Read Pochuri Naga KÜÜRORI 27 Bible Online

KÜÜRORI 27 - Pochuri Naga bible

KÜÜRORI 27

¹Jüsevü hiri tü juhie hie taji Italy vü küwa zhühthuo ünü mari nüh Paul thi küsiküsa wuori nga ti Romri takrü, “Kaji Takrüwa” ti küji Julius ke vü thsemü.

²Jütisanü hiri Asia azhih mürhüwa na küsa vü Adramitium juhie küsü lovü tu nü juküjiwa müzhewa, jütiküsavü Aristarkhas ti küsa Thesalonia vü Mekedoniari küsü nga hiri vü nyi tse.

³Rülo künyiawa hiri tü Sidon jura; thi Julius tü Paul kümühieti noh nü ma füri vü küwa tsotho tsü nü makümünyie sara.

⁴Jütisanü amürhü zhilekümü kenüh hiri tü ajuh leh anyuowa müzhe nü Kupra kükhu vü mürhütewa.

⁵Jüsevü hiri tü hie Silisia thi Pamfilia kari nü Lucia vü Mira ti küsa nyuküji küsü vü teru.

⁶Jüla nüh müzake nyia küjiwa nüh Italy vü wa na küsa Alexandria juhie küsü ngura nü jüla hiri küütu.

⁷Hiri tü rülo hozake müchieluo nüh hie nü khoshe kenüh Nida jura, thi amürhü kenüh atüvü hie küwa khokümü kenüh hiri tü hie Salmone kari nü Kret kükhu vü teru.

⁸Jütisanü hiri tü kho she nü jüvü nüh mürhü taji Küülolera Kümünyiepe ti küji azhiewa vü ru, thi jümakütuo vü Lasia nyuküji nga peveh.

⁹Jütisanü hiri tü rülo hothake küzemü thi hiri zetse nga kükrü vü pehmü thi assa küsa tsotho nga kari kümüthuoh kenüh Paul nüh mari vü;

¹⁰“Küjiri, hi nüh kümüshe hiri zetse tü kümüsamüna thi hozake küümie pemünathuoh, zanyo vü kütseri thi juhie mpa mükünyu hiri kürho wienga küümie kümühie vü pemüthuoh,” ti mari küthotsü.

¹¹Thitü müzake nyia nüh küjiwa tü Paul nüh küüzawa mütsotü nüh juhie kühiewa thi juhie vüwa masü azhü vü luoveh tsazatewa.

¹²Azhie jüla tü küsosa vü peh na küsa mükükato kenüh nyiri küzhi vü nga küsakümhie sanü Foenix tü Kret kütuoazhie kümühie küsü, azhie hamatü zhieseh-zhietu thi zhietü zhietu vü küprüke veh.

¹³Thi zhieseh vünüh amürhü mürhüzah ru ünü mari kümüshesaranatü nti müshe nü mari juhie thsokhuwa leja nü apote vünüh Kret nyokhie mürhü wa.

¹⁴Thitü küsuomüwa nüh küükrükükra amürhü kümüsü “Zhietü-Zhieshu” ti küjiwa azhih küüwe vünüh ru nü mari weke.

¹⁵Thi juhiewa tü amürhü münyuorathuoh nüh küsa vü hiri nüh jaküzemü taji amürhü nüh he küüzemü.

¹⁶Jütisanü Kauda ti küsa azhih küüweh küsü kükhu vünüh mürhü nü hiri tü khoshe taji juhie küzahwa shote peh.

¹⁷Thinü mari nüh jüma shohtekütsie nü juhie jüma ali nüh kürite sa, jütiküsavü juhiewa he nü Libya vü teküwa krünü amürhükünyuothsüwa lejamü nü amürhü nüh juhiewa mürhüküüzemü.

¹⁸Thi hiri tü amürhü nüh küluolewehke kümü kenüh rülo künyiawa thuoüji zanyo vü kütseri khajamü.

¹⁹Jütiküsavü rülo kücheawa thuoüji juhie tsokrüri nga khaküja sa.

²⁰Thi atsomürhü nüh küzüla nga hiri mükülüwute nüh sanü rünyi nga thi wutsi nga müngu nüh sataji hiri kürhora küluozhe aveh nga ratewa.

²¹Thinü mari tü ashiemütsanüh hothake tekütsethuoh kenüh Paul tü tsezhuru mari azhie vü tsie nü, nyiri, nohri nüh eh zhüküna taji Kret vünüh juhiewa hiemürulewiethuoh üji hakümjie kümnomna küümie küsetuwa nyu nü.

²²Thitü hi nüh khinyi küza na nü nohri eh zhü künaluo thi nohri luoveh mümüsütümü luo; jütathuoüji juhiewa küchie nüh nyikürholi nü küümiewanyu.

²³Küpakenühnyunü hi ma zhi sakütsewa thi ma khurü kütsewa Saküüwuowa zhühleri küsü küza eh kütuo vü tsie taji,

²⁴ma nüh hi vü, “Paul, mükrütümü luo; noh tü Kaisar atüvü mütsieji mümühie, thi halie, Saküüwuowa nüh juhie lovükütseri aveh no kenüh küloletsüthuoh,” ta küza.

²⁵Jükenüh nohri nyiri, luoveh ji luo, küpakenühnyunü hi nüh Saküüwuowa vü kütsotü kümüjie hi nüh küüzawa khem ta satsüwie naveh.

²⁶Thitü hiri tü anyuo wuori vü hewa rake wie naveh, ti küza.

²⁷Rüza türamüzüawa ru ünü hiri tü Adria juküji vü ruju; thitü rüzatsotüla kümüjie küsavü juhie hiekütseri nüh hiri tü azhih küüweh shenyitsethuoh ti müshe.

²⁸Jütiküsavü juküshewa küte nono ünü ale mükeke küpela ngura, jütisanü pike tsekewa nü küte lehü ünü ale türamünga mpa sala.

²⁹Thi juhiewa tü wa nü aloh kütohke kükrü kenüh mürükühavüh müzü ase vünüh jake sataji kükhuo sanü kütho huope.

³⁰Thinü juhie kühieri tü küthi tewa nti sanü mürükühavüh atüvü küjake aro sanü juhie küzahwa juküji vü jakemü.

³¹Thinü Paul nüh müza künyi nyia nüh küjiwa vü thi arienyiri vü, “Anyi hamari juhie lovü müküpeh nü nohri tü mükülolera,” ti küza.

³²Thinü arienyiri nüh juhie küzahwa hute küsa aliri tethuohmünü küzemü.

³³Jütisanü tholuo nti saru ünü Paul nüh wurie nü mari ashietsa üti küza taji, nohri tü luoveh mümühie nüh sataji ashie zanyo küsü nga mütsanüh tekütse nosü rülo türamüzüthuoh.

³⁴Jükenüh nohri eh zhü wurie küna nü ashie pipi tsaluo, jütathuoüji nohri satsa müzhora naveh, küpakenühnyunü nohri nyiküsü alü vünüh nga ashe küsü nga küümiewa nyu.

³⁵Jütisanü mari aveh atüvü nüh ma nüh lohse vi nü Saküüwuowa vü kümüna tsü thi zokhuo nü mari tsü khe.

³⁶Thinü mari nga luoveh ji taji papa küsa vi tsa kheh.

³⁷Thi juhie vü kütse aveh küsaji thuoüji hiri nyi müza künyi nü rürake nü türo.

³⁸Mari papa küsa tsakümüwa kümüsevü ahie aveh ajuh lovü khajanü juhiewa sakümüphie.

³⁹Jütisanü thoru ünü mari tü azhie jüma müthsüra nüh samü. Thitü azhie potepote vü azhih tuo nü küpierü küsüngura, thinü küsakümhie sanü jüla nüh juhiewa küchiewa alievü samü nti müshe.

⁴⁰Thi mürükühavüh leja nü juh lovü thsemü taji juhie shoküüzülewa aliri lejamü nü juhie atüvü athsü küthuohwa vikuo thuoh ünü juhiewa tü apotevü vike.

⁴¹Thitü ajuhmüküshe vü tewa nü juhiewa tü asüpri vü tohphoketewa taji juhie thsopo watü müküngarathuoh nüh sa, thi ajuküüshüwatü müzhole thuoh nüh ru nü ase vü aveh tohkhuokhemütü.

⁴²Thopahiri nüh kümüshe thuoüji küsi sakütseri tü nyiküsü nga ajumüshu nü müküte nüh aveh fethemü nti müshe.

⁴³Thitü müza nyia nüh küjiwa nüh Paul tü mari küüro küsaju müshe nü külole küsa müshe. Thi ajukümüshuthsüri thuoüji papa küsa müshu nü alievü tewa üti azhütsü.

⁴⁴Thi küpari thuoüji awiehsho vünüh thi juhie kükuo vünüh kürhu nü alievü tewa üti küza. Jütisanü mari aveh alievü shutewa khehra.