Read Pochuri Naga KÜÜRORI 20 Bible Online

KÜÜRORI 20 - Pochuri Naga bible

KÜÜRORI 20

¹Jüsevü küüjakünyawa lekümü sevü, Paul tü kütsotüri thoküze taji mari küthotsü nü Mesedonia vü tewaluo nti sanü mari poriemü.

²Ma nüh azhie hamari vü wa taji küütho tsümü nü Greekri vü teru.

³Ma hala asah küche peh, ma tü Siria vü tewa nti sa veh ünü Judahri nüh aro kümüsü küsü ma vü phaküveh kenüh Mesedonia vehthuoh tewa nti müshe.

⁴Thi Biria vünüh Pirhus atsa Sopater, Thesalonia vünüh Aristarkhas thi Sekundas, Derbe vünüh Gaius, Asia vünüh Taikhikas, Trofimas thi Timothi ti ma vü nyi wa.

⁵Anyi hamari tü hiri tüvü wa nü Troas vünüh hiri huola.

⁶Thitü Ahzhi müthse nüh Lohse kütsa Khu rülo hiri juhiewa hie nü Filipi vü tewa, thi rülo müngaawa hiri tü Troasvü teru, thi hiri jüla rülo türü petewa.

⁷Thi Nyuah rülo vü hiri sehzhu nü kürü lohse zokhuo tsa nti saveh ünü, Paul tü rülo jüma nyia tewa ngü nü mari siekürüchie, thi ma tü azhü küzawa tsotüla ju.

⁸Hiri küpehpe azhe küshothuoh rügiwa vü anyihku hozake tso saveh.

⁹Jütiküsavü vizari küsü ma nyo Eutikhas tü mürhülepie vü shupe veh. Thi Paul nüh azhü küza suotewa ünü zehmophoketewa, thi zemopho küluoteküwa kenüh azhe küjüke küchekümüsie rügi vünüh tsuotsaru nü khake no ünü sümüla.

¹⁰Thi Paul nüh wa nü kükiatsuo ma vü hiephake nü ma kheketaji, “Mütsazatümü, ma tü rho pewieveh,” ti küza.

¹¹Jütisanü Paul tü azhe rügivü wa nü lohse zokhuo tsanü tsotho hothake mari sie jüle taji thoru chi ünüh mari sieporie.

¹²Thi mari tü jüma rho nü sieküwara kenüh hozake lozhe.

¹³Hiri tü küütü juhie vü wa nü hie Asos vü tewa taji jüla nüh Paul vü nti müshe, küpakenühnyunü ma tü jüvünüh ajih vünüh kuoküwa kenüh.

¹⁴Jüti sataji ma tü Asos vünüh hiri mütu nü hiri nüh ma vü taji Miletus vü teru.

¹⁵Thi jüma rülo vü jüla nüh hie nü Khios küwiejie vü teru, rülo künyiawa Samos vü ru, thi rülo jüma nyia hiri Melita vü teru.

¹⁶Küpakenühnyunü Paul tü Efesa hie kari tewa nta kümüshekenüh, jütathuoüji ma tü Asia vü mpeh nüh küsakümhie sanü Pentecost tsotho vü Jerusalem vü peh nta prekütse kenüh.

¹⁷Thi ma nüh Melita vünüh Efesa vü nyiri küze taji Kümühuvü sierhüri ma vü ji küüru.

¹⁸Thinü mari tü ma vü ru ünü, ma nüh mari vü, hi nüh Asia vü küru pokhu vünüh nohri azhie vü tsotho aveh rho taji,

¹⁹rünyi thi rüthsüshu thi Judahri aro vünüh kümüte hozake hivü ru wie ketünga VÜWA küüro küsa nohri nüh thsüthuoh.

²⁰Thi nohri nüh müviji mükümühiewa nyiri müza atüvü nga thi nohri nyi küsüsü azhe vü nga müsosie nüh sakümü müsa,

²¹hi nüh luoveh khaphrü taji Saküüwuowa vü küwa thi VÜWA Jisu Khrista vü kütsotü küpeh Judahri vü nga thi Greekri vü nga povü satsü.

²²Thi khinyi thuoüji, halie, Sietse kükhu vünüh hi tü Jerusalem vü tewa nathuoh, thi jüla hi vü mowa ru naveh nüh müthsü nüh wa nathuoh;

²³thi anyi aveh vü hi tü aküsi sana thi kümnomna ngu na ta Kümtse Sietse nüh hi vü küzamüthuoh.

²⁴Thitü hi tü eh küüro saju thi VÜWA Jisu nüh sa üta hi nüh künguri Saküüwuowa küümzewa povü sa nta wieküchie nüh hi mpa kürho hama kenüh thuoüji ame kükhra nyutü kümühie vü chieke müveh.

²⁵Thi halie, khinyi thuoüji hi nüh khiekhiela nohri azhie vüVÜWA kajipeh phrate nüh nohri tü e tso müngu nüh samünathuoh.

²⁶Jükenüh hi nüh nosü nohri vü küzaküveh thuoüji nohri nyiküsü wienga kümiemüwie ketünga nohri azühwa tü eh lüvü nyu.

²⁷Küpakenühnyunü hi nüh müküzhithuoh nüh Saküüwuowa kümüshe aveh vi nohri vü küzamüthuoh.

²⁸Nohri mpa nga thi ariakhuowa aveh nga riazi peh luo, jüma kenüh Kümtse Sietse nüh nohri küünowa Saküüwuowa nüh ma mpa ma Tsa azüh nüh kümühu aveh süküsari avo sa üta samüthuoh.

²⁹Hi teküwa asevü rezanyihnyih nohri azhie vü ru taji ariakhuowa zheküporiemü;

³⁰thi nohri mpa nohri azhie vünüh azhü mükünyu küphra shuru nü kütsotüri sie mari asevü tewa nathuoh.

³¹Jükenüh hi nüh amahvi küche mükütuowie thuoh nüh e rüthsüshu nü nohri aveh küchü küru müshe nü riazi peh luo.

³²Thi khinyi thuoüji hi nüh nohri vi Saküüwuowa küümze ke vü, thi ma küümze zhülewa vü thsemüthuoh, jümatü nohri saküüjirawa thi kütsia kütsüwa, thi jümatü Saküüwuowa nüh ma nyiri kenüh saküvehwa wiethuoh.

³³Hi thuoüji nyi küsü raka nyutü suna nyutü athsü nga müngumüru.

³⁴Hi tü eh ke künyi vi küro taji eh kenüh thi hi siekütseri nüh müviji mükümühie aveh satse ta küsa nohri mpa nüh thsüveh.

³⁵Hi nüh nohri tü kümükhra nüh küro nü mükükhrari kükra, thi VÜWA Jisu nüh, “nyuri vünüh zanyo küngu thuoüji zanyo vinyuri kütsü nüh kütsia küüngukhe,” ta küsa küüza zhüwa küümüshe na küsa kenüh hi nüh zanyo hari aveh vünüh nohri küthsüveh, ti küza.

³⁶Thi ma nüh azhü hari küza kümüsevü ma tü khotsü nü mari aveh sie kükhuo sa.

³⁷Thi mari aveh tü krie taji Paul khephoke thi ma kümetsü.

³⁸Ma nüh mari vü nohri hi müngulerathuoh ta küüza kenüh mari aveh tü lorütewa. Jüti satajinü mari tü ma siewa juhie rügivüthsemü.