Read Pochuri Naga KÜÜRORI 2 Bible Online

KÜÜRORI 2 - Pochuri Naga bible

KÜÜRORI 2

¹ Pentecost tsothowa ruju ünü mari aveh tü azhie küsü vü sehzhu kheh.

²Thinü zhürüluo akhi amürhü khieloti mürhü kütse kümüjie thajüwu vünüh ru nü mari nüh peküvehazhewa protewa.

³Thi anyih amizhi kümüjie küsa mari vü turu nü küsuoporie mari nyi küsüsü lü vü peh tewa.

⁴Jütisanü mari tü Kümtse Sietse nüh pro taji Sietse nüh sa kütsü kümüjie anyu küpapa zhü phra kheh.

⁵Jütiküsavü thajüwu kükhuvü kürho anyi müküzüküzü azhie vünüh Judahri künyitsari ru Jerusalem vü peveh ünü;

⁶anyi jümaritü akhi jüma thsüra taji ru kheh, thi mari tü mükümüshera sa, küpakenühnyunü anyi jümari tü mari azhü vünüh küphra kenüh.

⁷Thi mari tü krü thi ngo taji, azhü phraküveh hamari tü Galileeri nyu ülo?

⁸Thinü hiri tü mokümjie mari nüh hiri azhü küphra künara veh lo?

⁹Hiri wuori thuoüji Parthiari, Midiari, Elamri, thi wuori thuoüji Mesopotamiari, Judeari, thi Kapadokiari, Pontusri, thi Asiari,

¹⁰Frigiari thi Pamfiliari, Egyptri thi Siriari vü küpe Libiariwuori nga, thi Rom vünüh küruri nga, Judahri thi Judahmükünyuri luoveh khaphrü nü Judahri nale vü küruri nga,

¹¹Kretri nga thi Arabri: thinü mari tü mokümjie Saküüwuowa küüro aküji hiri azhü vünüh phratehiri küüthsü veh lo!

¹²Thi mari tü ngo thi müsherüza taji küsü nüh küsüvü, “Hatü mowa thuoh lo?” ti sa.

¹³Thitü küpari nüh kütsotüri riesanü, “Mari thuoüji akha aji juh zhu tajinü müshevehthuoh,” ti küza.

¹⁴Thitü Pitor tü türaluokeri sie süratsie nü ma jikhi rera taji nyiri vü, Judea nyiri thi Jerusalem vü kürhori, nohri hama thsü taji hiri zhü nohri khüna vü thse luo.

¹⁵Küpakenühnyunü nohri nüh müsheküveh kümüjie anyi hamari tü zhu müshemüveh, küpakenühnyunü khinyi tü rüne münühu küche mpawie;

¹⁶thitü hama tü setsaküthsüwa Joel nüh phrateke küsa:

¹⁷Saküüwuowa nüh küüza, “Wa tsotho sehkheri vü, hi nüh eh Sietse nyiri aveh vü küshoketsü naveh, thi nohri tsa nyimpari thi nyimzari nüh setsaküthsüzhüphra naveh, thi nohri azhie vü vizari nüh kümohtsari ngu naveh, thi nohri azhie vü nyikükhruori nüh amo mo naveh;

¹⁸jüüta sawie naveh, thi hi nüh eh siepe nyimpawa vü nga nyimzawa vü nga eh Sietse küshoke tsü naveh, thi mari nüh setsaküthsüzhü phra naveh.

¹⁹Thi hi nüh thajüwu rügi vünüh küngo küürori thi thsoshiri sa azhih vü kürhori kütsanaveh, jüvü azüh, thi anyih, thi akülu küshüphoh sanaveh.

²⁰VÜWA rülo küzhüku thi küthola müjie saküru atüvü rünyi khaphrüle tewa naveh, thi asah nüh azüh jetewa naveh,

²¹Thi thari nüh VÜWA nyo ji naveh nüh jümari nü külole naveh ta küza saveh,” ti küza.

²²Israel nyiri, azhü hari künaluo: nohri mpa nga thsüvehthuohnü, Jisu Nazareth nyiri sawie taji nohri azhie vünüh Saküüwuowa tü ma vünüh küngo thsoshi thi küngo küüro sataji rügivü kükhrari nohri vü sakütsathuoh.

²³Jisu hamatü, Saküüwuowa nüh küütü vünüh thsüthi müshe kütuo nü teküru kümüjie nohri nüh ma retaji kükhiemuori kevü thse nü khieluothso rügi vünüh ma zeke thi fethemü.

²⁴Thitü Saküüwuowa nüh aküsü kükhra jüma leja mütü taji ma kürholetsü, küpakenühnyunü jüma nüh ma pheh müküüsara kenüh.

²⁵Küpakenühnyunü David nüh ma zhüku küüza; Tsotho aveh hi nüh VÜWA eh tüvü ngu pehuoru, küpakenühnyunü hi vi müküüngana küsa kenüh ma tü eh ke azhiewuovü pehuotüveh,

²⁶Jükenüh eh luoveh tü lozhepehuo, thi eh mizhi tü küriahi khi sa pehuo, jümpa mükünyu, eh satsa ha wie nga küluozhe vünüh rhonaveh.

²⁷Küpakenühnyunü noh nüh eh sietse vi nyihsuozü lovü küthsewanyu, nyutü no Kümtsewatü küpriküra künguwanyu,

²⁸Noh nüh kürho lekhujiwa vi hi kütsamüthuoh, noh nüh noh tüvü hi tü alomüküzherhüra sanathuoh, ta küza küsa kenüh.

²⁹Eh füri, hi nüh hiri anyi David zhüku zhütsa vünüh küza naveh, ma tü sü taji chowumüthuoh thi nosü küju nga ma rüku tü hiri kütuovü peh wieveh.

³⁰Ma tü setsaküthsüri küsü thi Saküüwuowa nüh mavü zhühthuo nü ma küshukütu vünüh nyi küsü ma kajipe rügivü küüpeh nta küsa thsü.

³¹Khrista vi nyihsuozü kükhu vü müthse nüh nyutü ma satsa tü müküpriküra nüh küürhole na ta küsaküütü vünüh thsü taji phratetsü.

³²Jisu hamatü Saküüwuowa nüh saküürholewa thi hiri aveh nga jüma povüri kheh.

³³Jükümjie ma tü sakümüsie taji Saküüwuowa ake azhie wuovü peh thi Pawa vünüh zhühthuo küsa Kümütse Sietsewa ngura thi manüh küshozhu tsüthuoh, thi nohri nüh jüma küngu nga ngu thi künarathuoh.

³⁴Küpakenühnyunü David thuoüji thajüwu rügivü mükuowie ketünga ma nüh: “VÜWA nüh eh VÜWA vü küüza eh ke azhie wuovü pe luo,

³⁵Hi nüh noh mükünongüri vi noh jinyipe müjieküsaküjunü,” ti küza.

³⁶“Jükenüh Jisu hama nohri nüh zekekümüwatü VÜWA nga thi Khrista nga ti küsa nohri Israelri aveh thsüto luo,” ti küza.

³⁷Mari tü hama küthsüravü mari luoveh tsoküna shekete wa taji Pitor thi VÜWA povü küsa küpari vü, “Füri, hiri tü mowa müsaji mümühiethuoh lo?” ti küna.

³⁸Thinü Pitor nüh mari vü, “Nohri luoveh khaphrü nü nohri kükhiemuo noja naküsa kenüh nohri nyi küsüsü nga Jisu Khrista nyo vünüh baptis saluo, jütathuoüji nohri Kümtse Sietse kütsia ngu naveh.

³⁹Küpakenühnyunü zhühthuo küsa jümatü nohri kenüh thi nohri tsari kenüh thi letsuo teküwari kenüh wiethuoh, jümpa mükünyu VÜWA hiri Saküüwuowa nüh thari ma vü jikenaveh nüh jümari aveh kenüh nga wiethuoh,” ti küza.

⁴⁰Thi ma nüh azhü küpapa vünüh povü sa thi mari küthotsü taji mari vü, “Nyi kümüsü hamari vünüh nohri mpa külole luo,” ti küza.

⁴¹Jüti sataji ma zhüküviri tü baptis sanü jürülo vünüh kürholi anyie küche mari azhie vü turu.

⁴²Jütisanü mari tü VÜWA povü küsari nüh küsosievü thi kümpamüwu vü, lohse zokhuo nü kütsa vü thi kükhuovü ti müjathuoh nüh tsotho aveh mari vü peh.

⁴³Küngoküüro thi thsoshi hozake VÜWA povü küsari nüh sanü kükrü kürholi aveh vü teru.

⁴⁴ Kütsotüri aveh tü zanyo aveh vü kükreh she thi zanyo aveh nga zhiküsü satewa.

⁴⁵Thi mari tü zhe zhuh aveh thi zanyosürü aveh zhu nü thari nüh küzake küngule ünü küsuotsü.

⁴⁶Thi rülo aveh vü kürü Kükhurüzhe vü wa thi mari azhe vünüh lohse zokhuo tsa, thi amüshe müza she taji külozhe vü ashiekürütsa ti sapahuo.

⁴⁷Saküüwuowa siake thi nyiri aveh sie külozhe küsü vüpeh. Thi rülo aveh vü VÜWA nüh külolekümüri vi mari azavü chieküzhike pehuo.