Read Pochuri Naga ROMRI 6 Bible Online

ROMRI 6 - Pochuri Naga bible

ROMRI 6

¹Thinü mowa phrate na lo? Küümüzewa küzhi na küsa kenüh khiemuo pehuowie naveh lo?

²Jüta müsara! Hiri kükhiemuo wuovü sükümüri tü mokümjie sanü jüla rho peh huo naveh lo?

³Hiri thari nüh Khrista Jisu sie baptis sathuoh nüh aveh tü maküsü leh vü baptis sathuoh ta küsa müthsü ülo?

⁴Hiri tü jükenüh baptis küsa vünüh ma sie sümü nü chowumüthuoh, thi jüta küsa vünüh Khrista tü Pawa kükhra vünüh rhoküsürale kümüjie hiri nga akürho kürüthe vünüh tsera naveh.

⁵Küpakenühnyunü aküsü vü ma kümüjie ma sie zarike sarathuoüji kürhole vü nga ma kümüjie ma sie zarike sarawienaveh ta küsa hiri tü thsütoveh.

⁶Hiri kükhiemuo satsawa zoriemü na küsa kenüh hiri kürüwiwatü ma sie zekemüthuoh ta küsa hiri nüh thsüvehthuoh, thi hiri tü kükhiemuo siepe müsalethuoh.

⁷Küpakenühnyunü sükümüwatü kükhiemuo vünüh shuterathuoh.

⁸Hiri nüh Khrista sie nü sü thuoüji hiri nüh kümüshethuoüji hiri nga ma sie nü rho nathuoh.

⁹Küpakenühnyunü Khrista tü aküsü vünüh rhole kümüthuoh kenüh müsülerawiethuoh; küpakenühnyunü aküsü tü ma nyia vü kükhra münyiethuoh.

¹⁰Aküsü sühle sanü ma nüh sükümüwa tü küsükeri nüh aveh kenüh kükhiemuo kenüh sümütüthuoh; thi ma nüh rhoküvehwa thuoüji Saküüwuowa vü rhovehthuoh.

¹¹Jükenüh nohri nga kükhiemuowa vü sümüthuoh, thi Khrista Jisu vünüh Saküüwuowa vü rhovehthuoh ta küsa nohri thsüluo.

¹²Jükenüh nohri aküsü satsari tü kükhiemuo nüh takrü müküüsatümü thi noh tü jümari kümüngu vü müküütsetümü.

¹³Nohri satsa rühle küsü nga vi nü khuke kümüsü tsokrü kümüjie küsa kükhiemuo vü müthsetümü, thitü nohri satsaritü Saküüwuowa vü tsü nü aküsü vünüh akürho vü teküruri kümüjie saluo. Thi no satsari tü künyitsa tsokrükümüjie sanü Saküüwuowa tsüluo.

¹⁴Jütathuoüji kükhiemuo nüh nohri nyia vü mükhrarathuoh, küpakenühnyunü nohri tü khonyo kükhu vü pemüveh thuoh nü küümze kükhu vü peküvehthuoh kenüh.

¹⁵Thinü moti sana lo? Hiri tü khonyo kükhu vü pemüveh thuoh nüh küümze kükhu vü peveh thuohnü kükhiemuo samühie veh ülo? Piketü jüüta küsavühnyu.

¹⁶Noh nüh tühkha kümüjie no kürho tsü nü khiemawa azhükünanahveh nüh: Kükhiemuo zhü künamü tü jüma nüh noh sie aküsü vü wanathuoh, thi noh nüh VÜWA zhü küna tü jüma nüh noh sie künyitsa vü wanathuoh ta küsa nohri müthsü ülo?

¹⁷Thitü Saküüwuowa müna she, jüma thuoüji: nohri tü küsükeri kükhiemuo tühkha sa, thitü luoveh vünüh zhütsa sanü nohri mpa nohri tsüle nü küsosiezhü hala thseküsa kenüh.

¹⁸Thi kükhiemuo vünüh lejakümü kümüjie künyitsa tühkhasamüthuoh.

¹⁹Hi nüh nyira kete vünüh phrateveh, küpakenühnyunü nohri sazühküthsüwa küphe kümü kenüh. Küpakenühnyunü nohri tü küsükeri nohri kürho rühleri mükümtse vü thse thi kümüsüwa vü küzhiküzhi tewa, jükenüh khinyi thuoüji nohri kürho rühleri sakümtse na küsa kenüh künyitsa vü thse luo.

²⁰Nohri kükhiemuo tükha küsa vü thuoüji künyitsa wuovü münyie nüh sateru.

²¹Thitü nohri khinyi zükrü küveh zanyo jümari vünüh künyiamowa ngura lo? Zanyo jüri tü sehkhe vü thuoüji küsüwiethuoh.

²²Thitü khinyi thuoüji nohri tü kükhiemuo vünüh tsezhuru nü Saküüwuowa tükha sa vehthuoh, thi ma künyia thuoüji nohri sakümtsera thi sehkhe vü thuoüji küsuokürho wiethuoh.

²³Küpakenühnyunü kükhiemuo kümülie thuoüji aküsü, thitü Saküüwuowa nüh küte thuoüji Khrista Jisu hiri VÜWA vünüh küsuokürho.