Read Pochuri Naga ROMRI 7 Bible Online

ROMRI 7 - Pochuri Naga bible

ROMRI 7

¹Eh füri, hi nüh khonyowa küthsüri vü phrate veh, khonyowa tünyi küsü nüh rhoküveh nyia vü mpa phehte tseveh ta küsa nohri tü müthsü ülo?

²Jükümjie nyimzari vüpa sakümüwa tü ma vüpa kürho küju thuoüji khonyo nüh ma vüpa vü phehte sa veh, thitü ma vüpa sümüthuoüji ma vüpa khonyowa vünüh lejamütüthuoh.

³Mükütüküzü ma vüpa rhoküveh vünüh anyi küpari vü tewa rhothuoüji ma tü küüphroküphrievühri ta müzhe nü jimünathuoh. Thitü ma vüpa sümü thuoüji ma tü khonyo jümawa vünüh lejamüthuoh, thi ma nüh anyi küpari vü zawie ketünga ma tü küüphroküphrieri ta müjithuoh.

⁴Jükümjie eh füri, nohri tü Khrista satsa vünüh Khonyo vü sümüthuoh, jüti sanü küpawa, aküsü vünüh kürholewa azhisanü Saküüwuowa kenüh avi pe na küsa kenüh.

⁵Hiri sazüh vü kürho vü hiri satsa rühleri tü aküsü wuovü avi küüpe nta Khonyowa nüh sakürho nü kükhiemuo kümünguri sa.

⁶Thitü khinyi thuoüji hiri tü Khonyo vünüh lejamüthuoh, thi hiri re nü küsi küsawa vü sümüthuoh, jütisanü hiri tü Khonyo rhüküsa kürüwiwa kükhu vü müküro nüh kürhokürüthewa Sietse küüro satsethuoh.

⁷Thinü hiri tü mowa küza na lo? Khonyowa tü kükhiemuo wiethuoh ülo? Nyuwie, thitü Khonyowa mükünyutüla hi tü kükhiemuo müthsüra nüh samü naveh. Khonyowa nüh müküüzatüla, “Noh nyura zhi mümüngutümü,” ta küsawa hi tü müthsü nüh samü naveh.

⁸Thitü zhütsüküsawa vü kükhiemuo tü ma kenüh kümühieküsü sataji eh luoveh kümüngu küüro khielo ta sa. Khonyo mükünyutüla kükhiemuo thuoüji sümüwiethuoh.

⁹Hi tü küsükeri khonyo müvi nüh rho teru, thitü Khonyo zhükütsüwa teru ünü kükhiemuo tü sakürhotsü nü hi tü sümü.

¹⁰Khonyo zhükütsüwa nüh sakürho nta küsawa nüh hi vü küsüteru.

¹¹ Küpakenühnyunü kükhiemuo tü ma kenüh kümühie küsü saranü hi müra nü jüma nüh hi fethemü.

¹²Jükenüh Khonyowa tü mütsemü thi Khonyowa zhütsüküsawa tümütse thi müsho thi mühiemü.

¹³Thinü kümühie jüma nüh aküsü viru hi tsü ülo? Nyuwie, kükhiemuo nüh zanyo kümühie jüma vünüh hi vü aküsü kürotsü, küpakenühnyunü kükhiemuowa nüh kükhiemuo ta küjotsü na küsa kenüh, thi azhütsüküsawa vünüh kükhiemuotü müsüküluole ta sana küsa kenüh.

¹⁴Khonyowa tü sietse zhü ta küsa hiri nüh thsü veh, thitü hi thuoüji asazüh kükhiemuo kükhu vü zhuthsekümüwa.

¹⁵Hi nüh saküvehwa hi tü müthsü nüh sasati. Küpakenühnyunü hi nüh küsangüwa müsanüh hi nüh kümatsahwa sasati.

¹⁶Thi hi nüh müküsangüwa hi nüh sathuoüji Khonyowa tü mühiemü ta hi nüh phrate mühieveh.

¹⁷Jükenüh jümatü hi nüh samüvehthuoh nü kükhiemuo hi vü pehküvehwa nüh savehthuoh.

¹⁸Küpakenühnyunü eh satsa lovü tü kümühie küsü nga tümüveh. Zanyo kümühie thuoüji hi nüh müshera naveh, thitü hi tü jüma müsara nüh samü.

¹⁹Küpakenühnyunü zanyo kümühie hi nüh küsangüwa müsanüh kümüsü hi nüh müküsangüwa sasati.

²⁰Mükütüküzü hi nüh müküsangüwa hi nüh sa thuoüji jümatü hi nüh müsanü kükhiemuo hi vü peküvehwa nüh saveh.

²¹Jükenüh hi nüh zanyokümühie sa nti küsa vü eh ke vü kümüsü pelalati küsa jüma tü khonyo ti küsa hi nüh ngura.

²²Küpakenühnyunü hi tü eh luoveh alo tsatsa vünüh Saküüwuowa khonyowa lokümü kenüh.

²³Thitü eh kürho rühleri vü khonyo küpa küsü nüh eh kümüshe khonyowa siesaluo küveh hi nüh ngu veh, thi jüma nüh kükhiemuo khonyo eh kürho rühleri lovü küpeh kükhiemuowa küsi küüsa nta saveh.

²⁴Hi tü kümükhuomüju anyi küsü! Thawa nüh küsü satsa hamawa vünüh hi külole na lo?

²⁵Hiri VÜWA Jisu Khrista vünüh Saküüwuowa nüh hama sakütsükenüh müna she! Jütisanü hi thuoüji eh luoveh vi nü Saküüwuowa khonyo küüro sa veh, thitü eh sazüh thuoüji kükhiemuo khonyowa küüro satse veh.