Read Pochuri Naga ROMRI 4 Bible Online

ROMRI 4 - Pochuri Naga bible

ROMRI 4

¹Thinü satsa vünüh khanavü apa saküru Abraham tü moti phratenathuoh lo?

²Küpakenühnyunü Abraham tü küürori vünüh müshomüthuoh tathuoüji ma tü rhieza mühievehthuoh, thitü Saküüwuowa atüvü thuoüji jüüta nyu.

³ Küpakenühnyunü Zhütsazhü nüh, “Abraham tü Saküüwuowa tsotü, jükenüh ma tü künyitsawa ta chieke.

⁴Küürowa kümülie kütsü tü aküte vünüh nyu thitü ma mpa ma ke wiethuoh.

⁵Thitü nyi küsü nüh mükürowie ketünga mükümüshori saküümüshowa tsotü thuoüji ma kütsotüwa tü künyitsari ta chiekemüthuoh.

⁶Jükümjie mükürowie ketünga nyitsaveh ta küsa Saküüwuowa nüh küchieke David nga nüh kümünga zhü küphra:

⁷ “Müküle noja kümütüri thi kükhiemuo tiehphotükümüri kümüngari;

⁸VÜWA nüh ma kükhiemuori ta müküchiekeri kümüngatsawa,” ta küza saveh.

⁹Thinü kümüngari ta küphrate tü ahukürheri vü mpa ünü mükürheri vü nga lo? Hiri nüh kütsotü nüh Abraham tü künyitsari ta phrateveh.

¹⁰Thinü ma küchieke tü mokümjie küsa vünüh lo? Jümatü mahu müjiekürhe atü vünüh ünü rhekümüsevü nüh lo? Nyu, jümatü rhekümüsevü nüh nyu nü ma hu müjie kürhe atüvü nüh wiethuoh.

¹¹ Ma nüh ahukürhe thuoüji müjie kürhe vünüh kütsotü vünüh künyitsara thsoshiwa fekevü. Mazhünyo thuoüji thari nüh ahu mürhe nüh tsotü naveh nüh jümari aveh pawa küüsana küsakenüh, thi jütisataji nü mari tü nyitsamüthuoh ta chiekemüthuoh.

¹²Thi jükümjie ma tü ahukürhera pawa, mari tü ahukürhe mpa nüh nyunü pawa Abraham nüh ma humüjiekürhe vünüh kütsotü thsoshiwa müzhe nü kürhori.

¹³Azhih aveh Abraham thi ma küshukürari nüh küüvi nta küzake küsawatü Khonyo vünüh müru nü küzhütsawa kütsotü vünüh wie.

¹⁴Mükütüküzü Saküüwuowa nüh phratekeküsawa tü Khonyo zhüküünari vü mpa tsü nta thuoüji nyira kütsotü tü mazhühnyo münyiethuoh thi Saküüwuowa nüh phratekeküsawa tü momasathuoh.

¹⁵Küpakenühnyunü Khonyowa tü Saküüwuowa arüküshu viru veh, thitü Khonyo mükünyie pe vü thuoüji Khonyo küphrürie nga münyie.

¹⁶Jükenüh jümatü kütsotü vünüh wie, ma nüh phratekeküsawa küümze vü peh na küsa kenüh thi ma küshuküra aveh vü pehna küsa kenüh, jümatü Khonyo vü küpehri kenüh mpa nyu nü Abraham kütsotü vü küsü küsari kenüh nga wie, küpakenühnyunü ma tü hiri aveh pawa küsa kenüh.

¹⁷Hama kenüh rhüküsa: “Hi nüh noh akuoh hozake apa noh nüh kütsotüwa Saküüwuowa atüvü küüsamüthuoh,” ta küza. Ma nüh akürho vi aküsüri vü tsü thi mükünyiewa saküüpehraveh.

¹⁸Akuoh hozake apa küüsana küsa kenüh ma tü küluozhe peh nü tsotü taji luozhe, ma vü küüza kümüjie, noh küshuküraritü wutsi müküchierhüra kümüjie saküzhitsü naveh.

¹⁹ Ma satsa vü müshe küze thuoüji ma tü ma kütsotü thuoüji thachumüküze, jümatü aküsü kümüjie wiethuoh, küpakenühnyunü ma tü mavi müzake kümüjie thuoh, nyutü Sara atsa müküsa müshe küzethuoüji.

²⁰Saküüwuowa nüh phratekeküsawa mütsotü nüh sanü kükhaphrükhale müsa, thitü ma nüh Saküüwuowa phrateküüji kümüjie ma kütsotüwa tü kümüzhomüzhowa wie.

²¹Thi Saküüwuowa nüh mowa küzakesaveh nüh satsawie naveh ti müshephoke wie.

²²Jükenüh ma kütsotüwa kenüh ma tü nyitsamü ta chieke.

²³Thitü ma küchieke azhüwa tü ma ke nüh mpa rhümüsa.

²⁴Thitü hiri kenüh nga rhü saveh. Jümatü thari nüh Jisu hiriVÜWA aküsü vünüh kürholewa tsotü naveh nüh mari nga künyitsari ta chieke naveh.

²⁵Hiri nüh müküwule sakümü kenüh ma tü küüsü thi hiri sakümüsho na küsa kenüh ma tü rhoshele tewa.