Read Pochuri Naga KÜÜRORI 22 Bible Online

KÜÜRORI 22 - Pochuri Naga bible

KÜÜRORI 22

¹“Eh füri thi eh pari, hi nüh khinyi hi mpa eh povü nohri atüvü küza nasaküveh künaluo,” ti küza.

²Jütisanü ma nüh Ebriri zhü vünüh mari vü azhüküüza mari tü thsü nü shientü nyia vünüh zoti petewa. Thinü ma nüh:

³Hi thuoüji Silisia vü Tarsus ti küji anyu vünüh küwuo Judahri küsü, thitü anyuküji Jerusalem hala nüh hi tü rhoshuhru taji nosü nohri kümüjie Saküüwuowa kenüh luoveh tsaza kümü kenüh Gamaliel ajih vünüh khanavü e lahnyiri Khonyo kümüzho müzhenü chie.

⁴Thi Küülole lekhujiwa müzhekütseri aküsü vü vithse nti nyimza nyimpa sakümnomna nü pheh taji küsizhe lovü thse.

⁵Jümatü Levü Kümüsiewa thi Kükhruori Kümühuwa aveh nga thsü veh. Mari vünüh lasi vi nü Damaska vünüh vüwa nü afüri jüla küperi re taji sie Jerusalem vü ru nü kümnomna tsü nti sa.

⁶Jüti sataji hi tü tse Damaska shenyi tse ünü rülo vü rünyiküzeto kümüjie küsavü küwie küji küsü zhürüluo hi vü wiephake tsü.

⁷Thinü hi tü azhih vü kükietsuo zetewa ünü ajikhi küsü hivü küru künara, “Saul, Saul, noh tü mokenüh hi sakümnomnaveh lo?” ti küza.

⁸Thi hi nüh ma vü, “VÜWA noh tü thawa lo?” ti küna. Thinü ma nüh hi vü, “Hi thuoüji noh nüh sakümnomna kütsewa Jisu Nazareth wiethuoh,” ti küza.

⁹Jütiküsavü hi siekütseri tü küwiewa nü nguthuoh, thitü hivü küüzawa jikhi thuoüji mükünara.

¹⁰Thinü hi nüh, “VÜWA hi tü mowa müsaji mümühie lo?” ti küna. Thinü VÜWA nüh hi vü, “Süra taji Damaska vü waluo, jütathuoüji hi nüh noh momowa küüsa nta küchesa veh nüh noh vü küza naveh,” ti rüle küza.

¹¹Jütiküsavü aküwiewa kenüh zanyo müngura nüh sakümüvü hi siekütseri nüh eh ke si nü Damaska vü wa.

¹²Thi jüla rhoküpe Anania ti küsa Khonyo müzhe nü nyitsa taji rhokütseri Judahri aveh nüh phrate küümühieri küsü,

¹³ru eh kütuo vü tsie nü hi vü, “Eh nü Saul, noh notha zanyo nguluo,” ti küza. Thinü müküzhikewiethuoh nüh jüma tsothovü kheti eh notha pie nü ma ngura.

¹⁴Thinü ma nüh, “Hiri pari Saküüwuowa ma müshe küüthsü nta, Künyitsawa küüngu nta thi ma po vünüh jikhiwa küüna nta noh rüka saveh.

¹⁵Küpakenühnyunü noh nüh küngu thi küünarawa vi nyiri aveh vü povü küüsa nta küsa kenüh.

¹⁶Jükenüh noh tü mokenüh hakümjie peveh lo? Süra nü baptis sataji ma nyo ji nü noh kükhiemuo phrüjamü luo,” ti küza.

¹⁷Jütisanü hi tü shele Jerusalem vü ru taji Kükhurüzhe vünüh kükhuo sa peveh ünü mükükora aküze sanü zehphoketewa nü,

¹⁸hi tü ma ngu, thinü ma nüh hi vü, “Müküzhiketü shishiti Jerusalem vünüh tewaluo, küpakenühnyunü mari tü noh nüh eh povü küsawa küünawanyu,” ti küza.

¹⁹Thinü hi nüh, “VÜWA, hi nüh künazizhe aveh küsizhe lovüthse thi noh kütsotüri aveh fe ta küsa mari mpa nüh thsüvehthuoh.

²⁰ Thi noh povü küsawa Stefen küfethevü hi nga jüla tsie nü mari sie kümüshe küsü sanü ma küfethera thsümünyi hi nüh huote petü,” ti küza.

²¹Thinü ma nüh hi vü, “Teshu luo, hi nüh noh Judahmükünyuri vü leküsuovü küzenathuoh,” ti küza le.

²²Azhü haküju mari tü ma zhü küna nü mari azhü zie kürügishe nü, “Azhih hala nüh anyi hakümjie küsari fethemü luo, küpakenühnyunü ma tü mükürholuoketünga azhümünyie,” ti sa.

²³Thi mari tü zie nü mari athsü vi shoküthe nü azhitho arügivü vehjake nü,

²⁴anyie nyia küjiwa nüh ma sie arienyiri küpehpe vü wa üti azhütsümü, thi mokenüh nyiri nüh ma vü jüzake azhü zienü thsü na küsa kenüh alikümülah nüh ma fe üti azhütsü.

²⁵Jüti sataji mari nüh sahuli vi nü ma kürimü ünü, Paul nüh ma kütuovü peküveh müzake nyia küjiwa, rülemükünyumüküsa Romri wie ketünga noh tü fe na küsa khonyo peveh ülo? ti küna.

²⁶Jütiküsavü müzake nyia nüh küjiwa tü jü thsüra nü anyieküsü nyia küjiwa vü wa nü ma vü, “Anyi hama tü Romri wie, tinü noh tü mokenüh hakümjie sa nti saveh lo?” ti küza.

²⁷Thinü anyie küsü nyia nüh küjiwa tü Paul vü ru taji, “Noh tü Romri tsahwiethuoh ülo, hi vü küza luo,” ti ma vü khuo.

²⁸Jütiküsavü anyie küsü nyia nüh küjiwa nüh, “Hi nüh Rom hama tü ame hozake nüh sü saveh,” ti rületsü. Paul nüh mavü, “Thitü hi tü aküwuo vünüh Romri wiethuoh,” ti rüle küza le.

²⁹Jükenüh ma küna nah küsari tü müküzhike wiethuoh nüh shiti vohrie tewa, thi anyie küsü nyia nüh küjiwa nga krü nü ma küzemü, küpakenühnyunü Paul tü Romri wie ketünga ma nüh renü kheke küsa kenüh.

³⁰Thinü rülo akünyiawa, mokenüh Judahri nüh ma müküle phahünü ti küsa thsüngü nü anyie küsü nyia nüh küjiwa nüh ma lejamü nü levü küjiri thi kümühu aveh ru sehzhu üti azhütsü, jütisanü ma nüh Paul sietsuo mari atüvü sa.