Read Pochuri Naga ROMRI 5 Bible Online

ROMRI 5 - Pochuri Naga bible

ROMRI 5

¹Jükenüh hiri tü kütsotü vünüh kümüsholera kümüjie, hiri tü hiri VÜWA Jisu Khrista vünüh Saküüwuowa siekürümühielera.

²Ma vünüh hiri tü lekhuji ngura nü hiri nüh tsieküveh küümze hala rura, thi jükenüh hiri tü hiri küluozhewa vilozhe nü Saküüwuowa kümühiewa kümühie phrate küsuoveh.

³Jüma nyia vü nga hiri tü kümnomna vünüh küüzhikengura veh ta küsa thsü nü hiri kümnomna vü nga lozhetseveh.

⁴Thi küüzhike vünüh khuke kümühie nguraveh, thi khukekümühie vünüh küluozhe nga nguraveh.

⁵Thi küluozhe jümatü piketü hiri saküüzükrüwa nyu, küpakenühnyunü hiri vü tsükümü Kümtse Sietse vünüh Saküüwuowa küümzetü hiri luoveh lovü küshoke küsathuoh kenüh.

⁶Hiri mükhra nüh kütse vü Khrista nüh tsotho vü khem ta mükütsotüri kenüh sümütüthuoh.

⁷Nyi küsü nüh künyitsari küsü kenüh sü na küsa tü khoshenaveh, thitü anyi wuori thuoüji anyi kümühieri kenüh thuoüji mükrü nüh sütü nga mühieveh.

⁸Thitü hiri nüh khiemuo nü kütse vü Khrista nüh hiri kenüh sü nü Saküüwuowa nüh hiri vü ma küümzewa kütsa.

⁹Jükenüh khinyi thuoüji hiri tü ma züh nüh hiri sakümüshomü thuoüji jüma nyia vünüh hiri tü Saküüwuowa rüküshu vünüh ma nüh külolenathuoh.

¹⁰Küpakenühnyunü hiri tü ma sie mükünoluongü satse ünü ma Tsa küsü kenüh Saküüwuowa sie küsü sa lera, ma sie küsüsa lerathuoh thi jüma nyia vünüh nga ma kürho kenüh hiri tü külolenathuoh.

¹¹Jümpa nyu nü hiri VÜWA Jisu Khrista vünüh Saküüwuowa vünga lozhevehthuoh, ma vünüh hiri kütsarüwa tü ngura.

¹²Jükenüh nyi küsü vünüh azhih vü kükhiemuo teru thi kükhiemuo vünüh aküsü teru, jükümjie aküsüwa tü nyiri aveh vü tewa, küpakenühnyunü nyiri aveh khiemuomüthuoh.

¹³Jükenüh Khonyowa müjie kütsü atü vünüh kükhiemuo tü azhihvü pemülathuoh, thitü Khonyo mükünyie vü thuoüji kükhiemuo tü müchieke.

¹⁴Jütawie ketünga kükhiemuo nüh Adam vünüh wa Mosa küju aküsü nüh kaji mülawiethuoh, Adam nüh phrürie taji khiemuokümü kümüjie mükükhiemuori vü nga wiethuoh, ma tü Runa küsawa thsoshi kümüjie nga wiethuoh.

¹⁵Thitü müjuju kütsüwa thuoüji küphrürie kümüjie nyu. Küpakenühnyunü nyi küsü nüh küphrürie vünüh anyi hozake sümü, thitü jüma nyia vünüh Saküüwuowa küümze thi aküte tü Jisu Khrista vünüh anyi hozake kenüh zhiwieveh.

¹⁶Thi akütewa tü nyi küsü nüh khiemuokümü zhühnyowa kümüjie nyu. Küpakenühnyunü nyi küsü nüh phrürie kümüvünüh müshemüsü nü ashih teru, thitü akütewa nüh phrürie kümüri hozake sakümüsho tsü le.

¹⁷Mükütüküzü nyi küsü nüh phrürie kümü kenüh nyi küsü vünüh aküsüwa nüh atakrü sateru thuoüji jüma nyia vünüh thari nüh küümze thi künyitsa müjuju Khrista vünüh kütsüwa ngu nüh jüma nüh küüzhi atakrü sa wienaveh.

¹⁸Thi nyi küsü nüh küphrürie vünüh nyiri aveh müshekümüsüvü sietewa thuoüji nyi küsü künyitsa küüro vünüh nyiri aveh kürüzih vü thi akürho vü siewa wieveh.

¹⁹Küpakenühnyunü nyi küsü nüh azhümüküna nüh sakümüvünüh nyiri hozake nga khiemuomü, jükümjie nyi küsü nüh azhü küüna vünüh nyiri hozake wienga nyitsara.

²⁰Khonyowa nüh küphrüriewa saküzhitsü nta ru, thitü kükhiemuokhiela zhi veh nüh küümze nüh jüma nyia vünüh küzhitsawawie.

²¹Jükümjie kükhiemuo nüh aküsü nyia kükhra kümüjie küümze nga Jisu Khrista hiri VÜWA vünüh künyitsa vünüh küsuokürho nyia khrawie veh.