Read Pochuri Naga KÜÜRORI 12 Bible Online

KÜÜRORI 12 - Pochuri Naga bible

KÜÜRORI 12

¹Jütiküsa tsothovü Herod kajiwa tü Nazizheh vü kütsotüri anyi saküveh wuori vü sakümnomna naküsa ake thse.

²Ma nüh anyu vi nü Johan ajie Jems rethemü.

³Ma nüh jütiküsavü Judahri nüh lozhe küveh ngura nü Pitor nga re nti sa (Hamatü Ahzhi müthse nüh Lohse Rükütsa tsothovü).

⁴ Jütisanü ma nüh ma kürera vü ma vi küsizhe lovü thsemü nü arienyiri nyi müzüzü nüh kümüzhiluonü ma küühuomü, thi Tsekükari khu sevü nüh masie nyiri atüvü küru müshe.

⁵Jütisanü Pitor tü küsizhe lovü thsemü, thitü Kümühuwa nüh mükütuowiethuoh nüh Saküüwuowa vü ma kenüh kükhuo sa pehuo.

⁶Thinü Herod nüh alievü ma vizhuru na küsa rüza vü ma mürüli künyi vi ma küri nü arienyiri nyi künyi azhievü zeh thi rieh huori nüh mükhie tüvü peh nü küsizhe huope.

⁷Thinü halie, VÜWA zhüleri küsü ma vü ru nü küsizhe lovü aküwie wierake nü zhülewa nüh Pitor müchüke taji, “Shiti süraluo,” ti müchüke. Thinü ma ke vünüh mürüli küpheteri kületewa.

⁸Thinü rügizhülewa nüh ma vü, “Noh thsümünyi sa thi nohji küükruvüh vi thse luo,” ti küza. Thinü ma nüh jüüti sa. Thinü ma nüh ma vü, “Noh thsü vi no küshitseke nü eh se nyi luo,” ti küza.

⁹Jütisanü ma tü ma se nyi nü alievü shuwa; ma tü rügizhülewa nüh mowa saveh nüh zhütsa ti mümüshe, thitü kümohtsa vünüh nguveh tünyie ti müshe.

¹⁰Masü tü tse riehuori powa thi künyiawa kari wa ünü, amürü nüh akheri sanü nyuküjiwa vü waju küsawavü ru. Thinü jümatü ma mpa nüh sanü masü tsü taji masü tü alievü shuwa nü lekhuji küsü vü tewa; thinü rügizhülewa tü shiti ma jamü taji tewa.

¹¹Thinü Pitor tü ru taji, “VÜWA nüh ma zhülewa küzenü Herod ake vünüh thi Judahri aveh nüh hi huoküveh vünüh küloletsüthuoh ta küsa thsüto vehthuoh,” ti mampa sa.

¹²Ma nüh hama kümüshera vü Maria, Johan, Mark ti küjiwa aza zhe vü wa, thinü jüla tü nyiri hozake sehzhu nü kükhuo sa pela.

¹³Thi ma nüh wa nü mükhie alievü kütü ünü siepevühri küsü anyo Rhoda ti küsawa tü no nti shuhru.

¹⁴Thitü ma nüh jümatü Pitor jikhi ta küthsüravü maloküzhe vünüh akheri müsakhu thuoh nüh azhe lovü zhüwa nü Pitor tü akheri vü tsieveh ti küza.

¹⁵Thitü mari nüh rülawa vü, “Noh nü zhemüthuoh,” ti küza. Thinü ma nüh jümatü zhütsa ti wurie. Mari nüh, “Jümatü ma zhüleri,” ti küza.

¹⁶Thitü Pitor tü amükhie kütü pehuo; thinü mari nüh wa nü sa ünü mari tü ma ngu taji mari ngo she.

¹⁷Thitü ma nüh zoti peh üti ake vünüh amüke sanü mari kütsa. VÜWA nüh mokümjie küsizhe vünüh mavizhu nüh mari vü küza kheh. Jütisanü ma nüh, Jems thi afüri vü hama küzaluo. Jütiküsavü ma tü mari sie porie taji azhie küpavü tewa.

¹⁸Jüti sataji thoru ünü Pitor khievü tewa thuoh nti arienyiri azhie vü küzülazüku müküzhüh.

¹⁹Thi Herod tü ma phah nü mphara nüh samü ünü riekühuori vü küna taji rieh huo jümari tü fethemü üti azhü tsümü. Thinü Pitor tü Judea vünüh Kaisaria vü tetsuo nü jüla petewa.

²⁰Jütiküsavü Herod tü Tair thi Sidom nyiri vü arüshu; thinü mari tü azhüküsü sanü ru kajiwa kükhu vü küürowa Blastas nüh mari povü satsü taji kürükümühie satsü üti khuo, küpakenühnyunü mari anyuwa tü kütsaküzhu kajiwa anyu vünüh ngutsa küvehkenüh.

²¹Thi rülo chieküsa rülo vü Herod tü ma kajithsümünyiri vikevü nü ma kajipe rügivü shupe taji mari vü azhü kümühie küza.

²²Thinü nyiri nüh, “Azhü hamatü nyira zhü nyu nü nyiaza[4] zhü wiethuoh,” ti zie.

²³Thinü müküzhike wiethuoh nüh VÜWA zhülewa nüh Herod pah taji ajienyu nüh küütsathemü, küpakenühnyunü ma nüh Saküüwuowa müküsiake kenüh.

²⁴Jütiküsavü VÜWA zhü tü nyuo nü thsüküzhi shetewa.

²⁵Thinü Barnabas thi Saul masü tü küüro sajukümü sevü Johan, Mark ti küjiwa sie nü Jerusalem vünüh shele teru.