Read Pochuri Naga KÜÜRORI 5 Bible Online

KÜÜRORI 5 - Pochuri Naga bible

KÜÜRORI 5

¹Thitü nyi küsü Anania ti küsa ma vüvüh Safira masü tü azhuh zhuto küsü zhu.

²Thi ma tü ma vüvüh sie kümüshe küsü sanü ame aveh vimüwa nüh suo samü nü wuori viwa povüküsari ajih vü thse.

³Thinü Pitor nüh, “Anania, noh tü Kümtse Sietse mürana küsa kenüh Tsuore[2] nüh noluoveh küüpro nü azhuh ame suo sa mü ülo?

⁴Azhuh jüma müjie küzhu vü thuoüji noh zhi nyu ülo? Thi zhukümüse vü nga jümatü noh mpa noh müshe nyu ülo? Thinü noh tü mokenüh noluoveh lovü aro kümüsü vü vehlo? Noh tü nyiri müramüveh nü Saküüwuowa müramüthuoh,” ti küza.

⁵Anania nüh hama küünara vü külu zeh taji sütewa. Thi thari nüh hama künara nüh krü sheketewa.

⁶Thinü vizari nüh ru nü athsü nüh ma küzhu taji viwachowumü.

⁷Jütisamü nü peküveh azhie münühu küche kümüjie küsa vü ma vüvüh tü ma vüpa zhüku müthsü nüh ru.

⁸Thinü Pitor nüh ma vü, nohsü azhuh tü jüzake mpa nüh zhura ünü mokümjie nüh hi vü küza luo, ti küna. Thinü ma nüh, “Ah, jüzake mpa nüh zhura wie,” ti küza.

⁹Pitor nüh ma vü, “Nohsü tü mokümjie müshe küsüsanü Saküüwuowa Sietse müra nti sa lo? Halie, noh vüpa küchowuri tü amükhievü ru tsievehthuoh tinü mari nüh noh nga alievü vitewa nathuoh,” ti küza.

¹⁰Thinü müküzhikewiethuoh nüh ma tü ma jih vü külu zenü sütewa. Jütiküsavü vizari tü ru ünü ma tü sümüla taji ngura, thi mari nüh ma vi wa nü ma vüpa küchowupe nato vü chowumü.

¹¹Thinü Nazizheh aveh thi hama küthsüri aveh tü krüsheke tewa.

¹²Povü küsari nyiri aza vü küngo thi küükrükükraküüro hozake sa. Jüti sataji mari aveh kürü Solomon telavü peh.

¹³Thi nyi küpari tü mari aza vü küpe krütewa, thitü nyiri nüh mari phrate kümühie she.

¹⁴Thi khana nyia vünüh nyimpari nga nyimzari nga kütsotüri tü ashieji tsatsa sa tewa.

¹⁵Thi mari tü künari aze rügi vünüh thi apho vünüh lekhuji vü kharu nü Pitor rüzhe mpa wie nga nüh küüwike nta sa.

¹⁶Thi nyiri tü Jerusalem natonahuo anyu vünüh künari thi mükümtse sietse nüh küprü tekütseri aveh sakümühietsü.

¹⁷Thitü Levü Kümüsiewa thi ma siepeküvehri jüla kürho Sadusiri tü mari no kürüpa nü rüshu she.

¹⁸Mari tü povüküsari re nü müza küsizhe lovü thsemü.

¹⁹Thitü rüza vü VÜWA rügizhüleri ru nü küsizhe mükhieri sataji mari siezhu nü mari vü,

²⁰“Wa nü Kükhurüzhe lovü tsie taji nyiri vü Akürho hama zhü küza luo,” ti küza.

²¹Thinü mari nüh hama thsü nü rüne kümüto Kükhurüzhe lovü tü taji nyiri sosie. Jütiküsavü Levü Kümüsiewa thi ma siepeküvehri teru nü kümühuwa thi Judahri sierhüri aveh jizhu nü küsizhe vü nyiri küze taji povü küsari sieru üti küza.

²²Thitü mari tü küsizhe vü ru ünü mari tü küsizhe lovü mpela nüh sakümü kenüh ru nü azhülewa tsü,

²³“Küsizhewa tü khemühie she sa wieveh thi riehuori tü amükhieri kütuo vü tsie lawie, thitü hiri nüh sakütuvü alovü nyi küsü nga mpela,” ti küza.

²⁴Kükhurüzhe vü sierhüri thi levü küjiri nüh azhü hari küthsüra vü mari tü kürüza sa she nü mowa rühunathuoh nüh ti sanü krü.

²⁵Nyi küsü ru nü mari vü, “Nohri nüh küsizhe lovü re küthseri tü Kükhurüzhe vü tsie nü nyuri sosie pevehthuoh,” ti küza.

²⁶Thinü sierhüri nüh jüla küürori sie nü wa taji küüjakünya müsanüh mari sieru, küpakenühnyunü nyiri nüh aloh vi nü mari küveh kükrü kenüh.

²⁷Thi mari nüh mari sieru Müzakümühu tüvü sa. Thinü Levü Kümüsiewa nüh mari küna taji,

²⁸ “Nohri anyo hama vi nü müsosie tümü üti wurie khethuoh, thitü nohri nüh Jerusalem hala nohri küsosie nüh saküpromüthuoh thi nohri tü Nyi hama azüh hiri lüvü viruna savehthuoh,” ti küza.

²⁹Thitü Pitor thi povüküsa küpari nüh, “Hiri tü nyiri nyia vünüh Saküüwuowa zhü mükünaji mümühie.

³⁰Hiri pari Saküüwuowa nüh nohri nüh thsorügi vünüh küzothewa Jisu sakürho tsü.

³¹Israelri luoveh saküükhaphrü na küsa kenüh thi kükhiemuo noküja na küsa kenüh Saküüwuowa nüh ma zhie wuovü sakümüsie nü Sierhüwa thi Küülolewa küüsamüthuoh.

³²Thi hiri tü hamari povü küsari, thi thari nüh ma zhüküna nahveh nüh jümari vü Kümtse Sietse Saküüwuowa nüh tsümüthuoh,” ti küza.

³³Mari nüh azhü hama küthsüravü mari tü arü khielotishu nü mari fethe ngü tewa.

³⁴Thitü Farisiri kümühu vü Khonyo küsosieri küsü ma nyo Gamaliel ti küji nyiri avehveh vünüh küsiake küvüwa nüh süra tsie nü mari vü, mari tü küsükeri anyulavü küzemü la üti azhütsü.

³⁵Jütisanü ma nüh mari vü, “Israel nyiri, anyi hamari vü nohri momowa sa nta saveh nüh azhüzhüluo,

³⁶küpakenühnyunü khanavü Theudas tü süra nü nyiri azhie vü ma nga nyi küsü lo ta chieke nü anyi müzamüzü kürü azhüküsü satewa, thitü ma tü zothemü thi ma senyiküwari aveh nga zheküporiemü nü nyiküsü nga shele müru nüh samü.

³⁷Jüma sevü nga Galileeri Judas tü süra nü anyito küchie tsotho vü nyi kürefü küsü sie nü tewa, jütiküsavü ma tü kümiemü thi ma se nyiküwari nga zheküporie küzekhehmü.

³⁸Jükenüh nosü kenüh thuoüji hi nüh nohri vü küza na nü nohri mari azhüzhü nü küzemü luo; küpakenühnyunü mari nüh kürokütsewa nyutü sakütsewa tü nyiri vünüh thuoüji müsara nüh samüwie naveh;

³⁹thitü hamatü VÜWA vünüh thuoüji nohri tü mari zoriemüjara. Jütanyunü nohri tü Saküüwuowa siesaluo küveh nga müthsü” ti küza. Kümühuwa tü Gamaliel nüh küüza zhüwa müzhe.

⁴⁰Jükenüh mari tü ma zhü küna nü povükusari azhelovü jike taji mari fe tsü thi Jisu nyo vi müphratetümüüti wurie kheh nü mari küzemü.

⁴¹Thinü mari tü lozheke taji kümühu atü vünüh tewa, küpakenühnyunü mari nga Jisu nyo müküchie sakütseri vünüh küzhike nü kütseri ta Saküüwuowa nüh mari küchieke kenüh.

⁴²Thi mari tü rülo tsotho Kükhurüzhe vü nga thi azhe vünga mükütuowiethuoh nüh Jisu tü Messiah ta küsa Zhühthe Kümühie vi sosie thi phrate peh.