Read Pochuri Naga ROMRI 9 Bible Online

ROMRI 9 - Pochuri Naga bible

ROMRI 9

¹Hi nüh Khrista vünüh zhütsawa phrate veh, hi nü mürie; küpakenühnyunü eh kümüshe nga Kümtse Sietse vünüh eh povü saveh.

²Thi jüma thuoüji hi tü e lorü she thi mükütuo wiethuoh nüh eh luoveh lovü na kütse kenüh.

³Thi eh nyiri kenüh thi eh jienüri kenüh thi e küthsoküzhiri kenüh hi tü müzümü thi Khrista vünüh hi jamünga mühie veh.

⁴Mari tü Israelri, thi mari tü ma tsari wiethuoh, thi küthola nga sa tü, kütsathuohzhü tsüküsa nga satü, Khonyo tsüküsa nga satü, thi kükhurü nga satü, thi phratekeküsa nga satümari zhi khehwie.

⁵Khanavü nyiri nga mari anyi thi mari küshuküra vünüh asazüh müzhe nü Khrista tü mari vünüh ru. Saküüwuowa avehveh nyiaküsawa nüh kümüngatsahwa saluo! Amen

⁶Thitü jümatü Saküüwuowa zhü tü momasanüh samü naveh ti küsanyu; küpakenühnyunü Israel küshuküra aveh nüh Israel nyu.

⁷Thi aveh nüh Abraham atsari nyu, ma küshukürari wie; thitü Isaac vünüh nohri küshukürari anyo ji naveh.

⁸Mazhünyo thuoüji asazüh vünüh küwuori thuoüji Saküüwuowa tsari nyu, tü phratekeküsari ta chieke müthuoh.

⁹Hama kenüh phratekeküsawa nüh, “Tsotho hakümjie küsavü hi shele ru naveh thi Sarah tü atsa nyimpari küsü ngu naveh,” ti küza.

¹⁰Jümpa mükünyu Rebekah tü hiri anyi Isaac atsa künyi mo.

¹¹Masü wuo nü zanyo kümühie kümüsü nga müjie küsa vünüh Saküüwuowa nüh kürüka küürowa mükütuo nüh sana küsakenüh, thi jümatü küüro vünüh nyu nü ma küji vünüh wie.

¹²Küütü vünüh Rebekah vü, “Kükhruowa nüh kürünguowa kükhu vü rho naveh,” ta küza.

¹³ Jüma kenüh rhüküsa, “Hi nüh Jacob kümüze veh, thitü Esau thuoüji mürhümü” ta rhü saveh.

¹⁴Thinü hiri tü mowa phrate na lo? Saküüwuowa vü kümürhüküümze peveh ülo? Piketü nyu wie.

¹⁵ Küpakenühnyunü ma nüh Mosa vü, hi nüh küümzeri kümüze naveh, thi hi nüh küürüpari kürüpa naveh.

¹⁶Jükenüh jümatü nyiri kümüshe nyutü kükhra küthse vünüh nyu, thitü Saküüwuowa küümze vünüh wie.

¹⁷Küpakenühnyunü zhütsazhü nüh Faroah vü, noh vünüh ehkükhra azhih aveh vü küthola na küsa kenüh hi nüh no satsü. Jütaküsa vünüh eh nyowa tü azhih aveh vü tholawa naveh.

¹⁸Jütisanü ma nüh ma müsheri kümüze veh, thi ma mpa mamüsheri luoveh sakükhotsü veh.

¹⁹Thinü mokenüh ma tü nyiri vü müküle sa veh lo ta noh nüh hivü sanaveh. Küpakenühnyunü thawa nüh ma kümüshewa khehterana lo.

²⁰Thitü noh tü anyi thawa nü Saküüwuowa rületsüra naveh lo? Saküsa zanyowa nüh ma küsawa vü, noh tü mokenüh hakümjie hi satsü lo, ti samühie veh ülo?

²¹Aküfü küsawa tü nyisa küsü vünüh aküfü küzü küsüthi müküzü küsü ti sana küsa nyisawa nyia vü kükhrapehmüveh ülo?

²²Thinü Saküüwuowa nüh ma rüküshu thi ma kükhra viküthsüra natü rüküshu vünüh küfü samüsü kümü kükrükümüjie luoveh küzhike she veh.

²³Thi ma nüh küümzeri vü ma küthola kümühieri küthsüna küsa kenüh ma kütholawa küütü vünüh küchesamüthuoh.

²⁴Jümatü Judahri vünüh küjiri mpa mükünyu hiri Judahmükünyuri nga jimüsa ülo?

²⁵ Hama kenüh ma nüh Hosea vü: “Khanavü eh nyi samüküruri eh nyiri ta jimünathuoh! Thi khanavü hi müküümzevühwa tü eh küümzevühwa ta jimünathuoh.

²⁶ Azhie khiela nüh nohri nü eh nyiri nyu ta mari vü phrate nüh jüla nüh rhoküveh Saküüwuowa atsari ta mari ji naveh,” taküza.

²⁷Isaya nüh Israelri kenüh küzia, “Israel tsari tü juhküji vü ashünyi kümüjie zhipehwie ketünga kümünyiari mpa külolenaveh,” ti küza.

²⁸Küpakenühnyunü VÜWA nüh müküümze thi aküsü ashih azhih hala shita ma küüro sanaveh.

²⁹Jükenüh Isaya nüh küütü vünüh, “Mükütüküzü ashiejiwaVÜWA nüh atsari wuori müsatü thuoüji hiri tü Sodom kümüjie münomüna naveh, thi Gomorrah kümüjie hiri vü satsümü naveh,” ti küza.

³⁰Thinü hiri tü mowa phratera na lo? Judahmükünyuri künyitsaphamükütse tsahtsahriwie nga künyitsa ngura thuoüji, jümatü kütsotü vünüh künyitsa küngurawa;

³¹thitü Israelri tü künyitsa khonyo vü küpewa phawie ketünga khonyo küsaju vü wa müjura nüh samü.

³²Mokenüh lo? Jümatü küpakenühnyunü tü mari tü kütsotü vünüh mphah, thitü küüro vünüh küphah kenüh. Mari tü ajihkümüshüloh rügi vünüh mari jih müshükümüthuoh kenüh.

³³ Jüma kenüh rhü küsa hakümjie: “Halie, hi nüh nyiri ajihkümüshüloh Zion vü sa veh, aloh hamatü mari saküülu na küsa aloh küsü wiethuoh, thi thari nüh ma tsotü naveh nüh küzükrü vü küthsewa nyu,” ta rhü saveh.