Read Pochuri Naga KÜÜRORI 25 Bible Online

KÜÜRORI 25 - Pochuri Naga bible

KÜÜRORI 25

¹Thinü Festa tü anyu jüla ru nü rülo küche sevü nüh Kaisaria vünüh tse Jerusalem vü khru.

²Thinü levü küjiri thi kükhra küvi Judahri nüh Paul vü luosa küveh azhü ma vü küza taji ma küchü.

³Mari nüh lekhuji vünüh Paul huola nü fethe na küsa kenüh mari kümüze nü Jerusalem vü ma küze üti khuo.

⁴Festa nüh mari vü, Paul thuoüji Kaisaria küsizhe vü thsemüthuoh, thi ma mpa wienga küsuomüwa nüh jüla wa na ta küzaveh, ti küza.

⁵Jükenüh ma nüh, “Nohri azhie vü kükhra küviri hi vü nyiküze luo, thi anyi hamavü müküle wuori peveh üji mari nüh mavü phraküümüsü luo,” ti küza.

⁶Jüti sanü ma tü rülo tüze nyutü türa nyia vü mari vü mpeh nüh Kaisaria vü tewa, jütisanü rülo künyiawa ashih küsape vü peh nü Paul sieru üti azhütsü.

⁷Jütisanü ma tü ru ünü Judahri Jerusalem vünüh rupehküvehritü süra ma mükieshe taji mari mpa rüle mükütsülera azhükükhra khieloti phrate nü ma müteh.

⁸Paul nüh ma mpa ma povü sanü, “Hi tü Judahri Khonyo nyutü Kükhurüzhe nyutü Romri Kajiwa küjo taji phramüsükümüsü,” ti küza.

⁹Thitü Festa tü Judahri külo sangü nü Paul vü, “Noh tü Jerusalem vü khru nü jüla nüh eh tü vünüh mari nüh noh küüngu nthe ülo?” ti küna.

¹⁰Thitü Paul nüh, “Hi tü Romri Kajiwa shihküsape atüvü tsievehthuoh, tinü hi tü hala nüh künakümülethuoh, hi tü nohri nüh küthsü kümüjie Judahri vü müküle küsü nga münyie.

¹¹Mükütüküzü hi nüh müküle küsari sataji küsülehküüro sa savehthuoh üji hi nü süwie naveh, thi aküsü vünüh küthi tewa nti phamüveh; thitü hi müküle phaküveh hamari tü azhütsanyuji nyi küsü nga hi vi taji mari ake vü müthsera. Hi nüh hama Romri Kajiwa vü khuoveh,” ti küza.

¹²Thinü Festa nüh ma sierhüri siezaluo taji ma vü, “Noh tü Romri Kajiwa vü khuovehthuoh, tinü noh thuoüji Romri Kajiwa vü wanathuoh,” ti küza.

¹³Jütisanü rülo pike tewa ünü, Agrippa Kajiwa thi Bernice masü Festa sieke nti Kaisaria vü ru.

¹⁴Thi mari jüla rülo hothake petewa ünü, Festa tü Paul ashiwakajiwa tüvü thse nü, Felix nüh küsizhe vü nyi küsüthsesavehlie.

¹⁵Thi hi khru Jerusalem vü peküvehvü levü küjiri thi Judahri kükhruori nüh anyi jüma kürho hi tsü nü ma müküle phah üta hi vü khuo.

¹⁶Thitü hi nüh mari vü, “Romri rühle vü nyi küsü nüh phraküümüsü küveh vü külesho ma vi phramüsü küvehrivü tsükümü hiri rühle nyu,” ti rületsü.

¹⁷Jükenüh mari kürü nü hala küru vü müküzhike wiethuoh nüh rülo künyiawa hi nüh ashihküsape rügi vü peh taji anyiwa sieru üti azhütsü.

¹⁸Thitü ma küruoluori ru ma mükieshe, thi hi nüh kümüshe azhü kümüsü phrate ma müte natünti sa ünü jüti müsanüh sa.

¹⁹Thitü mari nüh ma sie azhü küwuluo sa, jümari thuoüji mari mpa mari nale thi Jisu sükümüwa zhü phra, thitü Paul nüh matü rhopewieveh ta sanü vi ru.

²⁰Thi hi nüh azhü jüri künanah küsa rühle müküthsü kenüh ehkümüshe thuoüji noh tü jüla wa nü azhü jümari küna nyi nü moti lo? ti küna.

²¹Thitü Paul nüh anyu vü küjiwa nüh saküümüsho nta sanü küsizhe lovü thsesa üta kükhuo kenüh hi nüh ma Romri Kajiwavü müjie küüze küju nü khesamü üti azhü tsümü.

²²Thinü Agrippa nüh Festa vü, “Hi nga hi mpa nüh ma zhü künangüveh,” ti küza. Thinü ma nüh, “Thuotü nüh noh mazhü künara naveh,” ti küza le.

²³Jütisanü rülo künyiawa tü Agrippa thi Bernice masü tü kütehshe nü anyie nyia küjiri thi anyu vü sierhüri sie nü küsehzhupe vü tu. Jütisanü Festa azhü vünüh Paul tü sieturu.

²⁴Thinü Festa nüh, “Kajiwa Agrippa thi hala hiri sie peküvehri aveh, anyi hama kenüh Judahri hala küperi nga thi Jerusalem vü küperi aveh nga ma mükürhohü ketünga azhümünyie ti zie.

²⁵Thitü ma tü küsüle lehkhuji küsü nga saküsa hi tümphara, thi ma mpa nüh anyu vü küjiwa vü kükhuo kümüjie hi nüh ma küza nti müshethuohra.

²⁶Thitü hi tü ma khuke zanyoküsü nga eh vüwa vü khem ti rhükütsü münyie luo. Jükenüh hi tü ma sie noh tüvü tse, pekhewie ketünga kajiwa Agrippa tüvü tse, küpakenühnyunü hiri nüh ma künakümü sevü nüh hi nga zanyo wuori kürhüra kümühie sanaveh.

²⁷Küpakenühnyunü küsiri küsü ma vü müküle küsü nga küjomütsü nüh küüze tü eh kenüh thuoüji müküle,” ti küza.