thi Jems atsa Judas.

¹⁴Mari aveh thi nyimzari thi Jisu aza Maria thi ma nüri ti tsotho aveh vü kümüshe küsü sanü kükhuo sa pe.

¹⁵Jüma tsothovü Pitor tü ma füri azhie vü (jüla mari arefü sanü sehzhu küpe müzake nü mükeke) süratsie taji,

¹⁶“Eh füri, Jisu küreri sie wa küjokütsüwa Judas zhüku khanavü Kümtse Sietse nüh David apo vünüh küphrate zhütsazhüri müsajuji mümühie.

¹⁷Küpakenühnyunü ma tü hiri azhie vü chiekemüthuoh, thi hiri küüro hala ma müthonga chiekemüthuoh,” ti küza.

¹⁸ Thi anyi hamatü ma nüh kümüsü küsa kümüliewa vi azhuh zhuto küsü sümüthuoh; thi ma tü alü vünüh showa nü ma satsa küzhila vünüh külothuohmü taji ma kuremüwi aveh nga alievü shuteruthuoh.

¹⁹Thi jümatü Jerusalem vü küperi aveh nüh thsükhehthuoh, jükenüh azhuh jümatü mari azhü vünüh Akeldama, mazhünyo, “Azüh Zhuh,” ti ji.

²⁰ “Küpakenühnyunü Küriehiri lasi vü: “Ma pewa tü küürütsomü luo, thi nyi küsüwienga jüla mükürhotümü luo, thi nyi küpari nüh ma küüro vü ma mütho küüvümü luo,” ta rhü saveh.

²¹ Jükenüh Johan nüh baptis küsate vünüh ru hiri vünüh ma sie thajüwu vü müjie tekükuo küju,

²²VÜWA Jisu nüh hiri sie nü küwaküru küsa tsotho vünüh hiri sietekütseri küsü nüh hiri vünüh ma rholeteküwa povü müsaji mümühie.

²³Thi mari nüh nyi künyi: Josef, Barsabas ti küjiwa, thi Justus ti nga küjiwa, thi Mathias masü jizhu.

²⁴Thi mari tü kükhuo sataji, “VÜWA, nyiri luoveh aveh küthsüwa, hamasü khiemawa noh nüh rüka sanü,

²⁵ma nüh khana saküru vü shele teküwawa Judas mütho vünüh povü küsa küüro sara naveh nüh küjo hiri kütsaluo,” ti khuo.

²⁶Jüti sataji mari tü masü kenüh aküze sa, thinü aküzewatü Mathias wuovü tsuotsaketewa, jütisanü ma türaluokeri vü chieke.