Read Pochuri Naga 1 KORINTHIARI 15 Bible Online

1 KORINTHIARI 15 - Pochuri Naga bible

1 KORINTHIARI 15

¹Thi eh füri, hi nüh mokümjie vünüh nohri vü Zhühthe Kümühiewa sosietsü lo, thi nohri nga jüri vira lo, thi khinyi nga jüla tsieküveh nohri vü küthetsüle nthe.

²Hi nüh zhühle kümühiewa nohri vü küüzawa müjuju vünüh mütsotü nüh kümükhra nüh küjephoke thuoüji jüma vünüh külolemüthuoh.

³Küpakenühnyunü müsaji mükümühie küji pokhuwa hi nüh küngurawa vi nohri tsüthuoh. Jümatü zhütsazhü vü küzakeküsa kümüjie Khrista nüh hiri kükhiemuo kenüh sü.

⁴Zhütsazhü vü küzake küsa kümüjie ma tü chowumü, thi rülo kücheawa rhoshele tesüra.

⁵Jütisanü ma tü Pitor kütsa, jüsevü nüh türakünyiri vü kütsa.

⁶Jütisanü küsükeri vünüh ma tü afüri müza münga küüluo vü kütsa, jümari azhie vü wuori thuoüji tsotho tewathuoh ketünga mari aküzhi vünüh rhowieveh.

⁷Jümasevü nüh ma tü Jems vü kütsa, thi povüküsari aveh vünga kütsa.

⁸ Thi ha hi tsotho mükünyu vünüh küwuowa nga küüngu sehkhesa.

⁹Küpakenühnyunü hi tü povüküsari aveh zhie nüh küzahtsawa, povüküsari küsü ta müküjitsewa, küpakenühnyunü hi nüh Saküüwuowa Nazizheh sakümnomna kütsü kenüh.

¹⁰Thitü Saküüwuowa küümze vünüh hi tü mokümjie ünüh jümawiethuoh, thi ma nüh hi küümze tü müjuju vünüh nyu. Thitü jütawie ketünga hi tü povüküsari küpari nyia vünüh zanyo küüzhi sa, thitü jümatü hi nüh nyu nü Saküüwuowa küümze hi vü küpehwa nüh wie.

¹¹Thi hi nüh nga satü nyutü mari nüh nga satü kürü nü küsosie vünüh nohri nga tsotümüthuoh.

¹²Thinü povüküsari nüh Khrista tü aküsü vünüh rholesürata sosie thuoüji, mokümjie küsüri kürhole münyie ta nohri wuori tü phrate veh lo?

¹³Mükütüküzü aküsüri kürhole münyie ta thuoüji Khrista tü rhole müsathuoh;

¹⁴mükütüküzü Khrista rhole müsa thuoüji hiri nüh küsosie thi hiri kütsotü tü müjujuthuoh.

¹⁵Jümpa mükünyu hiri tü Saküüwuowa kenüh kütsie mükülethuoh, küpakenühnyunü küsüri kürhole münyietsah ta thuoüji Saküüwuowa nüh Khrista samükürhowie ketünga hiri nüh ma tü Khrista sakürho thuoh ta küsa povü satekütsethuoh kenüh.

¹⁶Küpakenühnyunü küsüri tü mürhole thuoüji Khrista tü rholemüsathuoh.

¹⁷Mükütüküzü Khrista tü rhole müsathuoüji nohri kütsotütü mame münyiethuoh thi nohri tü khinyi nga kükhiemuo vüpehwie veh.

¹⁸Thi thari nüh Khrista vünüh sütewa thuoh ünüh mari nga kümiemüthuoh.

¹⁹Mükütüküzü khinyi kürho vü mpa hiri tü Khrista vü küluozhe pehvehthuoüji hiri tü nyiri aveh azhie nüh kümüsehtsahri thuoh.

²⁰Thitü sükümüri azhie vü avi apokhuwa sanü Khrista tü rhosheletewa tsahthuoh.

²¹Küpakenühnyunü nyi küsü vünüh aküsü teküru kümüjie nyiküsü vünüh kürhole nga teru wiethuoh.

²²Küpakenühnyunü Adam vünüh avehveh sümü, jükümjie Khrista vünüh avehveh nga sakürho wie naveh.

²³Thitü nyiri aveh nga arühlerüleh vünüh ru naveh: Khrista nüh aviri powa, thi jümase vünüh ma küruvü ma vü pehküvehri.

²⁴Thi ma nüh nyuri nyia vü takrü saküvehri thi kükhra küviri avehthi akükhrari aveh zorie kümüse vü ma nüh kükaji Pawa Saküüwuowa ake vü thsemü thuoüji sehkhe terunathuoh.

²⁵Küpakenühnyunü ma nüh ma mükünongüri aveh ma jih kükhu vü müjie küthse küju nü kaji mpe üji mükümühie kenüh.

²⁶Mükünongüwa zoriena küsa sehkhewa thuoüji aküsü.

²⁷ Küpakenühnyunü Saküüwuowa nüh zanyo aveh Jisu jih kükhu vü thsekümüthuoh kenüh. Thitü zanyo aveh ma kükhu vü thse müthuohta küsawa tü, thawa nüh zanyo aveh ma kükhu vü thse nüh jümatü ma nga müküru wiethuoh ta küsa mütse she veh.

²⁸Zanyo aveh ma kükhu vü thsemüthuoh ta küsa vü thawa nüh zanyo aveh ma kükhu vü thsemüthuoh nüh Tsawa nga ma kükhu vü thsemüthuoh, jümatü Saküüwuowa nüh zanyo aveh nyiawa sanaküvehthuoh kenüh.

²⁹Thinü jüüta thuoüji aküsü kenüh baptis küsari tü moti sanathuoh lo? Mükütüküzü aküsüri tü rholemüsüra tsathuoüji nyiri tü mokenüh aküsü kenüh baptis sa veh lo?

³⁰Mokenüh hi tü tsotho aveh vü krü she nü tse veh lo?

³¹Eh füri, hi tü rülo tsotho aküsü mütu peh huo veh. Hi nüh nohri vü külozhe küpe kenüh hiri kürho vü Khrista Jisu hiriVÜWA sie zarike küsawa vünüh hi nüh hama küza veh.

³²Mükütüküzü nyiri khuoke kümüjie vünüh hi nüh Efesa vü “Samüwari” sie küproluo küru tüla hi tü künyia mowa pehvehlo? Mükütüküzü sükümüri tü mükürhole tüla hiri kürütsa thi zhu ti sa ünüh raluo, küpakenühnyunü thuohtü hiri tü sünaküvehthuoh kenüh.

³³Nyuri nüh müküümüratümü. Refü kümüsü vünüh khuke kümühie aveh nga zorie mümüti.

³⁴Nohri amüshekümüsho vü ru luo, thi mükhiemuole tümü luo. Küpakenühnyunü wuori thuoüji Saküüwuowa küthsü mükünyiekenüh. Nohri saküzükrü nti hi nüh hama küza veh.

³⁵Thitü wuori nüh, mokümjie aküsüri tü rhoshele veh lo? Mari tü mowa satsa vikevü nü ru na thuoh lo ta künanah veh.

³⁶Nohri küzheri, nohri nüh mowa zhuh ünüh jüma tü müsü nüh rhoruwievehthuoh ülo?

³⁷Noh nüh küzhuhwa tü thuohtü vü shuru na küsawa nyu, thitü no nüh küzhuhwa thuoüji amütha aveh, nyutü hiemütha nyutü küpa nga sala mühieveh.

³⁸Thitü Saküüwuowa nüh ma müshe vünüh atsüwa tü satsatsü, thi atsü küsüküsü nga satü Saküüwuowa nüh satsatsü khe.

³⁹Küpakenühnyunü asa aveh tü zarike nyu, thitü nyiri kenüh küpa, thi asa kenüh küpa, amüwa kenüh küpa, thi anga kenüh küpa.

⁴⁰Thi rügi vü satsa küpa pehveh thi azhih vü satsa küpa pehveh, thitü rügivü kürhora küzü küpa, thi azhih vü kü rhoraküzü küpa pehveh.

⁴¹Rünyi küzü küpa pehveh, thi asa küzü küpa pehveh, thi wutsiküzü küpa pehveh, thi wutsi wienga küsü nüh küsü vü küzü küpawie hü.

⁴²Aküsüri kürhole nga jükümjie wie. Zhühke küsawa thuoüji kümikürarahwa, thitü rhoshele küwawa thuoüji mümimüra.

⁴³Aküzhuh vü thuoüji ma küsiake münyie, thitü kürhole vü thuoüji kütholah pehveh. Aküzhuh vü thuoüji kümüzhomünyie, thitü kürhole thuoüji kükhra pehveh.

⁴⁴Aküzhuh vü thuoüji asatsa kümo, thitü kürhole thuoüji sietse kürho satsa. Mükütüküzü satsa kümo pehvehüji, sietse kürho nga pehveh.

⁴⁵ Jükümjie anyi powa Adam thuoüji kürholi anyi küüsamüthuoh, thitü Adam künyiawa thuoüji kürholi vi nyiri kütsü sietsewa samüthuoh.

⁴⁶Thitü sietse kürhowa mürukhu nüh asazüh kürhowa rukhu nü jüsevü nüh sietse kürhowa ru.

⁴⁷Anyi pokhuwa thuoüji azhih vünüh, jüma tü azhitho vünüh, thitü anyi künyiawa thuoüji rügi vünüh.

⁴⁸Azhitho vünüh küsa kenüh azhitho vünüh küruri thuoüji azhithowiethuoh, thi rügi vünüh küru kenüh rügi vünüh küruri thuoüji rügi nyiri wiethuoh.

⁴⁹Hiri nüh azhih nüh küsa satsawa vüte kütse kümüjie hiri tü rügi vü satsawa nga vü wienathuoh.

⁵⁰Eh füri, hi nüh nohri vü hama küza veh: asa thi azüh vü nü Saküüwuowa kajipe hiri azhi müsara, nyutü küprikürarahwa nüh müküprikürarahwa müvira.

⁵¹Halie, hi nüh azhü küsheh küsü nohri vü küza naveh. Hiri aveh tü küzehwa nyu, thitü hiri aveh khaphrümü naveh.

⁵²Tsotho pike azhie, nothaküükhro küsü vünüh atütü kükhusehkhe vü, küpakenühnyunü atütü tü khuwie naveh, thi aküsüri tü müprimüra nüh rhosüra naveh, thi hiri tü khaphrümünathuoh.

⁵³Küpakenühnyunü küprikürarah kürho hamatü müküprikürarahwa vike müvüji mümühie, thi küsüra satsahamatü müküsüra satsa vike müvüji mümühie.

⁵⁴Küprikürarah nüh müküprikürarah vikevü thuoüji, thi küsüra kürhowa nüh müküsürawa vikevü thuoüji rhüküsawa saju taji, “Khrara nü aküsüwa tü müzhumüthuoh,” ta sanaveh.

⁵⁵“Halie, aküsü no kükhra khiela pehveh lo? Halie, aküsü noh nüh saküümüsüra kükhra khiela pehvehlo?”

⁵⁶Aküsü thuoüji sakümnomna nta kükhra kükhiemuo vünüh vi veh, thi kükhiemuo tü ma kükhra Wulewa vünüh vi veh.

⁵⁷Thitü VÜWA Jisu Khrista vünüh Saküüwuowa nüh hiri vü kükhra kütsü kenüh ma müna she.

⁵⁸Jükenüh küümze eh füri, VÜWA vü nohri münomüna kütsewamükria ti küsa thsü nü VÜWA küüro vü kümükhra nüh sanü müzho thi mükhaphrükhale tümü luo.