Read Pochuri Naga 1 KORINTHIARI 12 Bible Online

1 KORINTHIARI 12 - Pochuri Naga bible

1 KORINTHIARI 12

¹Thi eh füri, sietse kütsiari thuoüji, hi tü nohri vü müküthsü nüh müsangü.

²Nohri khanavü Khristanyi müküsa vü thuoüji nohri küchü sietsorhe kürholi mükünyieri vü wa, jütawie ketünga nohri tü shuteruthuoh.

³Jükenüh hi nüh nohri küüthsüngüwa thuoüji, Saküüwuowa Sietse nüh siekütseri nyi küsüwienga Jisu kümüzümüphrate. Kümtse Sietse nüh siekütseri küchie nüh nyiküsü nga “Jisu thuoüji VÜWA,” ta müphratera.

⁴ Thi Sietse kütsia thuoüji küpapa peh veh, thitü Sietse küsü vünüh wie.

⁵Thi küüro nga küpapa peh veh, thitü VÜWA thuoüji küsü wie.

⁶Thi küüro küsari nga küpapa, thitü Saküüwuowa küsü mpa nüh mari aveh nyi küsüsü küchütse.

⁷Nyiri aveh künyia kenüh Sietsewa küza küüthsü tsümüthuoh.

⁸Anyi küsüwa vü thuoüji Sietse vünüh kümütsa aküpro tsü, thi anyi küsüwa vü thuoüji Sietse küsü vünüh aküthsü aküpro tsü.

⁹Küsüwa vü thuoüji Sietse küsü vünüh kütsotü tsü, anyiküsüwa vü thuoüji Sietse küsü vünüh saküümühiera tsü.

¹⁰Nyi küsüwa vü thuoüji küngoküüro küsara tsü, küsüwavü thuoüji setsaküthsüzhü küphra tsü, küsüwa vü thuoüji sietse kümüsü kümühie thsüküüpara tsü, küsüwavü thuoüji azhü küpapa küphrara tsü, küsüwa vü thuoüji azhüri kürülera tsü.

¹¹Zanyo hamari aveh Sietse küsü nüh sahke tsü thi Sietse jümawa nüh nyi küsüsü vü ma kümüshe vünüh küsuotsü nü küroveh.

¹²Satsanü küsü wie, thitü mahnyo küpapa hozake peh veh, thi satsa rügivü mahnyo küpapa pehwie ketünga aveh wie nga kürü satsa küsü kümüjie Khrista vü nga jükümjie wie.

¹³Küpakenühnyunü hiri aveh tü Sietse küsü vünüh satsa küsüvü baptis sa, Judahri nga nyutü Greekri, nga siepe küsari nga thi mükünyuri nga Sietse küsü vünüh zhumüthuoh.

¹⁴Küpakenühnyunü hiri satsa tü mahnyo küsü mpa nüh satsa samüveh thitü hozake nüh satsa saveh.

¹⁵Ajih nüh, “Hi thuoüji ake nyu nü hi nü satsa nyu,” tawie ketünga satsa vü mahnyo küsü wiethuoh.

¹⁶Thi mükütüküzü khüna nüh, “Hi tü notha nyu nü hi thuoüji satsa nyu,” ta wie ketünga satsa vü mahnyo küsüwiethuoh.

¹⁷Mükütüküzü satsa aveh nüh notha samüthuoüji mowa nüh küna nah lo? Mükütüküzü satsa aveh nüh khüna samüthuoüji mowa nüh arhe kürhe na thuoh lo?

¹⁸Thitü jükümjie Saküüwuowa nüh ma kümüshe vünüh satsavü mahnyo küsüsü satsa küche samüthuoh.

¹⁹Mükütüküzü avehveh nüh mahnyo küsü mpa thuoüji satsa tü khiela peh veh thuoh lo?

²⁰Saküsa kümüjie, mahnyo küpapa hozake wie ketünga satsa küsüsamüthuoh.

²¹Jükenüh notha nüh ake vü, hi nü no müvi ketünga azhümünyie ta müphratera, nyutü alü nüh ajih vü, “Hi nü no müviketünga azhümünyie,” ta müphratera.

²²Jütanyunü satsa vü kükhra mükünyiewa nga müküvinyie nü zanyoküsü nga müsara.

²³Thi hiri satsa vü mahnyo küchieke küzülari wienga chieke nü hiete küzü tse veh, thi mahnyo küzükrüri tü saküüzüküzhi tsetseti.

²⁴Thitü hiri satsa vü mahnyo küzüri thuoüji ma kütiehte müviketünga azhümünyie. Thitü hiri vü küsiake mükünyie mahnyori nüh küsiake küüzhi küvü nta Saküüwuowa nüh hiri satsa jüüta satsümüthuoh.

²⁵Jüta thuoüji satsa vü müküka küsawanyuthuoh, jüti sanü mahnyo jümari tü küsü nüh küsü vü azhüküzhü pehmünathuoh.

²⁶Mükütüküzü mahnyo küsü nüh na thuoüji aveh nga nawa veh, thi rühle küsü nüh küsiake vü thuoüji aveh nga lozhe veh.

²⁷Nohri tü Khrista satsa wiethuoh, thi nohri nyi küsüsü nga jüla mahnyo küsü wie thuoh.

²⁸ Thi Saküüwuowa nüh pokhu sa VÜWA povü küsari Nazizhehvü thse, akünyiawa setsaküthsüri, kücheawa küsosieri, jüsevü küngoküüro küsari, jüsevü küsaküna saküümühieri, jüsevü küükrari, nyuri küücheri, thi azhüküpapa küphra kükhra nga tsü.

²⁹Jümari aveh povüküsari ülo? Nyutü setsaküthsüri ülo? Nyutü küsosieri ülo? Nyutü mari aveh küngoküüro küsariülo?

³⁰Nyutü mari aveh küsaküna saküümühiera kütsia peh ülo? Jümari aveh azhü küpapa küphrara sa ülo? Jümari aveh azhüküpapa küphra rületsü ülo?

³¹Jütawie ketünga kütsia kümühietsahri münguhuo tse luo. Jütathuoüji hi nüh lekhuji kümühietsawa nohri kütsanaveh.