Read Pochuri Naga KÜÜRORI 24 Bible Online

KÜÜRORI 24 - Pochuri Naga bible

KÜÜRORI 24

¹Jüsevü rülo münga asevü Levü Kümüsiewa Anania tü kükhruori wuori thi ashih vü azhüküphrari küsü Tertula ti küsawa sie nü turu. Thi mari nüh Paul vü mükünongü ashihwa kümükhrüwa atüvü thse.

²Jütisanü Paul jiru nü Tertula nüh ma müküle phah sate nü: “Kümühietsahwa Felix, hiri tü noh kenüh luoveh kürüzi ti rhoküveh wie, thi anyu hamatü noh vünüh zanyo hozake sakürüthe ra.

³Thi lekhuji aveh vü nga thi azhie aveh vü nga hama kenüh nokümüna tsüveh.

⁴Thitü hothake noh müjie saküüjakünya vünüh münathetü kümülu vünüh hiri azhü küna tü üti khuoveh.

⁵Anyi hamatü zanyo saküjakünya she, thi azhih aveh vü Judahri azhie vü wukhawurie nü kütse, thi Nazareth vü nyiri küchükümüsü nü sierhü sakütse hiri nüh ngura.

⁶Jümpa mükünyu hiri Kükhurüzhe nga sakümünehmü nta sa, thitü hiri nüh ma shotemü.

⁷Thi arienyiri nyia vü küjiwa Lisia nüh ru nü hiri ake vünüh wurie ma shotewa.

⁸Noh mpa nüh ma küüna vünüh mokenüh hiri nüh ma mükületsüveh nta küsa aveh thsüra naveh,” ti küza.

⁹Thi Judahri nga azhü hala nyi tsarü nü haritü azhütsawiethuohti küsa küzakümüzho.

¹⁰Jütisanü kümükhrüwa nüh Paul azhü phrate üti tsotho tsü, thinü Paul nüh, Noh tü mavi hothake sierhü sanü tekütse hi nüh thsü taji lozhe she nü eh povü sanaveh.

¹¹Noh nga thsüto naveh, hi nüh khurü nti Jerusalem vü kükhrurülo türa künyi nga müjie ju.

¹²Nyi küsü vü nga sie küüjakünya, nyutü nyi riekhuo vü nga saküümüsü: künazizhe vü nga nyutü Kükhurüzhe vü nga nyutü nyuküji vü nga küsü nga küüjakünya müsa.

¹³Nyutü mari nüh khinyi mowa vünüh hi müshemüsüveh nüh mari tü küzhütsawa phrate mütsüra.

¹⁴Thitü hi nüh hama noh vü küza küthsüveh, hi tü khanavü hiri pari Saküüwuowa mari nüh müküle Lekhuji ta küsawa, Mosa Khonyo lovü tü küveh nyutü setsaküthsüri lasi lovü rhüküsa tsotü nü khurü veh.

¹⁵Mari nüh küthsü kümüjie künyitsari nga thi mükünyitsari nga Saküüwuowa vünüh küluozhe peh veh.

¹⁶Jükenüh Saküüwuowa tüvü nga thi nyiri tüvü nga amüshewa mütse peh na küsa kenüh eh kükhra thse peh huoveh.

¹⁷Thi mavi hozake Jerusalem vünüh teküwa sevü hi nüh eh nyirivü küümze kütsü kenüh nga thi küsahthuoh kenüh nga ti pesavi nti jüla wa.

¹⁸Hi nüh hama saküveh vü hi tü Kükhurüzhe vünüh sakümtse müthuoh ta küsa mari nüh ngura, jütiküsavü nyiri hozake nga münyie thi küüjakünya nga münyie. Thitü Asia vünüh Judahri wuori ru nü pehveh.

¹⁹Mükütüküzü hi vü küüjakünya pehveh üji mari nüh ru nü noh tüvü nüh hi müküle küphale.

²⁰Nyutü hi nüh müza kümühu atüvü mowa müküle sanü ngu nüh anyi hamari nüh küüzamo,

²¹ hi nüh mari azhie vü tsieküveh vü küsüri kürhole azhü hama küzie kenüh hi tü nosü noh tüvü kümnomna nguveh.

²²Thitü Felix tü küülole Lekhujiwa thsümühie küveh kenüh, Lisia, anyie nyia küjiwa ruchi nüh nohri ashihwa sakükato tsünaveh, ti küza nü mari küzemü.

²³Jütisanü ma nüh müza nyia nüh küjiwa vü azhütsü nü maküsizhe lovü thsemü luo, thitü ma müshe küsara tsüluo, jüma thuoüji ma müviji mükümühie vü ma füri mükhetü makütsüküüna luo ti küza.

²⁴Rülo pike sevü Felix tü ma vüvüh Drusila Judahvühwa sie nü ru, jütisanü ma nüh Paul jiru nü Khrista Jisu kütsotü zhüküphra küna.

²⁵Jütisanü ma nüh küzhütsa thi küüzhikezhikhri thi thuohtüvü ashihküsa zhühku phrate kümtse tsü ünü Felix tü krütewa nü ma vü, “Nosü thuoüji tewala luo, thuohtü vünüh tsotho ngu le thuoüji hi nüh noh ji le naveh,” ti küza.

²⁶Jütiküsevü ma nüh kümüshe thuoüji Paul nüh ame nga vi ma tsünatünyie ti sanü khinyikhinyi ma jiru nü ma sie jüle.

²⁷Thitü mavi künyi jumü ünü Porkia Festa nüh ru Felix müthosa, thitü Felix tü Judahri külo sangü nü küsizhe vünüh Paul müja nüh samü.