Read Pochuri Naga ROMRI 2 Bible Online

ROMRI 2 - Pochuri Naga bible

ROMRI 2

¹Jükenüh halie, nyiri; nohri küsüküsü nga saluo, nohri nyuri müshekümüsüri thuoüji zanyoküsü nga küphratera münyie, küpakenühnyunü teküwa tsotho vü noh nüh nyuri müshe müsütaji noh mpa no müküchie sakümüthuoh kenüh, noh nyuri müshekümüsüwa noh wie nga jü khem ta saküveh kenüh.

²Thi Saküüwuowa müshekümüsütü jüüta sakütseri aveh vükhem ta ru küveh hiri nüh thsüveh.

³Jükenüh anyiwa, noh tü jüüta küsari küjo thi no thuoüji jüüta sanü Saküüwuowa ashih küsawa vünüh küthirana timüsheveh ülo?

⁴Nyutü noh tü ma kümühie thi ma küüzhike thi ma luovehküsuoküle veh ülo? Saküüwuowa kümühiewa nüh noh sieluoveh kükhaphrü vü wa nata noh tü müthsü ülo

⁵Thitü jüütathuoüji noh tü noh mpa nüh noh luoveh kükho thi noluoveh mükükhaphrü nüh noh mpa noh rüküshuwa vükepeh nü arüküshu rülo Saküüwuowa nüh künyitsa vünüh ashih sanü küthsüküngu na küsa juna küsawiethuoh.

⁶Küpakenühnyunü ma nüh nyiri aveh vü nga ma küüro kümüjie vünüh kümüliewa satsü naküveh kenüh.

⁷Thi thari nüh küzhikezhikhri nü zanyo kümühie sa thi kütholathovü thi küsiake thi müküprikürarah phakütseri thuoüji ma nüh küsuokürho tsü naveh.

⁸Thitü thari nüh kürü kümüsü satse nüh, thi küzhütsawazhü müküna nüh sanü khuke kümüsü azhü küna tse nüh jümari vü thuoüji azhühkha thi arüküshu tsü naveh.

⁹Judahri nüh apo thi Greekri nga ti aveh kümüsü küsari aveh vü thuoüji kümnomna thi kükho tsü naveh.

¹⁰Thitü Judahri nüh apo thi Greekri nga ti thari nüh zanyokümühie sanaveh nüh jümari vü thuoüji küthola thi küsiakethi kürünyi tsü naveh.

¹¹ Küpakenühnyunü Saküüwuowa thuoüji kümürhükümüze münyieluo.

¹²Thi thari nüh Khonyo mükünyie vünüh khiemuo naveh nüh Khonyo mükünyie vünüh sü wie naveh, thi thari nüh Khonyo kükhuvünüh khiemuo naveh nüh Khonyo vünüh ashih sa wie naveh.

¹³Küpakenühnyunü Saküüwuowa tüvü künyitsari tü Khonyoküünari nüh nyu nü Khonyo müzhe kütseri mpa nüh müshomü naveh.

¹⁴Thi mükütsotüri wie nga nyiri nüh küsa Khonyo münyiewie ketünga mari mpa mari kürho vünüh khonyo kenüh müsaji mükümühieri satse veh.

¹⁵Khonyowa nüh müviji mükümühieri mari luoveh vü rhüke kütsekütsanü mari müshewa nüh jüma mükato nyütu katoveh taküsa povü sa tsütsüti.

¹⁶Jükenüh hi nüh Zhühthe Kümühiewa küphrate kümüjie jüma rülovü Saküüwuowa nüh Khrista Jisu vünüh küüthi luovehri aveh ashih sawie naveh.

¹⁷Thitü noh tü noh mpa nüh Judahri ta sanü Khonyowa rügi vü peh thi Saküüwuowa sie kütsarüri kenüh rhieza.

¹⁸Küpakenühnyunü Khonyo vü nohri sosie küsa kenüh ma kümüshethsü thi zanyo kümühietsahwa mühiemü ta sa.

¹⁹Noh tü nothaküüjura lekhuji küüjori tsah thuoüji, thi aküzovü küpehra küwiewa tsah thuoüji;

²⁰thi Khonyo vü küthsü thi küzhütsa pehveh ta thsüto nü zanyomüküthsüri sakümüsho thi kürünguori sosie ti sataji,

²¹noh nyuri küsosiewa, noh tü noh mpa noh müsosie nüh sanaveh lo? Mürühutsatümü üta noh tü nyuri sosie nü noh thuoüji rühutsaveh ülo?

²²Nyimza nyimpa muomuo müsatümü üta noh nüh nyuri küza taji noh nüh saveh ülo? Noh kükhurü tsorheri kükrewa, noh tü kükhurüzhe vünüh zanyo rühu veh ülo?

²³Khonyo müzhe nü tseveh ta noh mpa rhieza kütsewa, noh khonyophrürie nü Saküüwuowa müküchie satse la?

²⁴Küpakenühnyunü rhüküsa: “Nohri kenüh Saküüwuowa nyo mükütsotüri aza vü saküzükrümüthuoh,” ta zhütsazhü vü rhüsaveh.

²⁵Noh nüh Khonyo müzhe thuoüji ahukürhe tü no kenüh akünyia pehveh, thitü noh nüh Khonyowa zokhuovehthuoh üji no hurheküsawatü mükürhe kümüjiewiethuoh.

²⁶Jükenüh ahu mükürheri nyi küsü nüh Khonyo zhühnyori müzhetsethuoh üji, ma ahu mükürhewa tü rhemüthuoh ta müchieke nüh sanaveh ülo?

²⁷Rhüküsa Khonyori noh nüh peh thi noh nüh ahu rhe nü Khonyowa zorie tse thuoüji satsa ahu mükürhewa nüh mürhe nüh Khonyo müzhekütsewa nüh noh müküchie vü thsemünathuoh.

²⁸Küpakenühnyunü alie vünüh küthse nyutü küzhütsa vünüh nyu nü alievü mpa nüh thi asa mpa nüh kürhe thuoüji Judah tsahri nyu.

²⁹ Judahri thuoüji alo vü nüh, thi küzhütsa hukürhe thuoüji luoveh vünüh, thi alievü nüh nyu nü Saküüwuowa vünüh.