Read Pochuri Naga KÜÜRORI 15 Bible Online

KÜÜRORI 15 - Pochuri Naga bible

KÜÜRORI 15

¹ Thitü anyi wuori Judea vünüh ru nü anyu jüla afürivü, “Nohri Mosa Khonyo müzhe taji ahu mükürhewienü mükülolera,” ti sosie.

²Thi Paul thi Barnabas masü nüh mari sie küzülamüküproluo thi mürüluo nüh sakümü asevü Paul thi Barnabas thi küpari wuori nga ti chuh taji nü azhü hama kenüh Jerusalem vü povüküsari thi kümühu kühuorivü küze.

³Jüti sataji kümühuwa nüh mari küüze vü mari tü tse Foenicia thi Samaria kariru nü Judahmükünyuri luoveh kükhaphrü zhükewa küza, thitü mari tü afüri vü hozake loküzhe tsü.

⁴Jütisanü mari ru Jerusalem ju ünü kümühuwa thi povüküsari thi kümühu kühuori nüh lozhe taji mari sieke, thi Saküüwuowa nüh mari sie momowa sanüh küza kheh.

⁵Thitü Farisiri zhie vü kütsotüri wuori nüh süra tsie taji, “Mari nga ahu mürheji mümühie, thi Mosa Khonyowa müzhe üta müküzaji mümühie,” ti küza.

⁶Jütiküsavü povüküsari thi kümühu kühuori tü sehzhu nü azhü hama kürüchie.

⁷Jütisanü tsotho hothake azhühnyo hama rüluokümüsevü Pitor nüh süra taji mari vü, “Eh füri, khanavü nüh Saküüwuowa nüh nohri azhie vünüh hi chuhnü eh po vünüh Judahmükünyuri tü Zhühthe Kümühiewa küna thi tsotü ti sana ta nohri nüh thsüvehthuoh.

⁸ Thi Saküüwuowa nyiri luoveh küthsüwa nüh mari vü povü satsü thi hiri vü kütsü kümüjie Judahmükünyuri vü nga Kümtse Sietse tsü.

⁹Thi ma tü hiri vü nga satü mari vü nga satü amüsheküpa münyie, jüüti küsanyunü kütsotü vünüh mari luoveh sakümtsera.

¹⁰Jükenüh nohri tü mokenüh khanavü apari nga thi hiri nga müküvüra thsokhuonyiwa vi sehnyira ku lovü thse nü Saküüwuowa müte veh lo?

¹¹Thitü hiri kütsotü thuoüji hiri nga VÜWA Jisu küümze vünüh mari kümüjie külole naveh,” ti küza.

¹²Jütiküsavü mühupeküvehri aveh nga zohmti peh nü Barnabas thi Paul masü nüh Judahmükünyuri azhie vü Saküüwuowa nüh küngoküürori thi küükrükükra küsari zhüku küphrate küna petewa.

¹³Masü nüh phratuo kümüsevü Jems nüh rüle taji, “Ehfüri, eh zhü künaluo!

¹⁴Saküüwuowa nüh ma nyo kenüh Judahmükünyuri azhie vünüh nyiri ji nta mari vü wa khu üta küsa Simon nüh phratetsüthuoh.

¹⁵Thi setsaküthsüri nga jüma zhü sie kümüshe küsüsa, jüma zhü rhüküsa hakümjie:

¹⁶“Hamasevü hi nüh sheleru David kürhope jiezeküvehwa salenaveh, samüsü küsari hi nüh sale taji khakütoke le naveh.

¹⁷Anyi küpari nga Saküüwuowa küüpha, thi Judahmükünyuri eh nyo jiküvehri aveh VÜWA küüphanaveh.

¹⁸Hamari küsawa nüh khana vünüh thsümüthuoh, ta VÜWAnüh küza,” ti rhüsaveh.

¹⁹Jükenüh eh kümüshe thuoüji Judahmükünyuri Saküüwuowa vü sühle kütseri saküüjakünya vühnyu.

²⁰Thitü mari tsorhe kükhurü, kütsaküzhu vünüh, thi küüphroküphrie amüke vünüh thi azüh kütsavünüh sakümüne küveh zhünyo rhü mari tsüluo.

²¹Jümatü khana teküwa tsotho vünüh nyuküji aveh vü Mosa Khonyo küsosieri nüh kümünyierülo aveh vü kükhurüzheri vü chiewiethuoh, ti küza.

²²Jütiküsavü povüküsari thi kümühu küwuori tü Nazizheh aveh sie nyiri mari azhie vünüh chuhzhu nü Paul thi Barnabas masü sie Antiok vü küzeji mühienatünyie ti müshe. Jütisanü mari nüh afüri azhie vü rühle küjokütsüri: Judas, Barsabas ti küjiwa thi Silas masü tü Paul thi Barnabas masü vü nyi küze.

²³Thi lasi hama rhü nü tsüküzenyie: “Hiri füküsari thi povüküsari thi kümühu kühuori nüh nohri Judahmükünyuri Antiok thi Siria thi Silisia vü küpe afüri vü loküzhe tsü veh.

²⁴Hiri nüh küünara, hiri nüh jüle nü müküüze nyiwuori ru nü nohri vü zhüküza nü nohri saküjakünya thi nohri luoveh sakümüsü ta küsa thsüra.

²⁵Jükenüh hiri aveh kürü sehzhu nü kümüshe küsü sataji anyi wuori rüka nü hiri küümzetsa Barnabas thi Paul masü ase nyiküze veh,

²⁶nyi hamasü tü hiri VÜWA Jisu Khrista kenüh kürho nga mükürüpa nüh kütsü künyi.

²⁷Jükenüh hiri nüh Judas thi Silas masü küzeveh, masü tü masü apo vü nga nüh azhü jümari küzara naküveh kenüh.

²⁸Küpakenühnyunü Kümtse Sietse kenüh nga thi hiri kenüh nga kümühiewa thuoüji nohri vü zanyo hamari küthse nyiavü küji münyie;

²⁹jüma thuoüji nohri tü kütsaküzhu vi tsorhe vü kükhurü küsa vünüh thi azhüh kütsa vünüh thi samüwa künyithekütsa vünüh thi küüphroküphrie küsavünüh nohri mpa nohri khetemü luo. Nohri hamari vünüh kükhetera nyia vü kümühie münyie. Kümühieti peh kheluo,” ti sanü rhütsü.

³⁰Jüti sataji mari nüh mari küüze kümüjie mari tü Antiok vü ru, thi kümühuwa jizhuh nü lasi rhüküüzewa vi tsü.

³¹Mari nüh küthokütsü lasi jüma chie nü lozhe sheh.

³²Thinü Judas thi Silas masü tü setsaküthsüri küsakenüh azhü hozake vi afüri küthotsü thi sakükhratsü.

³³Jüti sataji tsotho pike mari kürü peh nü afü jülaküperi nüh kümühieti mari küüzeri vü küzemü le.

³⁴Thitü Silas nü jüla peteküwa nüh küümpha kümüjie küsa kenüh jüla petewa.

³⁵Thitü Paul thi Barnabas masü thuoüji Antiok vü peh nü nyiri hozake sie nü VÜWA zhü sosie thi küza peh.

³⁶Rülo pike sevü Paul nüh Barnabas vü, “Ra, hisü kürü khanavü VÜWA zhü küza küsa nyuri vü wa lenü afüri mokümjie savehthuoh nüh wa no ünü,” ti ji.

³⁷Thinü Barnabas tü Johan, Mark ti küjiwa nga masü vü siewangütewa.

³⁸Thitü küsükeri Johan nüh masü sie küüro vü müwa nüh Pamfilia vünüh ma mpa shele teküwa kenüh masiemüküwawa nüh küümpha ti Paul nüh müshe.

³⁹Jüti sataji masü hozake rüluo nü poriemü nü Barnabas nüh Mark sie taji juhie hie nü Saipras vü tewa.

⁴⁰Thitü Paul thuoüji Silas rüka nü VÜWA küümze vünüh afüri nüh küüze kümüjie tewa.

⁴¹Jüti sataji ma tü Siria thi Silisia vü wa nü kümühuri sakükhra wa.