Read Pochuri Naga KÜÜRORI 19 Bible Online

KÜÜRORI 19 - Pochuri Naga bible

KÜÜRORI 19

¹Jütiküsavü Apollo tü Korinthia vü peveh ünü, Paul tü anyuwieh vünüh tsekari Efesa vü ru. Thinü ma tü hala kütsotüri wuori ngura.

²Thinü ma nüh mari vü, “Nohri tü Khrista kütsotüra vü Kümtse Sietse ngura ülo?” ti küna. Thinü mari nüh, “Nyu, hiri nü Kümtse Sietse peveh ta küsa nga mükünara wie,” ti küza.

³Thinü ma nüh, “Thinü nohri tü khiemawa baptis sa lo?” ti küna. Thinü mari nüh, “Johan Baptist vünüh sa,” ti rüle küza.

⁴ Thinü Paul nüh, “Johan thuoüji luoveh kükhaphrü baptis tsünü ma sevü kütsewa Jisu tsotü üta küsa küza,” ti küza.

⁵Hama künara nü mari tü VÜWA Jisu nyo vünüh baptis sa.

⁶Jüti sataji Paul nüh ma ke thsuo taji mari vü thse ünü Kümtse Sietse tü mari vü ru, thinü mari tü tsotora zhü vünüh setsaküthsü zhü phra.

⁷Thi mari aveh küsaji türakünyi.

⁸Thi ma tü künazizhe vü tu nü asah küche luoveh müzho she nü Saküüwuowa zhü vi haluo thi küzakümüzho.

⁹Thitü wuori nü luoveh kho thi mütsotü nüh sakümüvü nyiri atü vünüh VÜWA lekhujiwa phrakümüsü, thinü ma tü mari vünüh tewa nü kütsotüri sie wa Tairanas azhe vünüh rülo aveh haluo peh.

¹⁰Hakümjie mahvi künyi Asia vü küperi aveh Judahri nga thi Greekri nga VÜWA zhü thsüra.

¹¹Jütiküsavü mükünguphie tsatsa küngoküürori Saküüwuowa nüh Paul vünüh sakütsa.

¹²Jütisanü rüshikünethsü nyutü athsü küshihkütsekewa viwakünari küwi nü küna sakümühiera sa thi sietse kümüsüringa shuteküru sa.

¹³Thi küze tse nü küzhu kütsehuo Judahri tümari wuori nga sietse kümüsü peküvehri vü VÜWA Jisu nyo ji taji, “Paul nüh vi sosie kütsewa Jisu nyo vünüh hi nüh nohri vü küzaveh,” ti küsa zhüwa phrate tewa.

¹⁴Jütiküsavü Judahri levü küjiwa Siva tsa türüri tü hama sapeh.

¹⁵Thitü sietse kümüsüwa nüh mari vü, “Hi nüh Jisu thsüveh thi Paul thsüveh, thitü nohri nü thari lo?” ti küna.

¹⁶Thinü kümüsü sietse ma vü pehküvehwa tü mari vü joke taji, mari chara nü mari nyia vü khrara, thi mari tü müsamüna nü mari satsa kürütso sataji azheh jüla nüh shutewa.

¹⁷Thi hamatü Efesa vü küperi Judahri thi Greekri aveh vü thsütewanü mari tü kheloti krü; jütisataji VÜWA Jisu nyo tü tholashe tewa.

¹⁸Thi kütsotüri hozake ru nü papa küsa momowa samüthuoh nüh phrazhu thi küzaküthsü.

¹⁹Thi kütüma lasi vünüh thsü taji tü ma kütseri hozake nga mari lasi viru nü nyiri aveh tü vünüh tsokhehmü, thi lasi jümari ame kürüh küwa vü rake anyie tünyieke chiezhura.

²⁰Jükümjie VÜWA zhü tü khra taji nyuo thi müzho shuh tewa.

²¹Zanyo hamari sajukümüsevü Paul tü Sietse vünüh kürathuohnü Mesedonia thi Akhaiya vehthuoh nü Jerusalem vü wa nti sataji jüla wa kümüsevü, “Hi tü Rom vü nga müwaji mümühie,” ti küza.

²²Jüti sataji ma kükrakütse künyi Timothi thi Erastas masü Mesedonia vü küzemünü ma thuoüji Asia vü rülo pike petewa.

²³Jütiküsa tsothovü VÜWA Lekhujiwa zhünyo küzüla nga müküjakünya.

²⁴Jütiküsavü ma nyo Demetrius ti küsa raka küsahri nyi küsü Artemis vühwa kükhurüzhe sanü azheküsari hozake sie sanü küzüla nga münyia nüh sasati.

²⁵Hamaritü ma nüh küüro zarike küsa küürori jizhuh taji, “Efüri, hiri tü küüro hala nüh künyirhie nguraveh ta küsa nohri nga thsüvehthuoh.

²⁶Thi nohri nga thsü thi künaravehthuoh, Efesa vü mpa mükünyu Asia azhih aküzhi vünüh Paul hama nüh nyiri küchü nü nyiri hozake sakümüsü nü ake nüh küsa nyiazari tü kükhurüvü nyuta küzaveh.

²⁷Thi hiri küüro hama akükrü mpanyunü, müküchieküüjakünya nga sanaveh, thi kükhurü hama künazizhe lovü küpewa nga ame mükünyie kümüjie samünathuoh, thi Asia thi azhih aveh kükhurü hama sakümüsie müwa nü sakürünyie tewanathuoh,” ti küza.

²⁸Hama küthsüra vü mari tü khieloti arüshu nü zie taji, “Artemis thuoüji Efesa vü küjiwa wiethuoh,” ti küza.

²⁹Jütiküsa kenüh nyuküji jüla küüjakünya nüh protewa; thi mari tü zhüwa Paul sie refü nü aküzeh tsekütse Mesedoniari Gaius thi Aristarkhas masü shoh nü sie saküüzhiepevü tewa.

³⁰Paul tü anyi shiejiwa aza lovü wa nti müshe, thitü kütsotüri nüh müküzenti sa;

³¹thi Asia vü küji ma fü wuori nga saküüzhiepevü müwatümü üti azhü küza nü khuo.

³²Kümühuwa tü küjakünya nü wuori nüh azhü küsü zie thi wuori nüh azhü küpa küza ti sanü mari mowa kenüh ru sezhuhveh ünü mari anyi hozake nga azhünyo müthsü nüh samü.

³³Judahri nüh ma atü vü küüze kenüh anyi wuori nüh Alexander tü sierhüri ta küsa zhühthuo. Thitü Alexander tü ma kethsuo nü nyiri khehte taji phrate küümühie azhü phra.

³⁴Thitü ma tü Judahri ta küthsüra vü mari aveh ajikhi küsü sanü münühu künyi zie taji, “Artemis thuoüji Efesa vü küjiwawiethuoh,” ti sa.

³⁵Jütiküsavü anyu jüla kürhüwa nüh anyi shiejiwa saküüzohmü taji, “Efesa nyiri, Efesa anyu tü kükhurüzhevü Artemis küjiwa thi aloh kümtse rügi vünüh tsuotsaküturu kühuowa ta nyiri aveh nüh thsüveh.

³⁶Thi hamari ngu nü nohri tü mükürüra, thi nohri tü zota küpele thi müküzü küsavühnyu.

³⁷Küpakenühnyunü nohri nüh anyi sieru küsa hamasü tü kükhurüzhe vü zanyo kürühuri nga nyu thi kükhurüvühwa phrateküümüsüri nga nyu.

³⁸Jükenüh mükütüküzü Demetrius thi ma sie nü küro kütseri nüh anyi wuori vü müshekümüsü peveh üji ashiküsazheri nga sa sawieveh, thi ashiküsari nga peveh, mari mpa küsü nüh küsümüküleri viru luo.

³⁹Thitü nohri nüh jüma nyia vünüh zanyo küsüküsü nga phalehüveh üji kümühu tsotho vünüh sakükatotsü naveh.

⁴⁰Küpakenühnyunü nosü mazhünyo münyie nüh küjakünya küvehwa vünüh müküle kütsü krü veh, thi küjakünya küveh zhünyo hamari hiri vü küna thuoüji hiri tü kürülera kümühie münyie luo,” ti küza.

⁴¹Thi ma nüh hama küzajumü nü küsehzhuwa tü porie küzemü.