Read Pochuri Naga ROMRI 8 Bible Online

ROMRI 8 - Pochuri Naga bible

ROMRI 8

¹Jükenüh Khrista Jisu vü küperi thuoüji khinyi nü müshekümüsü münyiethuoh. Thari nüh asazüh vü mütse nüh sanü sietse vü tse nüh jümari thuoüji müshekümüsümünyiethuoh.

²Küpakenühnyunü Khrista Jisu vünüh Sietse kürhowa nüh kükhiemuo thi aküsü vünüh hi vizhukütsuthuoh kenüh.

³Küpakenühnyunü anyira sazüh tü mükükhra kenüh Khonyowa nüh müsara nüh sakümüwa Saküüwuowa nüh sara. Jümatü kükhiemuo tsahri kümüjie vünüh thi kükhiemuori kenüh Saküüwuowa nüh ma mpa ma Tsa küze, ma nüh asazüh vünüh kükhiemuowa müshemüsümü.

⁴Jümatü asazüh vünüh kürhori nüh nyu nü hiri Sietse wuovü rhokütseri nüh Khonyo kümüshowa saju na küsa kenüh.

⁵Küpakenühnyunü asazüh vünüh kürhori thuoüji mari luoveh tü asazüh vü sasati, thitü Sietse wuovü nüh kürhori thuoüji mari luoveh Sietse wuovü sasati.

⁶Luoveh vi asazüh lovü küthse thuoüji aküsü, thitü luoveh vi Sietse vü küthse thuoüji akürho thi luoveh kürüzih.

⁷Küpakenühnyunü luoveh asazüh lovü küthse thuoüji Saküüwuowa sie mükünoluongü, thi jümatü piketü Saküüwuowa khonyo kükhu vü mpeh.

⁸Thi thari nüh asazüh vü pehveh nüh jümari thuoüji Saküüwuowa külo müsara.

⁹Thitü nohri thuoüji asazüh vü müpeh nüh Sietse vü pehvehthuoh, mükütüküzü Saküüwuowa Sietse nohri vü pehtsahvehüji. Anyi küsüküsü nga Khrista Sietsewa pehmüveh üji anyijüma tü ma zhi nyu.

¹⁰Thitü Khrista nüh nohri vü pehveh thuoüji nohri satsa nü kükhiemuo kenüh sümü wie ketünga künyitsa kenüh nohri sietse thuoüji rho wieveh.

¹¹Mükütüküzü ma Sietse Jisu küsü vünüh sakürholewa nohri vü pehvehthuoüji, Khrista Jisu aküsü vünüh saküürholewa nüh nohri küsü satsari vü akürho tsü naveh.

¹²Jükenüh eh füri, hiri tü asazüh kümüshe vünüh rho nti sanü asazüh ashewi vümüveh.

¹³Küpakenühnyunü nohri nüh asazüh kümüshe vünüh rho thuoüji süwie naveh, thitü Sietse vünüh nohri nüh kükhiemuo mükeri zothemü thuoüji nohri rhora naveh.

¹⁴Küpakenühnyunü Saküüwuowa Sietse nüh siekütseri aveh thuoüji Saküüwuowa atsari wiethuoh.

¹⁵ Küpakenühnyunü nohri tü kükrü vü külukelena küsa siepesietsewa müngu, thitü atsa küsara sietse ngu müthuoh. Jükenüh hiri tü Abba! eh Pa, ta ziaziati.

¹⁶Jümatü Sietsewa mpa nüh hiri sietse sie nü hiri tü Saküüwuowa tsari ta povü sa veh.

¹⁷Thi ma tsari samüthuoüji ma wurhuwa wiethuoh thi Khrista siewurhuwa thuoh, hiri nga ma sie küthola sana küsa kenüh ma siemünomünaveh.

¹⁸Hi nüh kümüshe thuoüji khinyi hiri nüh münomüna küvehritü thuohtüvü küthola hiri vü kütsakünguna sa küvehwa siekümüte thuoüji jüzake mütseh.

¹⁹Küpakenühnyunü zanyo saküsari aveh nga Saküüwuowa tsari kütholathuoh vü sanü kütsana küsa müngu nü huo pehveh.

²⁰ Küpakenühnyunü zanyo saküsari tü momaküsa kükhu lovü thsemüthuoh, jümatü ma mpa ma kümüshe vünüh nyu thitü Saküüwuowa kümüshe kenüh wie.

²¹Küpakenühnyunü zanyo sa küsari mpa nüh siepe küsa vünüh shuteru nü primü nü Saküüwuowa tsari lozhe nü kütholaküsa vü nyi sanaveh.

²²Thi khinyi küju wienga saküsari tü atsaküwuo vü künakümüjie kürü nü lüchi pehveh.

²³ Thi saküsari mpa mükünyu hiri Sietse vi küpekhuri, Saküüwuowa nüh hiri ma tsari küüsa nta huo taji küülole nta saküvehri nga lüchi pehveh.

²⁴Küpakenühnyunü küluozhe hama kenüh hiri tü külolera. Thi küluozhe khinyi ngu küvehwa thuoüji küluozhe nyu. Küpakenühnyunü ngu küveh kenüh ma tü luozhe veh.

²⁵Thitü müjiekünguwa hiri nüh luozheveh üji hiri tü küzhikenü jüma huoveh.

²⁶Jükümjie Sietsewa nüh hiri mükükhra vü kükratsü veh, küpakenühnyunü hiri tü kükhuolehri nga mükhuothsü nüh tsetseti, thitü Sietse nüh ma mpa apo nüh müküphraterhüra arütho nga sahzhile nü hiri mütho satü veh.

²⁷Thi Saküüwuowa nyiri luoveh küphawa nüh Sietsewa luoveh mowa nüh thsüveh, küpekenühnyunü Sietse nüh Saküüwuowa kümüshe vünüh kümtseri kenüh khuo peh huotüveh.

²⁸Saküüwuowa nüh zanyo aveh vü ma küümzeri sie nü kümühiewa kenüh küüro sa veh, jümari tü ma mpa ma kümüshe vünüh ji sa veh.

²⁹Ma nüh küütü vünüh jümari thsü nü ma Tsa kümüjie küsana küsa kenüh küütü phratsü, küpakenühnyunü afüri hozake azhie vü ma nüh küwuokhuwa küüsa nta küsa kenüh.

³⁰Thi ma nüh küütü vünüh küche küsaringa jimüthuoh; thi jiküsari nga sakümüshomüthuoh, thi ma nüh sakümüshoküsaritü saküthola müthuoh.

³¹Thinü hama kenüh hiri tü mowa küza mühieveh lo? Saküüwuowa nüh hiri wuovü thuoüji thawa nüh hiri mükünongü sara navehlo?

³²Ma tü ma mpa ma Tsa wienga mükürüpa nüh hiri aveh kenüh tsü thuoüji ma nüh zanyo aveh thi ma Tsa nga ti hiri mütsü nüh sanaveh lo?

³³Saküüwuowa nüh rüka küsari vü thawa nüh phratekümüsüranaveh lo? Küpakenühnyunü Saküüwuowa nüh mari sakümüshoküsa kenüh.

³⁴Thawa nüh mari küjora na lo? Küpakenühnyunü Khrista Jisu nüh sü thi aküsü vünüh rhole nü wa Saküüwuowa azhie wuovü peh nü hiri kenüh khuo küveh kenüh.

³⁵Thawa nüh Khrista küümze vünüh hiri saküporiera na lo? Kümnomna ünü, nyutü alokürü ünü, nyutü müküchieküsa vünüh ünü, nyutü kümükhuojih nüh, nyutü satsakürütso nüh ünü, nyutü kükrü nüh ünü, nyutü anyuchuwa nüh hiri saküporie naveh lo?

³⁶ Küpakenühnyunü zhütsazhü vü rhüküsa: “Noh kenüh rülo aveh vü hiri fethe; anyihzhü fethe na küsa kümüjie hiri vü sah,” ta rhü saveh.

³⁷Jüta wie ketünga hiri küümzewa vünüh kükhrara asevü nga khrara lele ti saveh.

³⁸Küpakenühnyunü hi nüh thsüto küveh thuoüji: aküsü nga satü, akürho nga satü, rügizhühleri nga satü, kükhraküviri nga satü, zanyo khinyi pehküvehri nga satü, nyutü thuotüvü runa sa küvehri nga satü, nyutü kümüzho nga satü,

³⁹nyutü kümüsie nga satü, nyutü aküsheh nga satü, saküsa küsü nga Khrista Jisu hiri VÜWA vünüh hiri azhi saküveh Saküüwuowa küümze vünüh hiri samüküporier