Read Pochuri Naga KÜÜRORI 23 Bible Online

KÜÜRORI 23 - Pochuri Naga bible

KÜÜRORI 23

¹Thinü Paul nüh kümühuwa nophoke taji, “Eh füri, hi nüh nosü küju eh kümüshe müsho nü Saküüwuowa atüvü rhotseveh,” ti küza.

²Thinü Levü Kümüsiewa Anania nüh ma kütuo vü küperi vü, ma po fetsü üti azhütsü.

³ Thinü Paul nüh ma vü, “Noh künekümüji küsa aziewa, Saküüwuowa nüh noh fe naveh. Noh tü Khonyo vünüh kheti müzhenü hi küna nti peküvehvü, shele Khonyo kari nü hi fe üti azhü tsü veh la?” ti küza.

⁴Thinü akütuo vü pehküvehri nüh, “Noh tü Saküüwuowa Levü Kümüsiewa vü azhümükünyu phra nti la?” ti sanü ma phra.

⁵ Jütiküsavü Paul nüh, eh füri, ma tü Levü Kümüsiewa taküsa hi tü müthsü nü, jüta mükünyutüla zhütsazhü nüh, “Noh nyiri anyia vü takrü saküvehri vü zhü kümüsüküphravüh nyu ta rhüsaveh nü,” ti küza.

⁶ Thitü Paul nüh kümühu jüla küzhila thuoüji Sadusiri thi küzhila thuoüji Farisiri ta küsa thsüra taji mari kümühuvünüh zie taji, “Eh füri, hi tü Farisiri thi Farisira tsawiethuoh, thuohtüvü küluozhewa thi küsüri kürholewa kenüh hitü hakümjie kümütevü peküveh wiethuoh,” ti küza.

⁷Jüti ma nüh küüza vü, Farisiri thi Sadusiri azhie vü mükato nüh küraluo tewa, jütisanü kümühuwa tü küüsuokünyi satewa.

⁸Küpakenühnyunü Sadusiri nüh küsüri rhoküsürale thi rügizhüleri thi Sietse münyie ta küphrate kenüh, thitü Farisiri thuoüji hamari aveh peveh ta küthsü kenüh.

⁹Jütisanü küüjakünya küji shuteru, jütiküsavü Farisiri refü vü Khonyo küsosieri wuori süratsie nü wurie küza nü, “Hiri nü anyi hama vü zanyo küsü nga kümüsü mphara. Thinü mükütüküzü shientü Sietse nyutü rügizhüleri küsü nüh ma sie jüleküra thuoüji moti sana lo?” ti sa.

¹⁰Jütisanü mükato nüh küüraluowa kümüsütsa sateru ünü mari nüh Paul shorieshorie kümü anyie nyia nüh küjiwa tü krü kümü kenüh wa nü mari azhie vünüh ma shoteru üti arienyiri küza, thi ma sie arienyiri küpehpe vü wa üti azhütsümü.

¹¹Jüma rüza vü VÜWA ru ma kütuo vü tsie taji, “Luoveh ji luo, küpakenühnyunü noh nüh Jerusalem vü eh povü küsa kümüjie Rom vü nga müsaji mümühie,” ti küza.

¹²Jütisanü thoru ünü Judahri tü aro phah nü kümüshe küsü sataji küshie nü, “Mari tü Paul müjie küfethe küju nü kütsaküzhu müsa,” ti sa.

¹³Thi mari aro hama küthi nü küsa mari anyi zürake küluo.

¹⁴Jütisanü mari tü levü küjiri vü thi kükhruori vü wa nü, “Hiri tü Paul müjie küfethe küjunü ashie nga kümüpowanyuti küshie saveh.

¹⁵Nohri jükenüh kümühiewa sie taji ma müke kümühieti küüna aro sanü ma sieteru na küsa vi anyie nyia küjiwa vü küthsüluo. Thi hiri thuoüji ma müjie shenyi küru vünüh ma fethemünati küche pewievehthuoh,” ti küza.

¹⁶Jütiküsavü Paul atsehvüwa tsa tü mari nüh wa ma lekhujithuohna küsa künara nü thopahiri küpehpe vü wa nü Paul vü küza.

¹⁷Thinü Paul tü müzake nyia küjiwa küsü ji taji, “Viza hama sie nü anyie nyia küjiwa vü waluo, küpakenühnyunü ma nüh zanyoküsü ma vü küüza peveh nüh,” ti küza.

¹⁸Jütisanü ma nüh ma sie nü anyie nyia küjiwa vü ru nü, “Paul küsi saküvehwa nüh hi ji nü viza hama sie noh vü wa üta hi vü khuolie, küpakenühnyunü ma nüh zanyo küsü noh vü küüza peküveh kenüh,” ti küza.

¹⁹Thinü anyie nyia nüh küjiwa tü ake vünüh ma sho taji apoteküüzhe vü siewa nü, “Noh nüh hi vü küza nta küsawa tü mowa lo?” ti küna.

²⁰Thinü ma nüh, “Paul khuke künato naküsa kenüh Judahri sierhüri tü azhü küsü sanü noh küna nü thuohtü Paul sie müza kümühu vü ru na savehthuoh.

²¹Thitü mari azhü mükünatümü luo, küpakenühnyunü mari nyi zürake küüluo küshie nü ma müküfethe küju nü kütsaküzhu nga küsawanyu ta sanü ma lekhuji huopevehthuoh thi mari tü noh vünüh azhükütsüwa huovehthuoh,” ti küza.

²²Thinü anyie nyia küjiwa nüh vizawa tü azhü hama hi vü küüthsüwa viwa nyi küsüvü nga müküzatümü üti ma vü küzaphoke nü ma küzemü.

²³Jütisanü ma nüh müzake nyia küji künyi ma vü jiru nü masü vü, “Nosü sütavü münühu küche vü arienyiri müzakünyi thi rawu küviri rürake thi avi küviri nyi müza künyiti Kaisaria küju wa na küsa kenüh küche luo.

²⁴Thi kümühieti Paul sie kümükhrüwa Felix vü wa naküsa kenüh arawuh nga ma kenüh küchetsüluo,” ti küza.

²⁵Thi hama kenüh ma nüh lasi rhü taji:

²⁶“Klaudia Lisia kümühietsahwa kümükhrüwa Felix nüh loküzhezhü noh tsü veh.

²⁷Anyi hamatü Judahri nüh re nü mari nüh fethemüluo nta savehthuoh, thi hi nüh arienyiri sie nü mari vü wa nü ma küülolera vü hi nüh küthsüra ma tü Romri ta.

²⁸Thi mari mokenüh ma müküle phaveh nti küsa thsü ntheti küsakenüh hi nüh ma sie nü mari kümühu atüvü nga tsuo.

²⁹Thitü hi nüh küthsüra thuoüji mari mpa mari khonyo kenüh wie, tinü ma küsü na küsa nyutü küsi sana küsa küsü nga rühlemüngura.

³⁰Thi ma vü müküle phah küveh thsüra nü müküzhike wiethuoh nüh noh vü küzeveh, thi ma müküle phaküvehri nga noh vü wa nüh ma vü mowa müküle phaveh nüh noh vü küza üti azhütsümüthuoh,” ti rhütsü.

³¹Jütisanü arienyiri tü mari nüh azhükütsü müzhe nü rühza vünüh Paul sie Antipatris vü ru.

³²Thinü rülo künyiawa jüma nyia tü mari thuoüji shele arienyiri küpehpe vü nüh rawu küviri nüh ma sie küze.

³³Jüti sataji mari tü Kaisaria vü ru nü alasiwa vi kümükhrü wavü tsü, thi Paul nga ma ke vü thsemü.

³⁴Ma nüh lasi jüma vi chie taji, “Noh nü khievü nüh ru lo?” ti küna. Thinü ma tü Kilikiari ta küthsüra vü,

³⁵ma nüh, “Noh müküle phaküvehri ru thuoüji hi nüh zhükethsüra naveh,” ti küza. Jütisanü ma nüh ma siewa Herod azhelovü thse nü huope üti azhütsü.