Read Pochuri Naga KÜÜRORI 4 Bible Online

KÜÜRORI 4 - Pochuri Naga bible

KÜÜRORI 4

¹Masü nüh nyiri vü azhü küza veh ünü levüri thi kükhurüzhe vü sierhüri thi Sadusiri tü masü vü ru.

²Mari tü arüshutewa, küpakenühnyunü masü tü nyiri vü Jisu aküsü vünüh kürhole zhüku vi zie küveh kenüh.

³Thi mari tü masü re nü küsizhe lovü müjie kütho küju sa, küpakenühnyunü münüle sakümüthuoh kenüh.

⁴Thitü küülolewa zhü küünarari nyi hozake tsotüra, thi kütsotüri nyi anyie münga kümüjie zhiteru.

⁵Thi rülo künyiawa sierhüri thi kükhruori thi Khonyo küsosieri tü Jerusalem vü sehzhu khe.

⁶Jütiküsavü mari tü Levü Kümüsiewa Ana thi Kaifa thi Johan, thi Alexander, thi Levü Kümüsiewa küshuküra aveh nga mütu.

⁷Jüti satajinü mari tü masü siewa mari azhilavü sataji, “Mowa kükhra nyutü mowa nyo vünüh hamaha sa veh lo?” ti küna.

⁸Thinü Pitor tü Kümtse Sietse prowie taji mari vü, “Anyu vü sierhüri thi kükhruori,

⁹rünyihküpriwa vü kümühie sakütsü nohri nüh mokümjie küsa vünüh anyi hama sakümühie nta küsa nosü hisü vü küna nta thuoüji,

¹⁰nohri aveh thi Israel nyi aveh thsüluo, Jisu Khrista Nazareth, nohri nüh küzekewa, Saküüwuowa nüh aküsü vünüh saküürhowa anyo vünüh ma tü nohri atüvü tsiemühie veh.

¹¹ Jisu hamatü zhütsazhü nüh küza küsa: “Aloh hamatü nohri azhe küsari nüh vijakümüwa, thitü jümatü ajüke vü alüwa samüthuoh.

¹²Thi nyi küsü vü nga nüh küülole müngura, küpakenühnyunü thajüwu kükhuvü nyiri zhie vü hiri küloletsüra na küsa Jisu küchie nüh anyo küpa münyie,” ti küza.

¹³Mari tü Pitor thi Johan luoveh kümüzho ngu, thi masü tü lasi müküthsü kürho kürünyie vünüh kürhori ta küsa thsüra, jümpa mükünyu masü tü Jisu sietse ta küsa küthsüra vü mari ngo she.

¹⁴Thitü anyiwa saküümühie taji masü kütuovü tsie küveh küngu kenüh mari tü zanyo küsü nga phra nü masü siemüküproluora nüh samü.

¹⁵Thitü mari nüh masü tü mari Müzakümühu vünüh küpavü tewa üti azhütsü mü tajinü mari mpa küsü nüh küsü vü,

¹⁶“Hiri tü anyi hamasü vi mowa sanathuoh lo? Masü vünüh zanyo küngo thsoshi sa Jerusalem vü küperi aveh kütsamüwiethuoh, thi hiri nga jütü mükürüra wiethuoh.

¹⁷Tinü hama anyiri vü nyuomüküze nüh sana küsa kenüh anyo hama vi nyi küsü vü nga müphratetümü üti masü sakükrümü nüh raluo,” ti sa.

¹⁸Jükenüh mari tü masü ji sheleru nü piketü Jisu nyo vi müphrate nyutü müsosie tümü üti wurie khe.

¹⁹Thitü Pitor thi Johan masü nüh mari vü, “Nohri azhüküüna nyia vünüh Saküüwuowa zhü küüna nüh azhüle ünü nyu nüh nohri mpa mümüsheji mümühie.

²⁰Küpakenühnyunü hisü nü jüma mükhera thitü hisü nüh mowa ngu thi thsü nüh vi phratewie naveh,” ti küza.

²¹Anyiri tü masü nüh küsari ngu taji Saküüwuowa siake, jükenüh mari tü masü vü zanyoküsü nga müsarathuoh nüh masü sakükrü lehü nü küzemü.

²²Küpakenühnyunü ma vünüh küngo thsoshi küsawa tü mavi zürake khruo kümüthuoh kenüh.

²³Nyuri nüh masü küze kümüsevü masü füri vü wa nü levü küjiri thi kükhruori nüh masü vü mowa küza nüh viwa küza.

²⁴ Thinü mari tü jü thsüra nü mari kürü Saküüwuowa vü azhü zie taji, “Kükhratsahwa VÜWA, thajüwu, azhih, ajuküji thi jümari vü küperi aveh küsawa!

²⁵ Kümtse Sietse vünüh hiri pa no siepe David apo vünüh, “Mokenüh mükütsotüri tü arüshumü lo, thi nyiri tü zanyo müjujuri müshe veh lo?

²⁶VÜWA thi Khrista sie küproluo na küsa kenüh anyu vü kajiri tü küchevehthuoh, thi takrüri tü sehzhuvehthuoh, ta küza saveh.

²⁷ Herod thi Pontius Pilate masü tü mükütsotüri thi Israel nyiri sie nü noh Siepe kümtsewa Jisu, noh nüh kürükawa mükünongü kenüh nyuküji hala nüh serütsah.

²⁸Noh ke nüh thi noh kümüshewa nüh momowa sa nta kürühke sanüh jümari sa nta sehzhu.

²⁹Jükenüh VÜWA, mari nüh sakükrü küveh hama notü taji no sieperi tü luoveh müzho wie taji no zhü küza na küsa kükhra tsüluo.

³⁰Noh nüh noh ke thsuoru nü sakümühie tsüluo, thi thsoshi thi küngori noh siepe kümtsewa Jisu nyo vünüh küüsarawa saluo,” ti khuo.

³¹Jüti sataji mari nüh kükhuo sa ünü azhie mari nüh sehzhu peküvehwatü küzhühtewa; thi mari tü Kümtse Sietse nüh pro nü Saküüwuowa zhü luoveh müzho she nü phrate.

³² Thi kütsotüri refü sataji küpe jümaritü luoveh küsü thi kümüshe küsü sanü pe, thi zanyo papa zhizhi peküveh ritü nyi küsü nga mampa ma zhithuoh ta müsanüh zanyo aveh nga müzazhi satewa.

³³Thi povüküsari tü kükhra ji she wie nü mari nüh rholeküsüra zhüku povü sa tsü, thi mari vü küümzewa zhi shetewa.

³⁴Thi mari azhie vü küthotsa küsü nga münyie nüh sa, küpakenühnyunü mari nüh momowa peveh nüh azhih nga nyutü azhe nga küzhurari aveh viri

³⁵nü povüküsari ajih vü thsekheh; thi thari nüh küzake müviji mümühie nüh küsuotsü.

³⁶Jütiküsavü Josef, VÜWA povü küsari nüh arienyo Barnabas (mazhünyo Luoveh küchükütsüwa) ti küsawa Leviri Saipras vünüh küwuori küsü peveh,

³⁷thinü anyi hamatü azhuh zhuto küsü peküveh zhu taji amewa viru povüküsari ajih vü thse.