Read Pochuri Naga KÜÜRORI 11 Bible Online

KÜÜRORI 11 - Pochuri Naga bible

KÜÜRORI 11

¹Thinü Judea vü peküveh povüküsari thi kütsotüri nüh Judahmükünyuri nga Saküüwuowa zhü vi vehthuoh ta küsa künara.

²Jütiküsavü Pitor tü Jerusalem vü wa ünü ahukürheri refü nüh ma sieküproluo taji,

³“Mokenüh noh tü ahu mükürheri vü wa taji mari sie ashietsa lo?” ti küna.

⁴Thitü Pitor tü süratsie taji küjihke nü kümühieti rületsü taji:

⁵Hi tü Joppa nyuküji vü peh nü khuo peveh ünü zemophoke küwa vünüh kümohtsa ngu nü ajüke müzü küpe zanyo kürüpuo küji küsü küüze ngura, thi jümatü hi vü turu.

⁶Thi hi nüh jüma nophoke peveh ünü jüla tü samüwa thi rezasa thi azhih vü shorhü nü zhukütseri thi prükütse müwari ngu.

⁷Thinü hi vü ajikhi ru taji, “Süraluo, Pitor, thi fethenü tsaluo” ti küza.

⁸Thitü hi nüh, nyu, VÜWA, küpakenühnyunü hi tü zanyo muomuo nyutü mükümtse küsü nga eh po lovü müjiethse wie, ti küza.

⁹Thitü rügi vünüh akünyiawa rüle taji, “Saküüwuowa nüh sakümtse küsaritü muomuo ta müjira,” ti küzalehü.

¹⁰Hakümjie küchekeri sa, thi zanyo jümari aveh thajüwu vü vitekuo le.

¹¹Jütisa küveh tsothovü Kaisaria vünüh nyi küche azheh hiri nüh peküvehvü hi vü ru.

¹²Thinü mari müshemüküpatü mari sie wa üta Kümtse Sietse nüh hi vü küza. Kütsotüri türo hamari nga hi sie anyiwa zhe lovü tu.

¹³Thinü ma zhe lovü mokümjie rügizhülewa tü tsielanü ngu nüh hiri vü küza, thi ma nüh, “Noh tü nyiri Joppa vü küze nü Simon Pitor ti küjiwa sieru luo,” ti küza.

¹⁴Ma nüh zhülewa nohri vü küza naveh, thi nohri zhüle jümawa vünüh noh nga thi noh zhelori aveh nga külolera naveh.

¹⁵Hi nüh kephrate ünü atükhuvü hiri vü kümüjie Kümtse Sietsewa tü mari vü nga turu.

¹⁶ Thinü hi tü Saküüwuowa zhü müshekera, ma nüh, “Johan thuoüji ajuh vünüh baptis sa, thitü nohri thuoüji Kümtse Sietse vünüh baptis sanaveh,” ti küza.

¹⁷Hiri VÜWA Jisu Khrista kütsotüra vü sietse kütsia hirivü kütsü kümüjie Saküüwuowa nüh mari vü nga tsü saveh üji hi tü anyi mokümjie küsawa nü Saküüwuowa thuohtera na lo? ti küza.

¹⁸Mari nüh hama küünara vü zohmti petewa. Thi mari nüh Saküüwuowa siake taji, “Jütathuoüji Saküüwuowa nüh Judahmükünyuri vü nga akürho vü wa na küsa kenüh luovehkükhaphrü tsümüthuoh,” ti küza.

¹⁹ Thi Stefen kenüh kümnomna tsüküru vü zheküporienü Foenicia thi Saipra thi Antiok vü küwari tü Judahrivü küchie nüh küpari vünü azhüwa vi müküza.

²⁰Thitü mari azhie vü Saipra thi Sairen vünüh Antiok vü runü VÜWA Jisu Zhühthe Kümühie phra nü Greekri vü nga küza.

²¹Thi VÜWA kükhra tü mari vü peh, thi kütsotürari hozake khaphrü nü VÜWA vü ru.

²²Zhühle hamatü Jerusalem Nazizheh vü ru künara, thi mari nüh Antiok vü Barnabas küze.

²³Thi ma tü ru nü Saküüwuowa küümze küngura vü ma tü lozhe she; thi ma nüh mari tü VÜWA vü luovehkümüzho vünüh amüshe thse taji peh üti küthotsü.

²⁴Küpakenühnyunü ma tü anyi kümühie küsü thi ma tü Kümtse Sietse thi kütsotü pro nü kütseri küsü. Jüti sataji nyi shieji kürefü küsü VÜWA vü thsephe lehü.

²⁵Jüti sataji Barnabas tü Saul no nti Tarsus vü tewa.

²⁶Thinü ma tü ma küngura vü ma sie nü Antiok vü teru. Küpakenühnyunü amahvi ajü masü tü kümühuwa siemütu, thi anyi shieji küsü sosie peh, thi hama hala nüh pokhu sa sehnyiri nüh Khristanyiri ta Antiok vünüh ji.

²⁷Hama rülo vü setsaküthsüri Jerusalem vünüh Antiok vü ru.

²⁸ Thi mari azhie vü nyi küsü anyo Agabus ti küjiwa tü süratsie nü azhih aveh vü kümükhuojih ru naveh ta Sietse vünüh phratetsü, thi hamatü Klaudius kükaji tsotho vüru.

²⁹Thi sehnyiri tü nyi küsüsü papa küsarawa vi nü Judea vü küpe kütsotüri vü kütsaküzhu küze nti amüshe thse.

³⁰Jüti sataji mari nüh Barnabas thi Saul ake vünüh sierhüri vü tsü.