Read Pochuri Naga ROMRI 11 Bible Online

ROMRI 11 - Pochuri Naga bible

ROMRI 11

¹ Thinü hi nüh, Saküüwuowa tü ma nyiri kulemüthuoh ülo? ti küna. Piketü nyuwie! Hi wie nga Israelri Abraham küshukürari Benjamin zhehlori küsü wie.

²Saküüwuowa nüh khana vünüh thsükütse ma nyiri kule müsa. Zhütsazhü nüh Elijah zhühku küphrate nohri müthsü ülo? Ma nüh Saküüwuowa vü Israelri alü vü küluosa hakümjie:

³ “VÜWA, mari nüh noh setsaküthsüri zothemü, mari nüh noh kükhurüpe zoriemüthuoh, thi hi mpa kükhe savehthuoh, thi mari tü eh kürholi vi nta hi phavehthuoh,” ti sa.

⁴ Thitü Saküüwuowa nüh ma vü rüle kütsü mowa lo? “Khotsütsuo Baal mükütsü hi nüh eh kenüh anyi nyie türü saveh,” ti rüle tsü.

⁵Jükenüh khinyi nga küümze vünüh rüka küsa anyi wuori münyia sa veh.

⁶Jümatü küümze vünüh thuoüji jümatü küürori vünüh nyuwiethuoh, jüüta mükünyunü küümzewa tü küümzenyuthuoh. Thitü jümatü küüro vünüh thuoüji jümatü küümze vünüh nyuthuoh; jüüta mükünyunü küürowa tü küüro nyuthuoh.

⁷Thinü mowa lo? Israel nüh phakütsewa tü müngura nüh samüthuoh. Rüka küsari thuoüji ngurathuoh, thitü küpari luoveh thuoüji sakükhomüthuoh,

⁸ jüma kenüh zhütsazhü nüh küüza, “Saküüwuowa nüh mari luoveh sakürüpomüthuoh, nosü küju wienga mari notha tü zanyomüküüngu nta samüthuoh, thi mari khüna tü zanyo müküünanta samüthuoh,” ta rhüsa veh.

⁹Thi David nüh: “Mari tü mari kütsaküzhu vünüh küza thi müküüngura saluo, thi azhikrie lovü külukeluo thi küümünomüna luo;

¹⁰Mari notha saküüzomütü nü zanyo müküüngura saluo, thi mari küshih tü küsuokürho küükhomü luo,” ta küza saveh.

¹¹Thi hi nüh, thinü mari küüluna küsa kenüh mari ajih tieteülo? Piketü nyuwie! Thitü mari nüh müküle sakümü kenüh Israelri no küürüpa nta küülolewa tü Judah mükünyuri vü teruthuoh.

¹²Thi mari mükülewatü azhihwa künyirhie kenüh, thi mari müküsarawa tü Judah mükünyura kenüh künyirhie wiethuoh, thinü jüta thuoüji mari aküzhitsahwa thuoüji küzakele nga jüma nyia vünüh nathuoh lo!

¹³Halie hi nüh nohri Judahmükünyuri vü küza veh. Hi nüh Judahmükünyuri vü VÜWA povü küsari saküpeh küju nü ehküürowa saküjiwie naveh.

¹⁴Thi jüti sanü eh fü küsa Judahri tü jüma noküüjizhi nü mari wuori küülole naveh.

¹⁵Küpakenühnyunü mari kükuletü azhihwa siekütsarü, thi mari sielethuoüji aküsü vünüh akürhowiethuoh.

¹⁶Küsuokhuo sah nü kütsü apokhuwa tü mütseveh thuoüji avehveh nga jükümjie wiethuoh, arüzo vü mütsemüthuoüji atsuonavü nga mütsemüthuoh.

¹⁷Thitü küüje Olive tsuona wuori zoshimü nü reza vü küpeh Olive tsuona wuori viru jüla küpe ke. Nohri Judahmükünyuri tü jükümjie ru Judahri sietse kürho vü nyiküüpekewie.

¹⁸Thitü tsuona kümüjie zoshikümüri vü mürhiezatümü. Küpakenühnyunü noh tü tsuona wie, noh tü mürhiezara. Noh nüh rühzori kükra müveh, rühzo nüh no kükra veh.

¹⁹Noh nüh hi küüpeke na küsa kenüh tsuonari tü zoshi saveh ta phrate naveh.

²⁰Jümatü zhütsawiethuoh. Mari nüh mükütsotü kenüh mari tü zoshitsamüwiethuoh, thitü kütsotü kenüh noh tü tsieküümüzhora wie. Jükenüh rhiezatemüwatü krü nü tsie luo.

²¹Küpakenühnyunü Saküüwuowa nüh matsuonawiwa nga mümüshie thuoüji ma tü nohri kümüshiewanyu.

²²Thinü Saküüwuowa küümze thi ma zhü kükho thsüluo; külukümüri vü thuoüji ma zhü kho she, thitü noh nüh maküümze vü peh thuoüji no kümüze wie naveh, nyuthuoüji noh nga mpoja naveh.

²³Thi Judahri nga mari mükütsotüwa jamüthuoüji mari apeh vü viwa samü le naveh, küpakenühnyunü Saküüwuowa thuoüji jüta salera naküveh kenüh.

²⁴Thi Judahmükünyuri tü reza vü küpeh Olive tsuonawa zahwa nü küje küveh Olive rhu vü küpeke thuoüji ma mpa ma rhu vünüh zoshi küsawa viwa küüpele nü rüzi na lo.

²⁵Eh füri, nohri mpa nüh nohri küthsüwa vi müsheküji temüwa nüh hi nüh azhü küshe hama küüthsüngü veh: thi jümatü Judahmükünyuri zhi jukümü tsothowa müjie küju nü Israel wuori luoveh sakükhomüthuoh.

²⁶Jütisanü Israelri aveh külole naveh: Jüma kenüh rhüküsa hakümjie: “Zion vünüh küülolewa shuru naveh, ma nüh Jacob küshuküra vünüh mükümühie aveh vijamü naveh.

²⁷Hi nüh mari kükhiemuo vijamüthuoüji hama nüh hi nüh mari siekütsathuoh sanaveh,” ti küza.

²⁸Zhühthe Kümühiewa vünüh müzhe nta thuoüji mari tü nohri kenüh Saküüwuowa mükünongüri; thitü kürüka vünüh thuoüji khanavü mari apari kenüh küümzeri.

²⁹Küpakenühnyunü Saküüwuowa nü ma nüh rüka küsawa thi tsiatsü küsawa vü thuoüji ma müshe mükhaphrü.

³⁰Nohri Judahmükünyuri tü khanavü thuoüji Saküüwuowa zhümüküna nüh samü, thitü khinyi thuoüji Saküüwuowa küümze ngumüthuoh, küpakenühnyunü Judahri nüh azhümüküna nüh sakümü kenüh.

³¹Jükümjie nohri vü küümzewa kütsa kütsü kümüjie Judahri nga küümzewa ngu naküsa kenüh mari tü Saküüwuowa zhü müküna nüh tetsethuoh.

³²Küpakenühnyunü Saküüwuowa nüh nyiri aveh vü küümze peh naküsa kenüh nyiri aveh azhümüküüna vü thsemüthuoh.

³³Halie Saküüwuowa künyirhie thi ma kümütsa thi küthsü tüshehshe. Küzakele nga ma nüh nyuri küjo naküsa phahkho thi ma lekhujiri tü küzakele nga thsükho lo?

³⁴Zhütsazhü nüh küzake küsa: “Thawa nüh VÜWA müshe thsü sa veh lo, nyutü thawa nüh ma sosiekütsüra sa lo?

³⁵ Nyutü ma nüh tsüle na küsa kenüh thawa nüh ma tsü sa veh lo?” ta küza sa veh.

³⁶ Küpakenühnyunü ma vünüh thi ma kenüh thi ma nüh zanyo avehsa. Ma nüh küsuokürho kütholawa küüsaluo! Amen.