Read Pochuri Naga KÜÜRORI 17 Bible Online

KÜÜRORI 17 - Pochuri Naga bible

KÜÜRORI 17

¹Jüti sataji masü tü tse Amfipolis thi Apollonia kari nü Thesalonia vü ru, jüla tü Judahri künazizhe küsü peveh.

²Thinü Paul tü ma müke sakümüthuoh kenüh nazizheh lovü tu, jütisataji Zhia küche zhütsazhüri vi mari sie rüluo,

³Khrista tü münomüna she nü küsü vünüh rhomüsüraleji mümühie ta küsa zhünyo ma nüh phrate thi küza kümtsetsü. Jümpa mükünyu ma nüh, “Jisu hama hi nüh nohri vü küzaküvehwa tü Messiah wiethuoh,” ti küza.

⁴Jütiküsavü mari azhie vünüh anyi wuori thi Greekri künyitsari hozake thi nyimzari afüri azhie vü zanyo küsarari hozake ti Paul thi Silas masü ase nyizhetewa.

⁵Thitü Judahri kürefü küsü nüh noküma taji nyiri khukekümüsü küjakünya nü rhokütseri shieji küsü jizhuh nü nyuküjiwa saküjakünya tsü taji masü rewa nyiri ake vü thsena küsa kenüh Jason azhe mürie.

⁶Thitü mari nüh mari mphara nüh samü ünü mari tü Jason thi kütsotüri wuori sho taji nyuküji jüla kükhraküviri ake vü thse nü, “Anyi azhih khamülele kümüri tü hala nga tsethuoh,” ti küza.

⁷Thinü Jason nüh mari ma zhe vü sieke, thi mari aveh nga Romri Kajiwa khonyori mülo nüh sanü kaji küpa peveh, thi jüma thuoüji Jisu, ti küza.

⁸Thi nyiri nüh thi anyu jüla kükhraküviri nüh hama thsüra taji mari saküjakünya tewa.

⁹Thi mari nüh Jason vünüh thi küpari vünüh ti ame küthuohwavi nü küzemü.

¹⁰Thinü kütsotüri nüh müküzhikewie thuoh nüh Paul thi Silas masü rüza vünüh Berea vü küzemü, thi masü ru jüla ju nü Judahri künazizhe lovü tu.

¹¹Judahri hala küperi tü Thesalonia vü küperi nyia vünüh amüshe pie, küpakenühnyunü mari tü amüshe thse nü VÜWAzhü vi, rülo tsotho aveh wie nga zhütsazhü watü kheta thuohnü nyu nüh ta küsa müshe sheh nü küvi kenüh.

¹²Jükenüh nyiri hozake tsotü thi Greekvühri kümüsie vünüh kürhori thi nyimpari nga küzüla mütsotü.

¹³Thitü Thesalonia vü Judahri nüh Paul nüh Berea vü nga Saküüwuowa zhü sosieveh ta küsa küthsüra vü mari tü jüvü nga ru nü saküjakünya tsü thi anyi riekhuowa luovehküchü kümüsü tsü.

¹⁴Thinü kütsotüri nüh müküzhikewie thuoh nüh juküji wuovü Paul küzemü, thitü Silas thi Timothi thuoüji jüla küpemü.

¹⁵Thi Paul sieküwari nüh Athen küju sierutsü taji Paul nüh azhü vi Silas thi Timothi masü shiti ma vü ru üti küsazhülewa vü nü shele tewa, jütisanü mari poriemü.

¹⁶Jüti sataji Paul nüh Athen vünüh Silas thi Timothi huopeküvehvü anyu jüla tü tsorhe mpa nüh proküveh ngu nü ma sietse tü ma lo vünüh küraküpre tewa.

¹⁷Jükenüh ma tü rülo tsotho künazizhe vünüh Judahri nga thi jüla khurü küveh küpari nga, thi asüküsape vü nga thari mütu naveh nüh sie rüluo peh.

¹⁸Epikuria thi Stoik vü zanyoküthsüri wuori nga ma mütu nü sierüluo. Thi wuori nüh, ajaküzhiwa hamatü mowa küzana saveh nüh, ti sa. Küpari nüh, “Ma tü müküthsüri nyiaza kükhurü küsosieri kümüjie,” ti küza. Küpakenühnyunü ma tü Jisu thi kürholezhü küsosie kenüh.

¹⁹Jütisanü mari nüh ma shoh nü ma sie Areopagas vü ru nü, “Noh nüh küsosiezhü kürüthe vi hiri vü küüzawa hiri tü thsümühieveh ünü nyu lo?” ti küna.

²⁰Küpakenühnyunü noh tü zanyo kürüthe viru hiri khüna vü thse, jükenüh zanyo jüri tü mowa nüh hiri nga thsü nthelie, ti küza.

²¹Athenri thi anyi alie vünüh ru jüla kürhori aveh tü tsothoküpa vünüh müküze nüh kühaluo thi küsosiezhü kürütheküüna vünüh tsotho küüze sa.

²²Jütiküsavü Paul tü Areopagas zhila vü tsie taji, Athen nyiri, nohri tü anale vikümühieri ta küsa hi nüh zanyo aveh vünüh thsüra.

²³Küpakenühnyunü hi nüh tse kari küru vü nohri nüh kükhurüperi ngura, thi kükhurü vü hakümjie nga ngu, “Müküthsü Saküüwuowa kenüh,” ta rhü saveh. Nohri nüh müküthsüwa kükhurü ta saküsawa mazhünyo hi nüh nohri vü küza naveh.

²⁴Saküüwuowa azhih thi zanyo ma vü küperi aveh küsawa tü thajüwu thi azhih vü VÜWA sakümü kenüh anyira kenüh küsa kükhurüperi vü ma nü mpeh.

²⁵Jümpa mükünyu ma tü zanyo müma nüh kürholi thi rüthoküsah thi zanyo aveh vi nyiri aveh vü tsüküveh kenüh.

²⁶Thi ma nüh nyi küsü vünüh nyi rhoküveh aveh satsü, thi azhih aveh vü kürho nyiri satsü. Küütü vünüh mari rho na küsa tsothowa nga küte mütü thi mari kürhope azhiewa nga küte taji samütüthuoh.

²⁷Mari tü Saküüwuowa küüphawie, thi küluozhe vünüh ma kümüngu nü ma küphara ti sana küsa kenüh. Thitü ma thuoüji hiri nyi küsüvü nga nüh kietuomüveh wie.

²⁸Küpakenühnyunü wuori nüh küüza kümüjie: ma vünüh hiri tü rhoveh thi küngaveh thi hiri kürholi peküvehkenüh; Jüma zhüku tü nohri küriehiri wuori nga nüh küza, küpakenühnyunü hiri wienga ma tsari wiethuoh, ta küza saveh.

²⁹Jükenüh hiri tü ma tsari sakümü kenüh hiri ma kürhowa tü suna nyutü aloh amekükhrawa nyutü aloh anyira kesie thi kümüshe kümüjie vi küsavüh nyu.

³⁰Nyiri zanyomüküthsü vü thuoüji Saküüwuowa nüh ngu tü müküngu kümüjie nothoria mütüthuoh, thitü khinyi thuoüji nyiri azhie aveh vü luoveh kükhaphrü zhü tsüvehthuoh.

³¹Küpakenühnyunü ma nüh Nyi küsü rüka küsawa nüh künyitsa vünüh azhihwa ashi sana küsa kenüh rülo küsü küchesamüthuoh; thi nyi küsü sü taji nü saküürhole vünüh nyiri vü küzatomüthuoh.

³²Thi mari tü küsüri kürhole zhüku küthsüra vü wuori nüh riesa kükhri, thitü wuori nüh, “Hama no vünüh küna lehü naveh,” ti küza.

³³Jükenüh Paul tü mari vünüh alievü shutewa.

³⁴Thi nyi wuori thuoüji ma se nyi nü tsotü, jümari azhie vünüh Areopagit ti küsa ashiküsape vü levüwa Dionisius thi nyimzawa ma nyo Damaris thi küpari nga mari se nyi nü tsotü.