Read Pochuri Naga KÜÜRORI 8 Bible Online

KÜÜRORI 8 - Pochuri Naga bible

KÜÜRORI 8

¹Thi jüma rülo vünüh Jerusalem vü Nazizheh kümnomna kütsü hozake shuteru; thi povüküsari wieküchie nüh küpari thuoüji Judea thi Samaria azhih vü zheküporie küze khehmü.

²Thi VÜWA vü kürho tsütekütse wuori nüh khieloti krienü Stefen chowumü.

³Thitü Saul tü Kümühu zorie, nyiaza vü tu nü nyimpari nga nyimzari nga thothoti sho wa taji küsizhe lovü thse.

⁴Zhe küvorie küüzeri tü vorie porie wa nü Zhülekümühiewa küza.

⁵Filip tü Samaria nyuküji vü tsuo nü Khrista zhüku zia taji küza.

⁶Thi jüla anyi ashiejiwa tü Filip nüh küüzari künara thi ma nüh thsoshi küsari ngu taji luoveh küsü sanü amüshe thse.

⁷Mükümtse sietseri pekümü anyi hozake vünüh zianü shutewa; jümpa mükünyu wiechuküsüri thi rünyihküpriri nga sakümühie tsü.

⁸Jükenüh nyuküji jüla tü khieloti lozhe she.

⁹Thitü anyu jüla anyi küsü anyo Simon ti küsawa tü jüma tüvü nyuküji jüla ma kütüma sanü Samaria anyiri sa küngo taji ma mpa ma tü kütholari küsü tichieke.

¹⁰Mari aveh nga ma vü amüshe thse, thi kürünguo vünüh wa kükhruo küju nüh, “Anyi hamatü küthola ta küji Saküüwuowa kükhra küpewa wiethuoh,” ti sa.

¹¹Thi mari tü ma vü amüshe thse, küpakenühnyunü tsotho hothake ma kütüma sanü mari saküngo.

¹²Thitü Filip nüh Saküüwuowa kükaji thi Jisu nyo zhühthe kümühiewa vi küüza tsotü nü nyimpari nga nyimzari nga baptis sa khe.

¹³Simon kütümawa wie nga tsotü taji baptis sanü Filip sietse pehuo. Thi küükrükükrari thi küngo küüroküji küsari ngu nü khieloti ngo.

¹⁴Samariari Saküüwuowa zhü künavehthuoh ta küsa Jerusalem vü küpe povüküsari nüh thsüra ünü mari nüh Pitor thi Johan mari vü küze.

¹⁵Mari Kümtse Sietse küüngu naküsa kenüh masü tü runü makeri’a nüh kükhuo sa.

¹⁶Küpakenühnyunü mari nyi küsü vü nga Kümtse Sietse müjie turu nüh VÜWA Jisu nyo vünüh baptis mpa saküsa kenüh.

¹⁷Jüti sataji masü nüh masü ake mari vü thsuoke ünü Kümtse Sietse ngura.

¹⁸Masü ake küthsuoke vünüh Kümtse Sietse küngura Simon nüh ngu nü ma nüh pesa vi masü tsü taji,

¹⁹“Hi nüh anyi thari vü eh ke thsuotsü naveh nüh jümari nga Kümtse Sietse ngu naküsa kenüh hi nga kükhra jüma tsümo,” ti khuo.

²⁰Thitü Pitor nüh ma vü, “Noh pesa nga thi noh nga nyihsuozü vü tewaluo, küpakenühnyunü noh kümüshe vü pesanüh Saküüwuowa nüh kütsia kütsüwa süra naküsa müshe küveh kenüh.

²¹Noh tü hala noh mütho nyutü noh jisuo münyieluo, küpakenühnyunü noluoveh tü Saküüwuowa tüvü katomüküveh kenüh.

²²Jükenüh no kümüsü hama vünüh khaphrü nü VÜWAvü kükhuo saluo, thi samühie; thuoüji noluoveh lovü müshe küvehwatü nojatsü naveh.

²³Küpakenühnyunü noh tü noküüma kükha noh vü pro veh thi kükhiemuo küsi sa küveh hi nüh nguveh,” ti küza.

²⁴Thinü Simon nüh, “Noh nüh hi vü mowa küzaveh nüh jümari hi vü müru nüh sana küsa kenüh VÜWA vü ehkenüh kükhuo sa tüluo,” ti küza.

²⁵Jüti sataji mari nüh VÜWA povü thi azhüwa küzakümü sevü mari tü shele Jerusalem vü küru vü lekhujivü Samaria azhih vü anyu hozake vü Zhühthe Kümühiewa küzaru.

²⁶Thitü VÜWA zhüleri küsü nüh Filip vü, “Süra taji tse zhieseh vü Jerusalem vünüh Gaza vü kütsuo leh vü waluo,” ti küza. Ale hamatü rezale küsü (Thi ale hamatü khinyi nü tse müvehthuoh).

²⁷Jüti küüza vü ma tü süra nü tsewa. Thinü halie, Ethiopiari (eunak) küsü Ethiopiari kajivühwa Kandasi künyirhie aveh künowa tü Jerusalem vü wa nü kükhurü sanü ma zhievü shele tse.

²⁸Ma tü rawu rügivü shupe nü shele kütse vü setsaküthsüwa lasi Isaya chie müngu nü tse.

²⁹Thinü Sietsewa nüh Filip vü, “Wa nü rawugari tuma shenyiwaluo,” ti küza.

³⁰Thinü Filip tü ma vü zhüwa ünü ma tü Isaya setsaküthsüwa lasi chiekütsela künara, thinü ma nüh ma vü, “Noh tü noh nüh chieküvehwa zhünyo thsüra vehlo?” ti küna.

³¹Thinü ma nüh, “Anyi wuori nüh küjo hi mükütsü sevü hi nüh khiela nüh hi mpa thsüra na lo?” ti küza. Jütiküsavü ma nüh Filip tü ru ma kütuovü pe üti ji.

³²Ma nüh zhütsazhü chiekütsewa tü hama: Nyihzhü fethe nta sieküwa kümüjie, nyutü nyihzhüza ma küno kümüjiewa atüvü zo ta küpe kümüjie, ma tü zhü küsü nga müphra.

³³Ma nüh rünyie nü kürho vü ma shih samükükato nüh samütü. Thawa nüh ma küthsoküzhiri küza khehra na lo? Küpakenühnyunü azhih vünüh ma kürhowa viteküwathuoh kenüh.

³⁴Thinü Ethiopiari küjiwa nüh Filip vü, “Hi nüh noh vü khuoveh, setsaküthsüwa hamatü ma mpa ma zhü phrate vehünü nyi wuora zhü phrate veh lo?” ti küna.

³⁵Thinü Filip tü ma po ka taji zhütsazhü wa phrate nü Jisu zhüku kümühie küzawa.

³⁶Jüti sataji masü tü tsewa ünü ajuh pike küpehpe vüru, thinü Ethiopiari küjiwa nüh, “Halie, ajuh hala pevehlie, tinü hi baptis küsa eh kükhe mowa peveh lo?” ti küza.

³⁷Thinü Filip nüh, “Noh nüh noh luoveh aveh vi tsotü veh thuoüji baptis samühieveh,” ti rületsü. Thinü ma nüh, “Jisu Khrista tü Saküüwuowa Tsa ta küsa hi nüh tsotüvehthuoh,” ti rületsü.

³⁸Thinü ma nüh rawugariwa tsie üti küza nü masükhürü ajuh lovü tu nü ma baptis küüsa.

³⁹Jüti sataji masü ajuh lovü nüh shuru ünü Saküüwuowa Sietse nüh Filip vitekuo nü sietewa.

⁴⁰Thi Filip thuoüji Azotas vü kütse ngu, thitü Ethiopiawa thuoüji Kaisaria vü müjie ruküju nü ma tü nyuküza avehvü Zhühthe Kümühiewa küza ruju.