Read Pochuri Naga ROMRI 13 Bible Online

ROMRI 13 - Pochuri Naga bible

ROMRI 13

¹Nyi küsüküsü nga hiri nyia vü kükhraküviri kükhu vü rholuo. Küpakenühnyunü Saküüwuowa vünüh küchie nüh kükhramükünyie kenüh, thi kükhra vi küvehri tü Saküüwuowa vünüh wie.

²Jükenüh thari nüh kükhra küviri kuleveh nüh Saküüwuowa nüh saküsari kule veh, thi kükuleri thuoüji kümnomna ngu wienaveh.

³Küpakenühnyunü küji jümari tü zanyo kümühie wuovü mari küükrü na küsa nyu nü kümüsü küsari küükra na küsa wie. Jütathuoüji noh tü kükhra vü peküvehri mükrü ülo? Thinü zanyo kümühie saluo, jüüta thuoüji noh tü ma vünüh küsiake ngu naveh,

⁴küpakenühnyunü no küümühie na küsa kenüh ma tü Saküüwuowa siepe wiethuoh. Thitü noh nüh müküle satse thuoüji krü luo, ma tü anyusuowa tü müjuju vünüh vimütse, ma tü Saküüwuowa siepe sakümü kenüh müküle küsari vü ma rüküshuwa vi küro mühieveh.

⁵Jükenüh Saküüwuowa rüküshu vünüh kari na küsa kenüh nyunü nohri lovü kümühie kümüsü küthsüra kümüshewa kenüh kükhra küviri kükhu vü mürhoji mümühie.

⁶ Küpakenühnyunü azhünyo jüma kenüh akhrüri nga tsü veh, hakümjie küsa vünüh kükhraküviri tü Saküüwuowa sieperi wie.

⁷Mari vü kütsülehri tsümü luo, akhrü thawa vü kütsülehpeveh ünü tsümü luo, pesa küthuohleh thawa vü peveh nüh tsümü luo, kükrü lehri krü luo, thi küsiake lehri siakeluo.

⁸Küsü nüh küsü küümze küchie nüh nyi küsü vü nga amüthoh sawie naveh ti mümüshetümü; küpakenühnyunü mazhephruri kümüze kütsewa thuoüji Khonyowa saju vehthuoh.

⁹ Azhükütsü: “Noh küüphroküphrie küsavüh nyu, no nyiri küfethevüh nyu, no akürie povü küsavüh nyu, no nyura zhikümünguvüh nyu,” thi azhütsüküsa küpa nga pehwie ketünga hari aveh azhü küsü vünüh shuküru khehwie, azhü, “Noh mpano küümze kümüjie no zhephruri kümüze luo,” ti küsawawiethuoh.

¹⁰Küümüze thuoüji azhephruri vü kümüsü müsa; jükenüh küümze thuoüji Khonyo küsajuwa wiethuoh.

¹¹Hama nyia vü nga tsothowa tü mowa thuoh nüh nohri nüh thsü veh, jümatü nohri aküzeh vünüh küsüra tsothowa juvehthuoh. Küpakenühnyunü küülole thuoüji khanavü hiri nüh tsotü küru nyia vünüh khinyi nüh küüshenyi thuoh.

¹²Rüza thuoüji aküzhi vünüh tewathuoh, thi kütho tsothowa shenyi shemüthuoh. Jükenüh hiri kürü aküzo küürori jamünü küwie riesarieri vikevü luo.

¹³Lozhe nü tsazhu thi müshe, loküra lekhuji vü tewa thi küphroküphrie, küraluo thi nomükümaluotümü nü rülo vü kümüjie hiri khukewa kümüsho vünüh rho ünüh raluo.

¹⁴Jütanyunü VÜWA Jisu Khrista vikevü luo, asazüh vü amüshe müthsetümü thi jüma kümüngu aloküra müsatümü.