Read Pochuri Naga 1 KORINTHIARI 1 Bible Online

1 KORINTHIARI 1 - Pochuri Naga bible

1 KORINTHIARI 1

¹Saküüwuowa[1] kümüshe vünüh VÜWA Jisu Khrista povü sa üta jiküsawa Paul thi eh nü Sosthini nüh rhü nü,

² Korinthia vü küpeh Saküüwuowa Nazizheh, thi Saküüwuowa Kümtse nyiri sa üta jiküsari aveh vü Khrista Jisu vünüh tsarü nü Saküüwuowa vü pehküveh nyiri azhie veh vü küru VÜWA Jisu Khrista khurü küvehri vü tsü veh.

³Saküüwuowa hiri Pawa thi VÜWA Jisu Khrista nüh küümze thi kürükümühiewa nohri kütsüwa saluo.

⁴Khrista Jisu vünüh Saküüwuowa küümze nohri vü tsüküsawa kenüh tsotho aveh vü nohri kenüh Saküüwuowa kümüna tsü veh.

⁵Jümatü azhü aveh vü nga satü thi zanyoküthsü aveh vü nga satü ma kenüh zanyo aveh vü nyirhie küvehthuoh kenüh.

⁶Nohri azhie vü Khrista povü wienga müzho sheh küvehthuoh kenüh,

⁷hiri VÜWA Jisu Khrista ru na küsa nohri nüh huoküveh kümüjie nohri tü sietse kütsia küsü nga züla müveh.

⁸Hiri VÜWA Jisu Khrista rülo vü müküle münyie wiethuoh nüh sana küsa kenüh ma nüh nohri sakümüzho shehke nü sehkhe juwie naveh.

⁹Saküüwuowa thuoüji kütsotürawa, ma nüh nohri jinü ma Tsa Jisu Khrista hiri VÜWA sie küümpamüwu müthuoh.

¹⁰Eh füri hi nüh nohri vü hiri VÜWA Jisu Khrista nyo vünüh khuoküveh thuoüji, nohri azhüküsü sa thi nohri azhie vü küüproluo müpehtümü nü kümüshe küsü vü thi kürü rühle küsü vünüh tsarü luo.

¹¹Küpakenühnyunü eh füri, hi nüh Khloe tsapari vünüh zhühle küthsüra nohri azhie vü küüproluo sa veh ta.

¹²Hi nüh küphratewa thuoüji nohri küsüküsü wienga: wuori nüh, “Hi nü Paul wuovü,” ti, wuori nüh, “Hi nü Apollo wuovü” ti, thi wuori nüh, “Hi nü Khrista wuovü” ti saveh ta.

¹³Thinü Khrista tü küsuomüthuoh ülo? Thinü Paul tü nohri kenüh khieluothso rügi vünüh sü ülo? Nyutü nohri tü Paul nyo vünüh baptis sa ülo?

¹⁴ Hi nüh VÜWA müna she veh, küpakenühnyunü hi tü Krispas thi Gaius masü küchie nüh baptis mükütsü kenüh.

¹⁵Jümatü nohri nyi küsü wienga eh nyo vünüh baptis sa ta küsa thama küphrate kenüh.

¹⁶ O ah lo, hi nüh Stefana tsapari nga tsü. Jüma nyia vü thuoüji hi nüh baptis tsü ünü mütsü nüh müthsüthuoh.

¹⁷Küpakenühnyunü Khrista nüh hi küüze thuoüji baptis küütsü nta nyu nü Zhühthe Kümühiewa vi nyuri vü küza üta küüzewie, thitü Khrista khieluothsowa kükhra sakürütso müjisü ti küsa kenüh azhüphrate küümühie shehra küthsü nga nüh vi müküza.

¹⁸Küpakenühnyunü khieluothso zhü tü kümiemüna küsara kenüh thuoüji zanyomüküthsü zhü, thitü hiri külole küsara kenüh thuoüji jümatü Saküüwuowa kükhra.

¹⁹Küpakenühnyunü jüma kenüh zhütsazhü nüh küüza: “Hi nüh zanyoküthsüra küthsü zoriemütü naveh, thi hi nüh aro kümühiera ro khetemütü naveh,” ta küza saveh.

²⁰ Zanyoküthsüri khiela pehveh lo? Kümahtsari khiela pehveh lo? Khinyi kürho vü azhü kürüluorari khiela pehveh lo? Saküüwuowa nüh azhih hama küthsü saküzhe mümütü ülo?

²¹Küpakenühnyunü Saküüwuowa nüh ma küthsü vünüh nyiri nüh mari mpa mari küthsü vünüh ma müküüthsüra samüthuoh. Jütanyu nü hiri nüh küzhera zhü küphrate vünüh kütsotüra küülole Saküüwuowa kümüshethuoh.

²²Küpakenühnyunü Judahri nüh küngoküüro khuomü thi Greekri nüh aküthsü phamü.

²³Thitü hiri thuoüji Khrista zekekümüwa vi sosieveh, thi jümatü Judahri kenüh thuoüji ajih kümüshü küsü thi Judahmükünyuri kenüh thuoüji jüma tü zanyo müküthsü azhü küsü.

²⁴Thitü Judahri nga thi Greekri nga jiküsari kenüh thuoüji Khrista tü Saküüwuowa kükhra thi Saküüwuowa zanyoküthsü küsü.

²⁵Küpakenühnyunü Saküüwuowa apo vünüh shuküru azhü thuoüji zanyo müküthsü kümüjie thitü nyiri nyia vünüh mütsa, thi Saküüwuowa küthachu thuoüji nyiri nyia vünüh khra.

²⁶Eh füri, nohri mpa nohri küji müshe nonoluo, azhihwa küthsü müshe nono nta thuoüji nohri anyi hozake wienga aküthsü nyu, kükhra nga mükhra, thi tharuo kümühie vünüh nga nyu.

²⁷Thitü zanyoküthsüri saküzükrü na küsa kenüh azhih vü zanyo müküthsüri VÜWA nüh rükamüthuoh, kümüzhori saküzükrü na küsa kenüh azhih vü mükümüzhori Saküüwuowa nüh rüka müthuoh.

²⁸Saküüwuowa nüh kürünyiawa rüka nü azhihwa kulemüthuoh, thi aküpehri sakümiemü nü rütsoküveh kümüjie küsari rükamüthuoh.

²⁹Jümatü küpakenühnyunü tü Saküüwuowa atüvü nyi küsü nga kürhiezawa nyu.

³⁰Khrista Jisu vünüh ma tü no kürho rütsohwa, ma vünüh Saküüwuowa nüh hiri küthsü, hiri künyitsa thi hiri saküümütsera, thi kürhesara satsü.

³¹ Jükenüh zhütsazhü vü rhüküsa, “Thawa nüh rhiezaveh nüh ma tü VÜWA vünüh kürhieza luo,” ta rhü saveh.