Read Pochuri Naga KÜÜRORI 14 Bible Online

KÜÜRORI 14 - Pochuri Naga bible

KÜÜRORI 14

¹Jüti satajinü masü tü Ikonium vü wa nü Judahri künazizhe lovü tu nü sosie, thinü Judahri nga thi Greekri nga anyi hozake tsotüra.

²Thitü Judahri mükütsotüri nüh Judahmükünyuri küchükümüsü thi mari luoveh sakümüsü nü kütsotüri sieküproluo.

³Jükenüh tsotho hothake luoveh müzho taji VÜWA kenüh azhüphra, thi ma küümze zhü povüwa satsü, thi thsoshi thi küngo küüro küsa masü ake vü tsü.

⁴Thitü nyuküji jüla anyi küsuo künyi satewa; wuori nüh Judahri wuovü thi wuori nüh povüküsari wuovü ti küsuomü.

⁵Jütiküsavü Judahri thi Judah mükünyuri nüh mari sierhüri sie nü kütsotüri sakümnomna thi aloh vimari veh nta sa.

⁶Mari tü jüma thsüra nü zhü Listra thi Derbe, Likaonia nyuküjiri vü thi anyu jüma natonahuo vü tewa.

⁷Jüti sataji masü tü azhie jüri vü Zhühthe Kümühiewa küza.

⁸Thinü Listra vü ma küwuo vünüh ajih müsü nü majih vü zanyoküsü nga müsara nüh alemütsewiethuoh nüh shuküpehuo küsü peh.

⁹Ma tü Paul nüh küzaküveh künaphoke; thi Paul tü ma saküümühiera kütsotü peküveh kenüh ma nophoke taji,

¹⁰zia nü, “Noh jih künyi kümüshoti süra tsie luo,” ti küza. Thinü ma tü süra jo nü tsetewa.

¹¹Jütiküsavü anyi riekhuowa tü Paul nüh küsa jüma ngu ünü mari jikhi zia nü Likaoniari azhü vünüh, “Nyiazari tü nyiri atso sanü hiri vü tetsethuoh,” ti küza.

¹²Mari nüh Barnabas thuoüji Zeus ti ji thi Paul thuoüji zhüküüza küjiwa küsa kenüh Hermes ti ji tsü.

¹³Thi Zeus levüwa kükhurüzhe tü nyuküji atüvü peküveh kenüh nyiri sie nü shüvotsa thi aküwu akheri vü viru nü kükhurü sangü.

¹⁴Thitü povüküsari Barnabas thi Paul masü nüh jüma küthsüra vü masü thsümünyi zokhrimü nü nyiri azavü zhüwa taji zia nü,

¹⁵nyiri, nohri mokenüh hakümjie saveh lo? Hisü nga anyi nohri kümüjie wie, thi nohri tü zanyo müjuju hari vünüh khaphrü nü thajüwu thi azhih thi juküji thi jü lovü kütseri aveh sakütsü rhoküpehuo Saküüwuowa vü khaphrüle teru ti küsa Zhühthe Kümühiewa vi nohri vü kütsüwie.

¹⁶Khanavü teküwa tsotho vünüh nyiri aveh papa lekhuji vü tse üta ma nüh tsümüthuoh.

¹⁷Thitü ma tü ma mpa ma povüwa thuoüji müjawie, küpakenühnyunü ma nüh zanyo kümühie sanü rügivünüh atsorü thi azale aviküpe, nohri luoveh lokürakütsaküzhu thi loküzhe sa nohri tsüküveh kenüh.

¹⁸Azhü hamari küza nü nyiri nüh masü vü kükhurü sana küsa khetera zahza.

¹⁹Thitü Antiok thi Ikonium vünüh Judahri kürefü küsüru nü anyi jümari küchü nü aloh vi Paul veh taji ma tü sümüthuohtünyie ti sanü ma showa nyuküji alievü jamü.

²⁰Thitü sehnyiri nüh ma mükie peveh ünü ma tü süranü nyuküjiwa vü tetu, thi rülo künyiawa ma tü Barnabas sie nü Derbe vü tewa.

²¹Nyuküji jüla masü nüh Zhühthe Kümühiewa viküüza vü nyiri hozake sosie vira, jütisanü masü tü shele Listra thi Ikonium thi Antiok vü tewa.

²²Tsotükümü sietse jümari vü sakükhra thi kütsotü müja tümü üti küthotsü thi kümnomna hozake vünüh Saküüwuowa kajipe lovü tu naveh ti küza.

²³Jütisanü masü tü Nazizheh aveh vü sierhüri rükanü kükhuo sa thi assa sanü mari nüh tsotü kütseVÜWA akevü thsemü.

²⁴Jüsevü masü tü Pesidia kari nü Pamfilia vü teru.

²⁵Thi masü nüh Perga vü azhü küzakümü sevü Atalia vü tetsuo.

²⁶Thi jüla nüh masü tü juhiewa hie le Antiok vü teru, azhie jüla nyuri nüh masü vi Saküüwuowa küümze küüro sa üta küza nü masü nüh jüma sajutsü.

²⁷Thinü masü tü Antiok vü ruju ünü kümühuwa jizhuh nü Saküüwuowa nüh masü sie küürori aveh thi ma nüh mokümjie Judahmükünyuri vü kütsotü mükhiewa satsü nüh mari vü küzatsü.

²⁸Jüti sataji masü tü rülo hothake kütsotüri sie petewa.