Read Pochuri Naga KÜÜRORI 18 Bible Online

KÜÜRORI 18 - Pochuri Naga bible

KÜÜRORI 18

¹Hamasevü ma tü Athen jamü nü Korinthia vü tewa.

²Thinü Judahri anyo Aquila ta küsa Pontus vünüh rhoküruri küsü ngura, kajiwa Klaudia nüh Judahri aveh Rom vünüh tewa üta küüza kenüh anyi jüma tü ma vüvüh Presila sie Italy vünüh teru taji masü no nti wa;

³masü athsüzhe sanü müliekütsari küsa kenüh masü siepetewanü mari kürü küro, küpakenühnyunü mari küüro thuoüji athsüzhe küsari küsa kenüh.

⁴Jütisanü ma tü Kümünyierülo kürüzhu künazizhe vünüh haluo nü Judahri thi Greekri khieloti küthotsü.

⁵Silas thi Timothi masü Mesedonia vünüh ru küjuvü Paul tüVÜWA zhü phrate taji Messiah tü Jisu wiethuoh ti povü sa la.

⁶Thitü mari nüh ma sie küproluo thi ma müzü ti sa, thinü matü ma thsümünyi küthe taji mari vü, “Hi müküle münyietinü nohri züh tü nohri lü vü waluo. Nosü vünüh tuvü thuoüji hi nü Judahmükünyuri vü tewanathuoh,” ti küza.

⁷Jüti sataji ma tü jüla nüh tse nyi küsü ma nyo Tita Justus ti küsa Saküüwuowa kükhurüri küsü azhe vü wa, ma zhe tü künazizhe kütuovü peh.

⁸Künazizhe küüchewa Krispas tü ma zhelori aveh sie VÜWAtsotütera, thi Korinthia vü nyi hozake Paul zhüküünari tü tsotü taji baptis sa.

⁹Rüza küsü VÜWA nüh kümohtsa vünüh Paul vü, “Mükrütümü thi zoti mpetü azhüwa küzapehuo luo,” ti küza.

¹⁰Küpakenühnyunü hi nüh no siepeveh, thinü nyi küsü nga nosakümüsü nta no küphawanyu, küpakenühnyunü nyuküji hala anyi hozake peveh.

¹¹Jüti sataji ma tü jüla mari azhie vü Saküüwuowa zhü sosie nü mavi küsü nü asah türo peh.

¹²Thitü Galio nüh Akhaiya ti küsa Romri kümükhrüwa sa ünü Judahri tü kürü tsarü nü Paul müküle phah taji ma sie ashiküsape atüvü wa nü

¹³mari nüh, “Anyi hamatü khonyo mükünyu vi Saküüwuowa khurü üta nyiri küchü tsehuoveh,” ti küza.

¹⁴Thinü Paul tü zhü küza nti ma po ka ünü Galio nüh Judahri vü, “Zhünyo hamatü müküle sakümü nyutü khuke kümüsü sakümütüla, halie Judahri, hi nüh nohri apo vi naveh.

¹⁵Thitü hama tü azhü küruoluo kenüh thi anyori thi nohri khonyo kenüh sakümü kenüh, nohri mpa nüh noluo, hi thuoüji zanyo hari thuoüji sakümüshomütsüra,” ti küza.

¹⁶Jüti sataji ashiküsape vünüh ma nüh mari zhejamü.

¹⁷Thinü mari aveh nüh künazizhe küüchewa Sosthenes sho nü ashiküsape atü vünüh fe. Thitü Galio tü hama vü luovehkütsaza küsü nga müsanüh sa.

¹⁸Hamasevü Paul tü rülo hothake hala petewa, jütisanü Paul tü jüla ma füri sieporietewa, thi ma nüh Presila thi Aquila sienü juhie hie Siria vü tewa. Saküüwuowa vü küshie kütsüküsü küpe kenüh Senkhrea vü müjie küwa atüvü nüh ma lü semü.

¹⁹Jütisanü mari tü Efesa vü teru, thi ma tü mari jamü nü künazizhe vü wa nü Judahri sie haluo.

²⁰Tsotho noh kenüh peh üti mari nüh ma vü küzatü ma nüh kürümü.

²¹Thi ma nüh mari sie porie nti sanü mari vü, “Saküüwuowa kümüshe thuoüji hi nüh shele nohri vü rulewie naveh,” ti küzanü Efesa vünüh juhie hie nü tewa.

²²Jütisanü ma tü ru Kaisaria küju vü Jerusalem vü wa taji kümühuwa loküzhezhü tsümü nü Antiok vü tetsuo.

²³Rülo pike jüla pekümüsevü ma tü Galatia thi Frijia azhih azhiezhie vü küzhu nü kütsotüri sakükhrawa.

²⁴Jütiküsavü Judahri nyo Apollo ti küsa Alexandria vünüh rhoküshururi küsü Efesa vü ru, ma tü azhüküphrathsütsahri küsü thi Zhütsazhü küthsü shehri küsü.

²⁵Ma kürünguo vünüh VÜWA lekhuji vi nü ma sosie, thi ma tü sietse vü tsazasheh kümü kenüh ma nüh Johan baptist zhüku mpa thsüwie ketünga Jisu kürho aveh khemti vi küza thi sosie.

²⁶Ma tü luoveh müzho she nü künazizhe vü zhüküza; thi Presila thi Aquila masü tü ma zhü küünara vü masü tü masie masü azhe vü wa taji, Saküüwuowa lekhujiwa hozake khemti küza tsühü.

²⁷Jütisanü Apollo tü Akhaiya vü wa nti sa ünü ma füri nüh ma luoveh sakümüzhotsüle taji, kütsotüri tü ma sieke ti küsawalasi rhütsü, thi ma jüla ru ünü Saküüwuowa küümze vünüh kütsotüri aveh ma nüh hozake kükratsü.

²⁸Küpakenühnyunü ma nüh Jisu tü Messiah wiethuoh ta küsü Zhütsazhü vünüh nyiri atü vünüh müzho she nü Judahri vü küjokütsa.