Read Pochuri Naga ROMRI 16 Bible Online

ROMRI 16 - Pochuri Naga bible

ROMRI 16

¹Hi nüh nohri vü hiri atsehvü Foebi Kenkhrea Nazizheh vü Dikonvüh küsawa küze veh.

²Jümatü VÜWA vünüh nohri nüh ma sie nü kümtseri künyia sara na ti sanü küze veh, thi ma nüh nohri vünüh momowa müviji mümühie nüh kükratsüluo, küpakenühnyunü ma tü nyiri hozake wie nga thi hi wie nga kükrakütsüvühri küsü sa ru.

³Khrista Jisu vünüh hi sie küro kütse Priska thi Aquila masü vü külozhe zhü tsüküze veh;

⁴eh kenüh masü kürho nga tsü, hi mpa mükünyu Judah mükünyuri wie nga masü kümüna tsü veh.

⁵Nazizheh masü azhe vü küpehwa vü nga külozhe zhü tsüveh. Eh küümzetsahwa Epaeneta, Asia vü Khrista kenüh luovehkükhaphrü khuwa vü nga külozhe zhü tsü veh.

⁶Nohri azhie vü kükhra thse nü küürowa Maria vü nga külozhezhü tsü veh.

⁷Eh kuo thi kürü küsi küsa künyi Andronika thi Junia masü vünga külozhe zhü tsü veh, masü tü e tü vünüh Khrista vü peh la thi masü tü povüküsari azhie vü küthohlari khe.

⁸VÜWA vünüh eh küümzetsahwa Ampliata vü nga külozhe zhütsü veh.

⁹Khrista vünüh kürü küürowa Urbana thi eh küümzetsahwa Stakhi vü nga külozhe zhü tsü veh.

¹⁰Khrista vü tekütsewa Apeles vü nga külozhe zhü tsü veh. Aristobulas tharuo vü küpehri vü nga külozhe zhü tsü veh.

¹¹Eh kuowa Herodion vü nga külozhe zhü tsü veh. VÜWA vünüh Narkiso tharuo vü küpehri vü nga külozhe zhü tsü veh.

¹²VÜWA vünüh kürokütse Trifaena thi Trifosa masü vü nga külozhe zhü tsü veh. VÜWA vünüh kükhra thse nü küro kütse küümze Persis vü nga külozhe zhü tsü veh.

¹³VÜWA vünüh küthola sanü kütse Rufas vü nga thi hisü azavü nga külozhe zhü tsü veh.

¹⁴Asinkrita, Flego, Herme, Patroba, Herma thi afüri mari vü nyipeh küvehri vü nga külozhe zhü tsü veh.

¹⁵Filologu, Julia, Nereo, thi ma tsehvüwa, thi Olimpas thi kümtseri mari siepehküvehri vü nga külozhe zhü tsü veh.

¹⁶Kümtseri küümeluo rühle vünüh küsü nüh küsü vü külozhe tsüluo. Khrista Nazizheh aveh nüh nohri vü külozhezhü tsü veh.

¹⁷Eh füri, nohri vü küsosiezhü tsüküsari sieküüproluori thi refü saküüporieri thi nyiri kütsotü saküümüsüri vünüh azhüzhüluo, thi mari vünüh letsuo luo.

¹⁸Anyi jüüta küsari thuoüji hiri VÜWA Khrista zhuh müküro nüh mari mpa mari avo phatsa kütsewie. Mari tü azhü küzü thi küthse rieriekhri nü küsa zhü vi luoveh kürünyieri luoveh müra kütsewie.

¹⁹Küpakenühnyunü nohri nüh azhüküünari sakütse nyiri aveh nüh thsüvehthuoh thi hi tü jükenüh nohri kenüh lozhe veh, thi hi nüh nohri tü zanyo kümühie wuovü thuoüji zanyo thsü thi kümüsü wuovü thuoüji küürüpo nthe.

²⁰Jütathuoüji kürükümhie sakütsü Saküüwuowa nüh shita Tsuore vi nohri jihnyi küüsa naveh. Hiri VÜWA Jisu Khrista küümzewa nüh nohri siekütsewa saluo.

²¹ Hi sie küro kütsewa Timothi thi jükümjie eh kuori Lukia thi Jason Sosipater ri nga nohri vü külozhe zhü tsü veh.

²²Hi Tertius, lasi hama kürhüwa nga VÜWA vünüh nohri vü külozhe zhü tsü veh.

²³Gaius, eh küzewa thi kümühu aveh nga nohri vü külozhe zhü tsüveh. Erastas, nyuküjiwa vü künyirhie küsathewa, thi hiri füwa Quartus nga nohri vü külozhe zhü tsü veh.

²⁴Hiri VÜWA Jisu Khrista küümzewa nüh nohri aveh siekütsewa saluo. Amen.

²⁵Eh Zhühthe Kümühie thi Jisu Khrista zhü vi küsosie vünüh ma nüh nohri kütsotü saküükhrawa siakeluo, zhühle jümatüa wura hothake vünüh küthisanü müküthsü vünüh küthsükütsüwa.

²⁶Thitü küsuokürho Saküüwuowa kümüshe azhükütsü vünüh khinyi thuoüji akuoh aveh vü saküthsümüthuoh, thi setsaküthsüri lasi kürhü vünüh küthsümüthuoh, thi jümatü kütsotü zhüwa küüna nahküsa kenüh.

²⁷Ma mpa zanyoküthsü Saküüwuowa tü Jisu Khrista vünüh küsuokürho küthohlawa saluo! Amen.