Read Pochuri Naga ROMRI 3 Bible Online

ROMRI 3 - Pochuri Naga bible

ROMRI 3

¹Thinü Judahri tü mokümjie vünüh Judahmükünyuri nyiavünüh mühie veh ülo? Nyutü hukürhe tü ma künyia mowa pevehlo?

²Lekhuji aveh vü ma kümühie hozake peveh. Küphratekhuwa thuoüji, Judahri vü Saküüwuowa zhühlewa tsotü küsa kenüh.

³Thinü anyi wuori nüh mükütsotü kenüh Saküüwuowa künyitsawa mameh mükünyie samü naveh ülo?

⁴Ma mpa küsü nga satüsatü nyiri aveh nü azhüriemüwie ketünga Saküüwuowa thuoüji künyitsawa küüsamü luo, küpakenühnyunü rhüküsa: “Noh zhüri vünüh noh tü nyitsamü ta sanaveh, thi noh müte küwa vü khrarawie naveh,” ta zhütsazhü nüh küza.

⁵Thitü hiri mükümühie vi Saküüwuowa künyitsa sakütsa nta thuoüji hiri tü mowa phrate naveh lo? Saküüwuowa nüh hiri vü kümnomna kütsüvü ma tü müküle samüthuoh ta sanaveh ülo? (hi nüh nyiri müshe kümüjie vünüh phrate veh.)

⁶Ma mpa küsü nga satüsatü Saküüwuowa nüh münyitsa thuoüji mokümjie azhihwa ashih sara naveh lo?

⁷Thitü hi küzhühja nüh Saküüwuowa küzhütsa saküzhi nü ma sakütholaveh üji hi tü mokenüh kükhiemuori ta satse pehuonaveh lo?

⁸Thinü jütathuoüji zanyo kümühie küru na küsa kenüh kümüsü sa ünü raluo. Hi nüh hama küphrate kenüh anyi wuori nüh hi küjo nü phratekümüsü veh. Mari müshemümüsüji mükümühie kümüjie mari tü müshemüsümüthuoh.

⁹Thinü hiri Judahri tü Judahmükünyuri nyia vünüh mühieküpaveh ülo? Mükünyuwa wie. Küpakenühnyunü hi nüh, Judahri nga thi mükünyuri nga kükhiemuo kükhra kükhu vü pemüthuoh ti hi nüh küzamüthuoh.

¹⁰ Küpakenühnyunü zhütsazhü nüh: Nyi küsü nga münyitsathuoh, nyi küsü nga nyuwiethuoh;

¹¹nyi küsü nga zanyokümüshe münyiewiethuoh, nyi küsü nga Saküüwuowa küpha münyiethuoh.

¹²Aveh nga lekhuji khaphrü tetsethuoh, mari aveh nga kürü müküle vü tewathuoh; nyi küsü nga kümühie samütsewiethuoh, nyi küsütsatsa nga nyuwiethuoh.

¹³Mari khuru tü rüku küpieke kümüjiethuoh, mari mizhi vi kümüra samüthuoh, müre mütse kümüzhiwa mari pomie vü pemüthuoh.

¹⁴ Mari apo lovü nyuri kümüzü thi zhühkha mpa nüh pro veh.

¹⁵ Nyuri fethe nta mari jih tü khazhu wawati;

¹⁶Mari nüh khakütse lekhujiri vü tü zanyo küzorie thi lokürü mpa,

¹⁷Thi mari tü kürü kümühiewa lekhuji thuoüji müthsü,

¹⁸mari notha vü Saküüwuowa kükrü münyie.

¹⁹Thi Khonyo nüh momowa küza veh nüh Khonyo kükhu vü küperivü küzaküveh hiri nüh thsüveh, jükenüh nyiri aveh mükülekhete na küsa kenüh azhih aveh Saküüwuowa ashih vü viteru veh.

²⁰ Khonyo nüh müsajimükümühiewa küsa kenüh nyi küsü nga Saküüwuowa tüvü müshoveh ta müsara; Khonyo nüh momowa saveh nüh jümatü anyiwa kükhiemuo saküthsü na küsa kenüh wie.

²¹Mosa Khonyo thi setsaküthsüri nüh jüma vü mari povü sawie ketünga jümatü Khonyo sie zanyoküsü nga küsa münyie.

²² Saküüwuowa künyitsa jümatü Jisu Khrista vünüh kütsotüpeh, thi jümatü thari nüh tsotü naveh nüh jümari aveh thuoüji ngu naveh, küpakenühnyunü nyi küsü vü nga küüpa münyie;

²³küpakenühnyunü nyiri aveh khiemuo khehmüthuoh thi Saküüwuowa kümühie müju nüh sakümüthuoh kenüh.

²⁴Thitü Khrista Jisu vünüh Saküüwuowa küümze müjuju kütsü vünüh nyiri aveh nga sakürüzih tsü.

²⁵Kütsotü vünüh ngu na küsa kenüh Saküüwuowa nüh Jisu kümnomnavü thse taji ma züh nüh küsahthuoh sa. Hamatü Saküüwuowa künyitsa kütsana küsa kenüh wie, küpakenühnyunü khanavü thuoüji Saküüwuowa tü küzhike nü kükhiemuo notherie.

²⁶Thitü khinyi thuoüji ma tü nyitsa ta küsa küjokütsa thi Jisu vü kütsotü küpehri sakümüsho ti satsüveh.

²⁷Thinü hiri kürhieza tü mowa lo? Jüritü müchiekethuoh. Hiri nüh Mosa Khonyo kümüzhe kenüh ülo? Hiri küüroküli kenüh ülo? Nyuzhima, jümatü hiri kütsotü kenüh wie.

²⁸Küpakenühnyunü nyiri tü Khonyo nüh sa üta azhükütsü kenüh küsa nyu nü kütsotü vünüh müshora ta küsa thsütora.

²⁹Nyutü Saküüwuowa tü Judahri Saküüwuowa mpa ülo? Ma tü Judahmükünyura Saküüwuowa nga nyu ülo? Ah wiethuoh, Judahmükünyura kenüh nga wiethuoh.

³⁰Saküüwuowa tü küsü sakümü kenüh ahukürheri tü kütsotü rügi vünüh nokümüsho naveh thi ahu mükürheri thuoüji kütsotüra vünüh nokümüsho naveh.

³¹Thinü kütsotü hama kenüh Khonyowa jamü naveh ülo? Jüta viküpakümüwanyu, hiri tü Khonyowa vikümüzho wie