Read Pochuri Naga KÜÜRORI 28 Bible Online

KÜÜRORI 28 - Pochuri Naga bible

KÜÜRORI 28

¹Hiri jütisanü alievü kürura ase vünüh azhie jümatü Melita taküsa thsüra.

²Thinü jüla kürhori tü hiri kürho vü küümze jükümjie müküngu küümze vi hiri kütsa, anyih nga mütso nü hiri küsieke sa, küpakenühnyunü atsorü thi so ti sakümü kenüh.

³Paul tü athso mükhrü ru nü anyih lovü thse, thinü sakümü kenüh arehji küsü shuru nü ma ke vü kürüphoke.

⁴Thinü amürewa ma ke rügivü küsoü küveh anyuwa nüh ngu taji mari küsü nüh küsü vü, “Küthsütohwiethuoh nü anyi hamatü anyi küfetheri wiethuoh. Thi ma nüh juküji vünüh jozhutsewie ketünga nyurashih küürathuohtüwa nüh piketü maküürhowa nyuthuoh,” ti sa.

⁵Thitü ma nüh amürewa tü anyih lovü küthejamü nü zanyoküsü nga ma kümüko nga müsa.

⁶Mari nüh ma tü vühküru huope, nyutü zhürüluo tsuotsawa nü sünathuoh ti hothake noh peh tü ma vü amüngukümüsü jükümjie müküsa kenüh mari luoveh khaphrü le nü ma tü nyiaza küsü wie thuoh, ti sa.

⁷Thi azhie jüma kütuovü Publius ti küsa nyi küsü juhküji nato vü azhie avü sanü pehveh. Thinü ma nüh rülo küchehiri küzeh mühieshetsü.

⁸Küpakenühnyunü Publius apa mühi thi azüh ku ti sapeveh ünü Paul nüh ma vü wa nü ma ke ma vü thse taji kükhuo satsü nü sakümühietsü.

⁹Jüti satsü ünü azhie jüla küna peküvehri tü ru nü ma vünüh sakümühiera khe.

¹⁰Mari nüh hiri siake nü kütsüküsuo nga hozake sa; thi hiri juhiewa hie le nü tewaluo nti küsavü hiri nüh müviji mükümühie aveh juhie lovü thsetsü.

¹¹Thi asah küche se vünüh Alexandria juhie küsü ma tüvü lasikhuh “Küwushie Jünüri” ti kürhüke küsosa vü ru nü azhie jüla küpehla küsü vünüh hiri teru.

¹²Thi hiri hie Sirakas ti küsa vü ju nü jüla rülo küche peh.

¹³Thi jüla nüh hie küzülewa nü Rhejium jura. Thi rülo künyiawa hiri tü wa nü zhieseh vünüh amürhü küruwa shirü lehü nü rülo künyiawa vünüh Puteoli vü ju.

¹⁴Hiri jüla küwavü afüri mütu, thi hiri ji nü mari vü rülotürü peh üta sanü jüla petewa. Jütisanü hiri Rom vü teru.

¹⁵Thinü afüri jüla küperi tü hiri kütse thsü tajinü hiri mütu nti Apiu asüküsape thi Küzerazhe Küche ti küsawa küjuru. Paul nüh mari küngura vünüh Saküüwuowa kümüna tsü thi ma luoveh nga jira.

¹⁶Jütisanü hiri Rom lovü turu ünü Paul thuoüji arienyiri ma kühuori sie nü ma mpa küüpeh sa.

¹⁷Rülo küche sevü ma nüh Judahri anyu jüla kürho sierhüri jizhuh, thinü mari ru nü sehzhu ünü ma nüh mari vü, eh füri, hi tü zanyo küsü nga nyiri tüvü nga satü nyutü hiri pari rühle vü nga müküle müsawie ketünga hi tü Jerusalem vü nüh hi re küsizhe lovü thse nü Romri ake vü thsemü.

¹⁸Thi mari nüh hi künaküwa hi fethe naküsa rühle küsü nga müküngu kenüh hi kümüze nta müshe.

¹⁹Thitü Judahri nüh kürükümü kenüh hi tü hi mpa eh nyiri vü müküle phah nti küsa kenüh nyu thitü Kaisar vü mükhuo thuoüji mümühie nüh satewa.

²⁰Hama kenüh hi tü nohri mütu üta thi nohri siejüle üta, thi hamatü küpakenühnyunü thitü marüli nüh hi phehkütse thuoüji Israelri zhühke küümühie na küsa kenüh wie.

²¹Thinü mari nüh ma vü, “Hiri tü Judea vünüh lasi zanyoküsü nga noh kenüh müngu wie, thi afüri hala küruri nyiküsü nga noh zhühke mütsü nyutü noh zhüku mütsü nyutü noh zhüku kümüsü nga müphratewie.

²²Thitü noh kümüsheri mowa nüh hiri tü noh vünüh thsü nthe; küpakenühnyunü hiri nüh thsüküveh thuoüji azhie aveh vü nga nyiri nüh refü hama noh nüh sieküvehwa thuoüji küjokhehwievehthuoh,” ti küza.

²³Jütisanü mari rülo küsü nüh mütule naveh ti kürüchie sanü mari ma nüh küpehpe vü anyi hozake kürüteru. Thi ma nüh rüne vünüh wa münüle küju rügi kajipe zhünyowa phratetsü, Saküüwuowa povü sanü Jisu zhühkuwa tü Mosa Khonyo vünüh nga thi setsaküthsüri lasi vünüh nga ti küzanü mari luoveh sakükhaphrü nti wurie.

²⁴Mari wuori thuoüji ma nüh küüze vünüh luoveh sakükhaphrüra, thitü wuori thuoüji mütsotü nti sa.

²⁵Jütisanü mari kümüshe küsü müküsara kenüh porie luonti satü müjieporieküwa atüvü Paul nüh azhü rühle küsüphrate: “Isaya setsaküthsüwa apo vünüh Kümtse Sietse nüh khem ta nohri apari vü küüza!

²⁶Küpakenühnyunü ma nüh küüza: “Anyi hamari vü wa nü küza luo, nohri tü küüna nü künaveh thitü müthsüra, nohri tü aküno nü noh naveh thitü müngura.

²⁷Küpakenühnyunü anyi hamara luoveh thuoüji zanyo küre khomü, thi mari khüna tü zanyo küüna küzhomü, thi mari notha tü mari nüh tiehtemü; mükünyutüla mari notha nüh nguna nü, thi mari khüna nüh künarana nü, thi mari luoveh nüh thsürana nü, jütisanü mari sakümühietsü üta hi vü ru nanü,” ti küza.

²⁸Nohri hama müthsüji mümühie, “Saküüwuowa küülole thuoüji Judahmükünyuri vü küzemüthuoh; mari thuoüji hama künawie naveh,” ti küza.

²⁹Ma nüh azhü hari phrate jura ünü Judahri tü mari mpa mari azhie vünüh küüjakünya khieloti sanü porie tewa.

³⁰Thi ma nüh mahvi künyi ma mpa ma künyirhie vünüh petewa, thi thathari nüh ma vü ru naveh nüh lozhe nü sieke.

³¹Thi Saküüwuowa kajipe vi sosie thi VÜWA Jisu Khrista zhüku künyito vünüh sosie thi akükhe küsü nga münyie nüh sa.