Read Pochuri Naga KÜÜRORI 7 Bible Online

KÜÜRORI 7 - Pochuri Naga bible

KÜÜRORI 7

¹Thinü Levü Kümüsiewa nüh, “Hatü zhütsa ülo?” ti küna.

² Thinü Stefen nüh, eh füri thi eh pari, eh zhü künaluo. Abraham Haran vü müjie kürho vünüh ma Mesopotamia vü peküveh vünüh kütholathovü küsa Saküüwuowa ma vüru taji,

³noh zhih thi noh küshukürari vünüh tsezhu nü hi nüh azhie küjo kütsana küsa vü waluo,

⁴Jüti sataji ma tü Khaldiari zhih jamü nü wa Haran vü rhotewa. Thi ma pa sükümü sevü Saküüwuowa nüh jüla nüh ma sie khinyi nohri nüh rhoküveh vü ru.

⁵Thitü Saküüwuowa nüh ma mpa ma zhi küüsana küsa küpekenüh azhih ampha rike nga kütuoke ma mütsü, thitü matü atsa münyie wie ketünga azhih hama ma nüh thi maküthsoküzhiri nüh küühuo nta phrateke saveh.

⁶Jütisanü ma küthsoküzhiri tü wa nyuri azhih vü alienyiri vi siepe sa thi müküchie sataji mavi müzamüzü küürho naveh ta hama kenüh Saküüwuowa nüh phrate saveh.

⁷Thitü Saküüwuowa nüh, akuoh thawa nüh mari vi siepe sanüh jümari hi nüh müshemüsü naveh, thi jüma sevü nüh mari tü ru nü azhie hala nüh hi khurü naveh.

⁸ Thi ma nüh ahukürhe kütsathuohwa tsü. Jüti sataji Abraham tü Isaac wuo nü rülo tüze rülo vü ma hu rhe; thi Isaac nüh Jacob wuo, thi Jacob vünüh eh nyi kürhokhuri türakünyi rhoshuru.

⁹Thi anyi kürhokhu jümari tü Josef nokürüpa nü Egyptri vü zhumü; thitü Saküüwuowa tü ma sietse wie.

¹⁰Thi kümnomna aveh vünüh ma külole, jütisanü Egypt kajiwa Faroah tüvü küümze thi kümahtsa pera nü Egypt aveh vü thi azhih aveh nyia vü kümükhrüwa sa.

¹¹Jütiküsavü Egypt thi Kanan azhih aveh vü kümükhuojih teru nü kümnomna hozake teru nü hiri apari tü kütsaküzhu müngura nüh sa.

¹²Thitü Egypt vü kütsaküzhu nguraveh ta küsa Jacob nüh küthsüra vü hiri apari jüla küzekhu.

¹³Thi akünyiawa küwale vü thuoüji Josef nüh ma mpa ma jierivü küüthsü thi Josef tsapatharuori nga Faroah nüh thsütera.

¹⁴Thi Josef nüh ma pa thi ma küshukütu nyi rürake nü münga aveh ji ma vü teru.

¹⁵Jüti satajinü Jacob tü Egypt vü tejuo. Thi ma nga thi hiri apari nga jüla nüh sümü.

¹⁶ Thi mari kümo tü kha shelewa Shekhem, Abraham nüh Shekhemvü hamor atsari vünüh süküsa rüku vü chowumü.

¹⁷Thitü Saküüwuowa nüh Abraham vü tsü nta phratekeküsa tsothowa shenyiru ünü,

¹⁸Josef müküthsü Egypt nyia kükaji küpa shuteru, thi haküju Israelri tü küzhiküzhi teru.

¹⁹Kaji jümatü hiri alahnyiri vü khuke müsü she nü wuriemari tsari müküürho nta küsa kenüh alievü shozhu jamü.

²⁰ Hati küsa tsotho vü Mosa tü wuo saveh, thi ma tü Saküüwuowa atüvü zü she. Thi ma pa azhe vünüh matü asah küche küje.

²¹ Thi ma tü viwa alievü saveh ünü Faroah atsavühwa nüh mampa ma tsa sa nti sieru küje.

²²Thi Mosa tü Egyptri zanyoküthsü aveh vi taji ma sosie, thi ma tü ma zhü küphra vü nga satü ma küüro vü nga satü khra she.

²³Ma tü mavi zürake khruoteru ünü Israelri tsa, ma füri künongü ma luoveh lovü teru.

²⁴Jütiküsavü mari nyi küsü müküle ngu nü Israelwa apo vi nü Egyptwa fethemü.

²⁵Ma nüh kümüshe Saküüwuowa nüh ma ke nüh mari vizhutsü ti küsa ma füri tü thsüthuoh tünti sa, thitü mari tü müthsü nüh samü.

²⁶Rülo künyiawa masü küraluo küpe vü masü azazhü saküka nti ru taji, “Halie, tumasü, nosü tü ajienü wie, nosü tü mokenüh küsü nüh küsü vü müküle saveh lo,” ti küza.

²⁷Thitü ma füwa vü müküle saküvehwa nüh Mosa ji taji, “Thawa nüh no vi hiri nyia vü sierhü nyutü küjiküüsa lo?

²⁸Noh luonyi Egyptwa küfethe kümüjie hi nga fethe hü nti ülo?” ti küza.

²⁹ Jüma küthsüra vü Mosa tü zhü Midiari azhih vü tewanü zheküjari kümüjie sanü jüla rho, thi jüla nüh ma tü atsa nyimpari künyi ngura.

³⁰Jüti sataji mavi zürake jukümü sevü rügizhüleri küsü Sinai Küzhiho rügi reza vü athso küjepukeküsü vü anyihzhu vünüh ma kütsa.

³¹Mosa tü jü ngu taji ngo, ma tü jü no nti akütuovü wa, thinü VÜWA jikhi ma vü ru nü,

³²“hi tü nohri pari Saküüwuowa, Abraham thi Isaac thi Jacob Saküüwuowa,” ti küza. Thinü Mosa tü khekheti küshü taji münora nüh satewa.

³³Thinü VÜWA nüh ma vü, “Noh nüh vü küveh jihküükruvüh fomü luo, küpakenühnyunü azhie noh nüh kütsiepewa tü mütsemü.

³⁴Egypt vü eh nyiri münomüna küveh hi nüh ngutomüthuoh, thi hi nüh mari lokürü jikhi nga künaramüthuoh, thi mari vizhu nti hi tü tse. Jükenüh raluo, hi nüh no Egypt vü küze naveh,” ti küza.

³⁵Mosa hamatü Israelri nüh kule kümüwa tü mari nüh, thawa nüh noh vi küji thi sierhü küüsa lo? ti küna. Saküüwuowa nüh athsoküjepuke vünüh anyih küüjunü rügizhülewa ma küütsawa ake vünüh ma thuoüji anyira nyia takrü küsa thi mari küüvizhu nta küze.

³⁶Ma nüh mavi zürake mari sie reza vü kütsevü nga thi Kümüru Juküji vünüh nga thi Egypt vü küpevü nga küngoküüro thi küükrükrari sanü mari siezhu.

³⁷Mosa hama nüh Israelri vü, “Saküüwuowa nüh hi saküütsie kümüjie nohri ajienüri azhie vünüh setsaküthsüri küsü vizhu naveh,” ti küza.

³⁸Mosa hamatü khana reza vü ma nyiri sie sezhuh nü Sinai Küzhiho rügi vünüh sie küjülewa rügizhüwa thi hiri alahnyiri sie kütsewa wiethuoh, thi hiri tsü na küsakenüh kürho zhüwa nga ngura.

³⁹Hiri lahnyiri nüh ma zhümüküna nta ma chijamü nü mari tü mari luoveh vünüh Egypt vü shele teru taji,

⁴⁰Aron vü, “Hiri atüvü lekhuji küüjo naküsa kenüh kükhurü nyiazari sa hiri tsüluo, küpakenühnyunü Egypt vünüh hiri küvizhuwa Mosa thuoüji mowa samüthuoh nüh hiri tü müthsüthuoh,” ti küza.

⁴¹Jütisanü mieshüzah küsü sanü zanyo viru nü tsorhejüma khurü taji mari akesie jüma vü külozhe sa.

⁴²Thi Saküüwuowa nüh mari jamü nü rügivü wutsiri küükhurümü, jümatü setsaküthsüri lasi lovü rhüsaveh: “Halie Israel zhelori, nohri tü mavi zürake reza vü küpe vü samüwa fethe thi kükhurü sanü hi tsü ülo?

⁴³Jütanyunü nohri nüh khurü nta küsa nohri ake nüh küsa Molek nazizheh thi Refan wutsi kükhurü nyiaza viwa, thitü hi nüh nohri zhe Babilon kari küze nü nohri tü zheküjari küsamü naveh,” ta rhüsa veh.

⁴⁴Hiri lahnyiri thuoüji reza vünüh povü Juhthsüwa peh, thi jümatü Mosa vü mokümjie sa üta küjotsü nüh thi ma nüh atsowa ngu nü jü vünüh sa.

⁴⁵ Hiri lahnyiri tü mari pari vünüh juhthsüzheh jüma nguranü mari tü Joshua sie küwa vü jüma khawa taji akuoh Saküüwuowa nüh zhejakümü azhih jüla küru vünüh David tsotho küju peru.

⁴⁶David tü Saküüwuowa atü vü küümze pera taji Jacob Saküüwuowa ape küsü küüpha üti khuo.

⁴⁷Thitü Solomon nüh ma kenüh azhe küsü sa.

⁴⁸“Thitü setsaküthsüwa nüh küüza kümüjie; Saküüwuowa Kümüsie Tsahwa thuoüji ake nüh küsa azhe vü müpe;

⁴⁹“Thajüwu tü eh kajipe, thi azhih thuoüji eh jinyipe, tinü noh tü mowa azhe eh kenüh sa nti lo? nyutü eh kenüh kümünyiepe mowa lo? ti VÜWA nüh küza.

⁵⁰Hi mpa nüh eh kenüh zanyo hamari aveh müsa ülo?” ta rhüsaveh.

⁵¹ “Nohri luoveh kükhori, nohri luoveh nga thi akhüna nga ahu mükürheri, nohri tü tsotho aveh Kümtse Sietse kulepehuomü. Nohri lahnyiri kümüjie nohri nga Kümtse Sietse kule pehuomü.

⁵²Nohri lahnyiri tü setsaküthsüri thawa samükümnomnalo? Küzhütsawa nohri nüh zhutsa thi fethekümü runa küsawa küütü vünüh küzaküruri fethekhehmü.

⁵³Rügizhüleri nüh Saküüwuowa wule viru nohri vü tsüthuoh, thitü nohri nüh müvi nüh kulemü,” ti küza.

⁵⁴Mari nüh azhü hamari küthsüra vü khieloti mari rüshunü mari ha tsürü taji peh.

⁵⁵Thitü Stefen tü Kümtse Sietse nüh pro taji thajüwu no ünü Saküüwuowa küthola thi Jisu tü Saküüwuowa zhie wuovü tsieküveh ngu.

⁵⁶Thinü ma nüh, “Halie, thajüwu saphie küsa thi Tsawa Saküüwuowa zhie wuovü tsie küveh hi nüh nguvehthuoh,” ti küza.

⁵⁷Thitü mari tü zie kürügi she nü mari khüna küwute taji mari tü zhüru kürü küsükeri vünüh ma vü vehke,

⁵⁸Jütisanü mari nüh ma nyuküji alievü zhezhujamü nü aloh vi ma veh, thi ma vü müküle kütsüri athsü phrenü Saul ti küsa vizari küsü ajih vü sa.

⁵⁹Mari nüh aloh vi ma veh küvehvü ma tü kükhuo sataji, “VÜWA Jisu, eh sietse sie luo,” ti khuo.

⁶⁰Jütisanü ma tü khotsü taji krie kürügi she, “VÜWA, müküle hama vi mari alü vü müthsetümü luo,” ti küza. Thi ma nüh azhü hama küzakümü sevü ma tü sütewa. Thi Saul wie nga ma küüsü ma kümüshe.